ညးဍုၚ်ကွာန်ဒးဘဲပၟတ် ပ္ဍဲကွာန်ဂဒုၚ်ၜဝ်၊ ပွိုၚ်ဍုၚ်မုဟ်ဍုၚ်၊ တွဵုရးဍုၚ်မန်ဂှ်ဝွံ ကမၠောန်က္လေၚ်ဒက်ပ္တန်တၟိ နကဵုသြန်ဒါန် တၠဒါန်မဆေၚ်စပ်ဂမၠိုၚ်တံဂှ် မိက်ဂွံကၠောန်သ္ပရေၚ်တၠုၚ်အာ နအလဵုပၟိက်ဆန္ဒဇကုဇကုရောၚ် ဟီုကဵု IMNA ရ။

ပ္ဍဲကွာန်ဂဒုၚ်ၜဝ်ဝွံ တုဲကၠုၚ်ဂိတုဂျာန္နဝါရဳ (၈) တေံ ဟိုတ်နူသာသ္ပအ်တုဲ ကတဵုဒှ်အာ ပရေၚ်တူပၟတ်ဂှ်မ္ဂး သ္ၚိဒၟံၚ် (၅၇) မ တူအာပၟတ်တုဲ လၟိဟ်မၞိဟ် (၂၁၃) တၠ ဒးအာဘဲပၟတ်ကီုရ။

စပ္တံနူအခိၚ်ဒးဘဲပၟတ်ဂှ်ရ ညးတၠဒါန် ဍုၚ်မ္ၚး၊ အပ္ဍဲဍုၚ်တံ ကၠုၚ်စိုပ်ကဵုထံက်ပၚ်ရီုဗၚ် သွက်လၟေၚ်ကမၠောန်က္လေၚ်ဒက်ပ္တန်တၟိဂှ်တုဲ ပ္ဍဲကဵုဘာလကျာ် (ရွာဦး) ကဵု ဂကောံအုပ်ဓုပ်ကွာန်ဂှ်မ္ဂး ကလိဂွံလဝ်သြန်ဒါန် (၃၀၀၀) ကိုဋ်ပြၚ်ရောၚ် ညးဒေသတံ ဟီုရ။

ယၚ်သြန်ဒါန်ဂမၠိုၚ်ဂှ်ဝွံ နူဘာလကျာ် (ရွာဦး) ဂှ်ကဵု ဂကောံအုပ်ဓုပ်ကွာန်တံ ထိၚ်ဒဝ်လဝ်တုဲ လၟေၚ်ကမၠောန်က္လေၚ်ဒက်ပ္တန်တၟိဂှ် ဟွံကၠးဖ္ဍးမွဲသာ် နကဵုအစဳဇန်ညးတံဟေၚ် ကၠောန်သ္ပရေၚ်တၠုၚ်ဒၟံၚ်ဂှ်ရ ညးဒေသဒးဘဲပၟတ်ဗွဲမဂၠိုၚ် ဟွံပေၚ်စိုတ်နွံမံၚ်ရောၚ် ညးဒေသကွာန်ဂဒုၚ်ၜဝ်မွဲတၠ ဟီုရ။

“သြန်တံဂှ် နွံမံၚ် ပ္ဍဲကဵုကျာ်ဇၞော် (ရွာဦး) ကဵု သ္ကိုပ်အုပ်ဓုပ်တံရ။ မၞိဟ်တေံ (၅၀) ကိုဋ်၊ မၞိဟ်ဏံ (၁၀၀) ကိုဋ်၊ သီုဖအိုတ် နွံမံၚ် လ္တူကိုဋ် (၃၀၀၀) ရ၊ ပ္ဍဲကဵုဘာ (ရွာဦး) ဂှ်။ သွက်ညးဒးဘဲပၟတ်တံဂှ်တှေ် ဒဵုကဵုလၟုဟ် ဟွံပါ်ကဵုဏီပုဟ်။ ပ္ဍဲကဵုကၠအ် ညးတၠဒါန်တံ ကဵုလဝ်ဒါန်ဂှ်လေဝ် သိုၚ်ကဵုသ္ၚိဒၟံၚ်ဏောၚ် ဟီုမံၚ်ဏီရ။ ညးဍုၚ်ကွာန်တံဂှ် နနဲဇကုကဵုဇကု မိက်ဂွံသိုၚ်ကေတ်” သာ်ဝွံ ညးဒေသကွာန်ဂဒုၚ်ၜဝ်ဂှ် ဟီုရ။

