ဟိုတ်နူအသိင်င္ရုဟ်ကၠေင်စက် က္ဍင်ကီု ကေတ်ကၠေင်စက်လေဝ် ဝါတ်ကီုဂှ်တုဲ စရိတ်ဍာ်ကွဳစက်လာင် ဒမြိပ်ဒၟံင်ဂၠံင်ကျာ်ပိ-မတ်မလီုဂှ် ညးမွဲတၠမ္ဂး င္ရုဟ်သၠုင်တိုန်အာ စဵုကဵုမွဲကိုဋ်ဘာ်ဒ္ကေဝ်ရောင် ဂွံတီကေတ်ရ။

ဒုင်သ္ဇိုင်ကဵုပရေင်ပရူအခက်အခုဲ ကၠေင်စက်ဂှ်တုဲ အကြာမွဲၜါတ္ၚဲဏံ စရိတ်ဍာ်ကွဳစက်လာင် ကျာ်ပိ-မတ်မလီု ညးမွဲတၠ ဒးကဵုမံင် နူမွဲကိုဋ်ၜါဠက်ဒ္ကေဝ်ဂှ် လၟုဟ် ဒှ်အာ မွဲကိုဋ်ဘာ်ဒ္ကေဝ်ကီု၊ ကျာ်ပိ-မုဟ်ဍုၚ်မ္ဂး နူ (၁) ကိုဋ်ဂှ် သၠုင်တိုန်အာ မွဲကိုဋ်ၜါဠက်တုဲ ကျာ်ပိ-လှာဒကှ်ဂှ်လေဝ် စရိတ်ညးမွဲတၠ နူဒးကဵုမံင်ထပှ်ဠက်ဒ္ကေဝ်ဂှ် လၟုဟ် ဒှ်အာမွဲကိုဋ် နွံရောၚ် ညးဒမြိပ်ကွဳစက်လာင်မွဲတၠ ဟီုထ္ၜးရ။

“ဟိုတ်နူအခိင်က္ညင်တုဲ အာကၠုင် ဗပဵုလဝ်ၚုဟ်ညိဂှ် နုက်စရိတ်ကၠေင်၊ နုက်စရိတ်အကံက်အခေါန် သၞေဟ်ကင်တုဲ သွက်ဇကုဟွံသှ်ေကွေံကွေံပုဟ်၊ ယဝ်ရအခိင်ကသီုတေံ ကၠေင်က္ဍင်ဗီုဏံတှ်ေ ၚုဟ်ၜိုတ်ဏံရတှ်ေ အာကၠုင် ဟွံကိတ်စကွေံပုဟ်” သာ်ဝွံ ညးဒဳကွဳစက်လာင်ဂှ် ဟီုရ။

ဗွဲကြဴနူပၞာန်သီအဝဵုတုဲ စဵုကဵုတ္ရဲဏအ်ဂှ် ဟိုတ်နူပရေင်ဂီုကၠီုဟွံခိုဟ်ဂှ်ရ ညးဒဳကွဳစက်ဒမြိပ်လာင်တအ်ကီု ကွဳစက်ဖ္ဍိုက်ကပေါတ် ကေုာံ ကွဳစက်ပူဂဵုကီုတအ်ဂှ် ဟွံစကာဂၠံင်ဍာန်ကျာ်ပိ-ဇြပ်ဗုတုဲ အဓိက အာကၠုင်ဒၟံင် မွဲဒမြိပ်ဂၠံင်ဇၞော် ကျာ်ပိ-လှာဒကှ်-မုဟ်ဍုင်-မတ်မလီုဂၠိုင်ရောင် ဂးရ။

တုဲပၠန် ကိုပ်ကၠာနူပေါဲပၞာန်ပ္ဍဲဍုင်အဳရာန် ဟွံဒှ်ဏီဂှ် င္ရုဟ်ကၠေင်ဓါတ်၊ ကၠေင်ဒဳဇြေဝ် မွဲလဳတာ နွံမံင်အကြာ (၃၅-၅၀) ၝာတ်ကၠာလေဝ် အေဿရေ-အမေရိကာန် လုပ်ဗ္တိုက်အဳရာန်တုဲ င္ရုဟ်ကၠေင်ဓါတ် ဂကူ (၉၅၊ ၉၂) ဂှ် မွဲလဳတာ တိုန်အာ (၇၀) ၝာတ်၊ ကၠေင်ဒဳဇြေဝ် မွဲလဳတာဂှ် ဒှ်အာ (၆၀) ၝာတ်ရောင် ဂွံတီကေတ်ရ။

“ပေါဲဗတိုက် အမေရိကာန်ကဵုအေဿရေ ဗတိုက်ဍုင်အဳရာန်ဂှ် ယဝ်ရဂၠိင်သ္ၚောဲဒၟံင်ဏီတှ်ေ ပရေင်ဝါတ်ဂါတ်ကၠေင်ဂှ် ဍုင်တၞဟ်ဟ်ဂှ်ဟွံတီ ယဝ်ရ ဍုင်ဗၟာတှ်ေ ပရေင်ပရူမွဲမွဲသာ် ဇီုကပိုက် ဆဵုဂဗက္တဵုဒှ်ကၠုင်မာန်မံင်ဏောင်” သာ်ဝွံ ညးဒေသဍုင်ကျာ်ပိမွဲတၠ ဟီုရ။

ဟိုတ်နူအသိင်ကေတ်ကၠေင်စက်ဝါတ်၊ ကၠေင်စက်င္ရုဟ်က္ဍင်ဝွံတုဲ ဆေင်ကဵုကပေါတ်လုပ်ပါင်ဖဴနာနာသာ်တအ်လေဝ် င္ရုဟ်က္ဍင်ဗက်တိုန်ကီုဂှ်ရ ပရေင်ကြေပ်ဂြတ်ညးဍုင်ကွာန်တအ် သာဂၠိုင်တိုန်ကၠုင်ရောင် ဂးရ။

ဆဂှ်သၟးဟွံက မွဲဒမြိပ်ဂၠံင်ကွဳစက်ကျာ်ပိ-လှာဒကှ်-မုဟ်ဍုဟ်-မတ်မလီုတအ်ဂှ် သၞေဟ်ကင်စၟဳစၟတ် ဒပ်ပၞာန်ဗၟာ၊ ဂကောံရပ်လွဟ်ကရေင်၊ ဂကောံရပ်လွဟ်မန် ကဵု ဂကောံရပ်လွဟ်ပၠန်ဂတးဂမၠိုင် လၟိဟ် ၂၀ ဒၞါဲပါ်လ္တူ နွံတန်တဴဒၟံင်တုဲ ကွဳစက်ဒမြိပ်လာင်တအ် ဒးကဵုဒၟံင်အကံက်အခေါန် ဇၟာပ်ဒၞါဲလေဝ် နွံရောင် ဂွံတီကေတ်ရ။