ရာသဳက္ညၚ် သၞာံ (၂၀၂၆) ဏံဝွံ အလုံမွဲဒမြိပ်ဝၚ်ဂှ် ဒှ်ရာသဳက္ညၚ်ဂမ္တဴမသ္ကာတ်မြဟ် (သၠုၚ်အိုတ်) မာန်ရောၚ်ဂှ် နူဌာနဥတုရာသဳ ကေုာံ ဗြဲကျာ ကၟိန်ဍုၚ်နာနာတံ တော်ခယျလဝ်တုဲ နကဵုညးဍုၚ်ကွာန်ဂမၠိုၚ်တံ ပြဿနာပရေၚ်ထတ်ယုက် ကတဵုဒှ်နူဘဲဒဏ်ဂမ္တဴဂှ် ဒးဒစးဒုၚ်စဵုဒၞာ မံၚ်စံၚ်အာထေက်ရောၚ် ညးတာလျိုၚ်ပရေၚ်ထတ်ယုက်ကဵု တၠပညာဗြဲကျာတံ ဟီုဂးဖတိုက်ဖအောဝ်လဝ်ရ။
သရောပ်ဂမ္တဴသၞာံ (၂၀၂၆) ဏံဝွံ ယဝ်ပတောံၜတ်ကဵု အခိၚ်ကာလကွတ်စက် ဟွံတောတက်ဏီဂှ်မ္ဂး နူ (၁ ဒသမ ၃ စဵုကဵု ၁ ဒသမ ၅) သၠုၚ်တိုန်မာန်တုဲ ပ္ဍဲဝၚ်ဂၠးတိဝွံ နူကဵုဂမ္တဴဂၠိုၚ်အိုတ် (၄) သၞာံဂှ် မွဲသၞာံဒှ်မာန်ရောၚ် ဂွံတီကေတ် နူလိက်လလောၚ် ဂကောံဗြဲကျာကၟိန်ဍုၚ်နာနာ (WMO, NASA & NOAA) ကဵု ဌာနဗြဲကျာကၟိန်ဍုၚ်သေံ Thai Meteorological Department (TMD) တံရ။
ပရူပရာဂမ္တဴမသ္ကာတ်မြဟ်ဏံဂှ်ဝွံ ဟိုတ်နူအသိၚ် အခိၚ်အေဝ်နဳညိုဝ်စဒှ် နူကၞောတ်သၞာံ (၂၀၂၅) သှေ်သၟေဟ်မံၚ်ဂှ်ရ စဵုကဵုကဝက်သၞာံ (ရာသဳက္ညၚ်) (၂၀၂၆) ဏံ ပါလုပ်ဆက်စပ်နွံရဂှ်လေဝ် တော်ခယျလဝ်ရ။
ဟိုတ်နူအသိၚ်ဂမ္တဴမသ္ကာတ်မြဟ်ဏံတုဲ ကၟိန်ဍုၚ်ဗၟာကီု သီုကၟိန်ဍုၚ်အာယှဒိုဟ်အဂၞဲဂမၠိုၚ်ဂှ် ဒးဒုၚ်စသိုၚ်ဘဲဒဏ်ဂမ္တဴ ဗီုဓမ္မတာဟွံသေၚ်ဂှ်ရ မပ္တံဓာတ်ဍာ်အောန်၊ ဗၜူ၊ ဍောၚ်ၜိုတ်အိုတ်ဓတ် ကေုာံ ဂမ္တဴသ္ကာတ် ကတဵုဒှ်လေပ်တုဲ စွံသတိကဵု ပရေၚ်ထတ်ယုက်ညိဂှ် အ္စာဂဥုဲ (အ္စာသဝ်ဝန်) နူဒေသမန်မွဲတၠ ဟီုဂးကဵုလဝ်ကသပ်ရ။
“အခိၚ်ရာသဳက္ညၚ်ဂှ် ဟိုတ်နူဂမ္တဴသၠုၚ်တိုန်ကၠုၚ်ဂှ်ရ မၞိဟ်တံဂှ် ဓာတ်ဍာ်အောန်စှေ်ကီု၊ ဗၜူကီု၊ ဂမ္တဴသ္ကာတ်မြဟ်ကီု ဒှ်မာန်ရ။ ဗွဲတၟေၚ်တှေ် သၟာကမၠောန် ဒးကၠောန်မံၚ်အလောန် ပ္ဍဲတ္ၚဲကာတ်ကာတ်တံ၊ သၟာဂူဗ္ၚတံ သာတုဲဒးစွံသတိရ” သာ်ဝွံ ညးဟီုရ။
