ပ္ဍဲကွာန်ဒူရာ၊ ဒေသဖာလိန်၊ ပွိုၚ်ဍုၚ်ရေဝ်၊ တွဵုရးဍုၚ်မန်ဂှ်ဝွံ ဂိတုဖေဖဝ်ဝါရဳ (၁၆) တုဲကၠုၚ်ဏံ နူဒပ်ကမ္မယှေန်ပၞာန် ရပ်ဏာ သၟတ်ကဵု ညးဒေသအဝဲလ္ဒောဝ်တံဂှ် အောန်အိုတ် ဒးပၠောပ်ကဵုသြန် (၃၀) ကိုဋ်တုဲ ညးက္လေၚ်ဗၠးကၠုၚ်နွံမံၚ်ရောၚ် ညးဒေသဖာလိန်တံ ဟီုကဵု IMNA ရ။
ပ္ဍဲဂိတုဖေဖဝ်ဝါရဳ (၁၆) တုဲကၠုၚ်ဏံ အခိၚ်ကၠောန်သ္ပမံၚ် ပရေၚ်ဂၠိုက်ဂၠာဲတၟာတ်ဆိုအ် ပ္ဍဲသ္ကုတ်ဂၠံၚ်လုပ်တိတ်ကွာန်ဒူရာဂှ် နူဒပ်ကမ္မယှေန်ပၞာန်တံ ရပ်ဏာ ညးဒေသတတ်အာကၠုၚ် ၜါဖ္ဍိုက်ကွဳစက်ပၞာန်တုဲ ထိၚ်ဒဝ်လဝ် ပ္ဍဲဗဒိုပ်ဒပ်၊ ဗဒိုပ်ဗၠာဲသၟိၚ် လ္တူဍုၚ်ရေဝ်ရ။
အတိုၚ်ညးဒေသမွဲတၠဟီုဂှ်မ္ဂး နူကဵုမိမ/ညးထိၚ်ဒဝ်တံ ပၠောပ်လဝ်ကဵုသြန် အောန်အိုတ် (၃၀) ကိုဋ်တံဂှ် က္လေၚ်ဗၠးကၠုၚ်ဟွံအောန်နူ (၁၀) တၠတုဲ ညးဒးဒုၚ်ထိၚ်လဝ်တံလေဝ် နွံမံၚ်ဏီရောၚ် ဂးရ။
“ဍေံတံ ကၠုၚ်ကွာန်မွဲအလန်တှေ် ဂွံသြန်လၟိဟ်ကဵုကၠံကိုဋ်ရ။ သြန်ဂှ်အိုတ်အာတှေ် ထပ်စှေ်ကၠုၚ်ကွာန်ပၠန်တုဲ ထပ်ရပ်ညးဒေသတံပၠန်ရ။ ဗီုကဵုဒမၠရ။ ညးဒေသတံလေဝ် က္လေၚ်ဗၠးတှေ်တုဲဂှ်ရ ကဵုဏာသြန်” သာ်ဝွံ ညးဟီုရ။
ဒပ်ကမ္မယှေန်ပၞာန်တံ ထ္ပက်မံၚ်ကရောၚ်ပၞာန် လ္ပာ်ဒေသဖာလိန် မွဲနှေံမွဲနှေံ လၟုဟ်ဏံဂှ်ဝွံ သၟာၚ်နူကိစ္စပရေၚ်ပၞာန်တုဲ မိက်ဂွံဓရတ်ကေတ်သြန်ဂှ်ရ ကၠောန်သ္ပဒၟံၚ် ပရေၚ်ပကီုပရာပ်နာနာသာ်ရ။
ညးဒးဒုၚ်ရပ်လဝ်ဂမၠိုၚ်တံဂှ်ဝွံ ညးက္လေၚ်ဗၠးကၠုၚ် ဟွံဒးဘဲမွဲသာ်လေဝ်နွံ၊ ညးဒးဒုၚ်ၜုၚ်တက်လေဝ်နွံရဂှ် ညးဗြဴဒေသမွဲတၠဂှ် ဟီုရ။
“ညးအာယုက်အဝဲဒေါဝ်မွဲတၠဂှ် ဍေံတံ ၜုၚ်တက်လဝ်ဂှ် ရုပ်သာ်မၞိဟ်လေဝ် ဟွံမံက်ဟဂှ်ရ။ စဵုကဵုဟတီဟွံဒးဂှ် ၜုၚ်တက်လဝ်။ ကဵုသြန်ဟွံမာန်လေဝ် ဟွံသေၚ်ပုဟ်။ ၜုၚ်တက်ဏာလဝ် အတိုၚ်ဂှ်ရ” သာ်ဝွံ ညးဟီုရ။
ဂိတုမာတ် စၟတ်တ္ၚဲ (၄) တုဲကၠုၚ်ဏံဂှ်လေဝ် ကွဳစက်ပၞာန် (၅) ဖ္ဍိုက် နဇြဟတ်လၟိဟ်ကဵုကၠံတံဂှ် ထ္ပက်အာကရောၚ်ပၞာန် လ္ပာ်ကွာန်ဒူရာတုဲ သၟာန်သၟုက်စၟဳစၟတ်ဒၟံၚ် ညးဒေသတံရ။
ကောန်သ္ဂံၚ်ဒပ်ကမ္မယှေန်ပၞာန် နူတမ်ဒပ်ဖျေံသဇိုၚ်ဍုၚ်ရေဝ်ဂှ်ဝွံ ထ္ပက်ကၠုၚ်မံၚ်ကရောၚ်ပၞာန် လ္ပာ်ဒေသဖာလိန် မွဲနှေံမွဲနှေံဂှ်ရ ဒှ်ပေဲါဗ္တိုက်ကဵု ဒပ်ပံၚ်ကောံပၠန်ဂတးတံ မွဲနှေံမွဲနှေံတုဲ ပွမသီကေတ် ကွဳလိုန်ဓာတ် ညးဒေသတံ ဗွဲအဓမ္မကီု၊ ဓရတ်ကေတ်သြန်ကီုနွံဂှ် ဂွံတီကေတ်ရ။