သၟာၚ်နူဂှ်ပၠန် ပ္ဍဲကဵုလ္တူဂအာၚ်ကၠအ် ညးတၠဒါန်တံ ကဵုလဝ်ဒါန်ဂှ်ဝွံ နကဵုအစဳဇန် ဂကောံအုပ်ဓုပ်ကွာန် သိုၚ်ခၞံကဵုသ္ၚိဒၟံၚ်စဵုဒၞာတၟံလး (ကျောက်ပြားကာနေအိမ်) ဂှ် ဒုၚ်တဲ ၜိုတ် (၁၅) သ္ၚိကၟိန်ဟေၚ်တုဲ ညးဒေသဒးဘဲပၟတ် ဟွံဒုၚ်တဲလ္ၚဵုတံ နကဵုနဲဇကုဇကု သို်ၚ်ခၞံမံၚ်သ္ၚိဒၟံၚ်နွံကီု ညးဆက်ဟီုလဝ်ရ။

ညးတၠဒါန်ဂမၠိုၚ် ကၠုၚ်စိုပ်ကဵုလဝ်ဒါန်သြန် သွက်ညးဍုၚ်ကွာန်ဒးဘဲပၟတ်ဂမၠိုၚ်ဂှ်ဝွံ ကျာ်ဇၞော်ဘာ (ရွာဦး) ကဵု ဂကောံအုပ်ဓုပ်ကွာန်တံ ထိၚ်ဒဝ်လဝ်တုဲ စကာဒၟံၚ် သွက်ကမၠောန်က္လေၚ်ဒက်ပ္တန်တၟိ ညးဍုၚ်ကွာန်ဒးဘဲပၟတ်တံဟေၚ်ရဂှ် သ္ကိုပ်အုပ်ဓုပ်ကွာန်ဂဒုၚ်ၜဝ် ဟီုရ။

“သြန်ဒါန်သွက်ညးတံဂှ် မွဲသ္ၚိတှေ် (၁၂၀) ကိုဋ်ပြၚ်ရ။ ပိုဲတံဂှ်တှေ် ပ္ဍဲကဵုဂအာၚ်ကၠအ်ဂှ် နကဵုသိပ်သိပ်ဂၠိပ်ဂၠိပ် ဂွံညဳသၟဟ်ဂှ် စဳဇန်ကဵုဗီုဏံရ။ ချပ်ဂၞန်ကဵု ကျာ်ဇၞော်ကွာန်တုဲမှ ကၠောန်ရ။ ဣညအ်ဂှ် ဟွံဒးစိုတ်ပုဟ်။ ၜိုတ် (၁၅) သ္ၚိဟေၚ် တုပ်စိုတ်ရ။ (၁၅) သ္ၚိဏံရ သိုၚ်မံၚ်ကဵု သ္ၚိပသဲ (သံအိမ်)။ သှေ်ဂှ်တှေ် ဇကုညးတံကဵုညးတံ သိုၚ်မံၚ် ပ္ဍဲဒၞာဲသ္ၚိတူပၟတ်ဂှ်ရ။ ပိုဲတံလေဝ် မုဟွံဟီုပုဟ်” သာ်ဝွံ ညးဟီုရ။

ကိစ္စသ္ဂောံသိုၚ်ခၞံသ္ၚိဒၟံၚ်ဂှ် ရေၚ်တၠုၚ်ပလေဝ်ပလေတ်လဝ်တုဲမံၚ်ဂှ်ရ သွက်ညးဒေသ ဟွံဒုၚ်တဲတံဂှ် အစဳဇန်ပါ်ကဵုသြန်ဒါန်ဟွံမွဲရဂှ်လေဝ် ဂးလဝ်ကီုရ။

အစဳဇန်သိုၚ်ခၞံသ္ၚိဒၟံၚ် ဂကောံအုပ်ဓုပ်ကွာန်တံဂှ်ဝွံ သ္ၚိဒၟံၚ်မွဲမဂှ် နကဵုၚုဟ်မး (၉၀) ကိုဋ် သိုၚ်ခၞံကဵုတုဲ ၚုဟ်မးစရိတ်အိုတ်ဂှ်လေဝ် ညးဒေသဒးဘဲပၟတ်တံ ဓဝ်ပတှေ်ဟွံမွဲရဂှ်လေဝ် ညးဒေသတံ ဟီုရ။

ဗွဲကြဴနူကွာန်ဂဒုၚ်ၜဝ်တူအာပၟတ်တုဲဂှ်မ္ဂး ပရေၚ်အရီုအဗၚ်ကာတၟေၚ် ညးဒေသဂမၠိုၚ်တံဂှ်ဝွံ နူဂကောံရီုဗၚ်မၞိဟ်ဖျေံသဇိုၚ်ကွာန်၊ ဗော်ပရေၚ်ဍုၚ်ကွာန် ကေုာံ ဂကောံဟံၚ်ပြာ်မၞိဟ် ဖျေံသဇိုၚ်မတ်မလီုကီု သီုဖအိုတ် (၇) ဂကောံ ကဵုလဝ်အရီုအဗၚ်ရောၚ် ဂွံတီကေတ်ရ။