ပ္ဍဲခန္ဓကာယဇကု ဓာတ်ဍာ်သ္ဂောံရုံဂပ်ဂှ်မ္ဂး သုၚ်ကဵုဍာ်ဂၠိုၚ်ဂၠိုၚ်ညိ၊ အခိၚ်တ္ၚဲသ္ကာတ်မြဟ် နူဂယး (၁၀) နာဍဳ စဵုကဵု တ္ၚဲစေၚ် (၂) နာဍဳဂှ် ဖအောန်ဖျေံ ပရေၚ်အာကၠုၚ်တိတ်မ္ၚးညိ၊ ကယျိုၚ်ကယျဝ် ကျာလုပ်တိတ်ခိုဟ်တံဂှ် ဗွိုက်လ္တက်ညိ၊ ကာလတိတ်မ္ၚးမ္ဂး စကာအထုပ်၊ က္ဍိုၚ် (ဝါ) ကပေါတ်ဒၞာတာ လျးအရံၚ်တ္ၚဲညိ၊ ကောန်ၚာ်၊ ညးအာယုက်ဇၞော်ကဵု ညးယဲမဂၠိၚ်သ္ၚောဲနွံတံဂှ် သ္ပဂရုပရေၚ်ထတ်ယုက်ဗွဲတၟေၚ်ညိဂှ်လေဝ် ဖတိုက်ဖအောဝ်လဝ်ရ။
လက်သန်ဂမ္တဴမသ္ကာတ်မြဟ် မပ္တံက္ဍိုပ်ဂိ၊ ဗၜူ၊ ဂမ္တဴတိုန်၊ ဍောၚ်ၜိုတ်အိုတ်ဓတ်တံ ကတဵုဒှ်ကၠုၚ်မ္ဂး လုပ်ဇူထောံ ပ္ဍဲကဵုဒၞာဲၜိုဟ်သြိုဟ်လဝဲါဂှ်တုဲ သုၚ်ထောံဍာ်ညိ၊ ယဝ်နွံပၟိက်ကၠုၚ်မ္ဂး အာဇရေၚ်ဌာနပရေၚ်ထတ်ယုက်မကြပ်တံဂှ်တုဲ ဒုၚ်လွဳလွတ်ထေက်ရ။
တၠပညာဗြဲကျာ ဥူဝေန်နာၚ်ဂှ် သၞာံ (၂၀၂၆) ဝွံ ဟိုတ်နူလာနဳညာသှေ်သၟေဟ်ဂှ်တုဲ “ဒှ်သၞာံဂမ္တဴမသ္ကာတ်မြဟ်ဂၠိုၚ်အိုတ်မာန်” သာ်ဝွံ ဂးတုဲ ဟိုတ်နူအသိၚ်ဂမ္တဴဂၠးတိသၠုၚ်တိုန်ဂှ်ရ ပ္ဍဲသၞာံဂမ္တဴဂၠိုၚ်အိုတ် (၄) သၞာံဂှ် အဆံၚ်တတိယဟေၚ်နွံမာန်ရောၚ် တော်ခယျလဝ် ပ္ဍဲမုက်လိက်ပရေၚ်မၞိဟ်ညးရ။
ဥတုရာသဳဂမ္တဴကၠုၚ်အလုံမွဲဂၠးတိဏံဂှ်ဝွံ ဟိုတ်နူပိုဲမၞိဟ်တံ စကာကၠုၚ် ကၠေၚ်စက်၊ ကၠေၚ်ပ္ဍေန် “စၞပၟတ်” ဂၠိုၚ်ကီု ကေုာံ ပ္တိတ်သၟုဟ်ဓာတ်ကာဗောန်ဂၠိုၚ်ကီုဂှ်ရ အသိၚ်သၠုၚ်တိုန်ကၠုၚ်တုဲ ပ္ဍဲကာလသၞာံအကြာတဏံဂမၠိုၚ်ဝွံ လပှ်ပသာန်ဂမ္တဴလေဝ် ကတဵုဒှ်ဂၠိုၚ်ကၠုၚ်မံၚ်ရောၚ် ဓမံက်ထ္ၜးလဝ် ပ္ဍဲလိက်သုတေသနကၟိန်ဍုၚ်နာနာရ။
