ပ္ဍဲကဵုဆေင်သွံကၠေင်ဗွဲမဂၠိုင်တအ်ဂှ် ဒးပြေင်ရေင်ၜေတ်ရာန်ကၠေင်မၞိဟ်ဂၠိုင်လောန်တုဲ မၞိဟ်ဒးလက္ကရဴတအ်ဂှ် ကၠေင်အိုတ်အာဂးတုဲ ဟိုတ်နူရာန်ကၠေင်ဟွံဂွံဂှ်ရ သၟာဒမြိပ်ကွဳလိုန်ဓာတ်သၠာပိဗွဲမဂၠိုင်တအ် ဒးဒေါံဇူလဝ်ကမၠောန်နွံရောင် တၠကွဳလိုန်ဓာတ်ဒမြိပ်လာင်နူဍုင်ဇြပ်ဗုမွဲတၠ ဟီုထ္ၜးရ။
“ဂွံလဝ်မၞိဟ်ဖိုဟ်လေဝ် ဂွံဒမြိပ်ဂှ် ကၠေင်ဟွံမွဲတုဲ ဒးဒေါံဇူလဝ်၊ အာပြေင်ရေင်ၜေတ်ကၠေင်ဂှ် ၜေတ်မံင်အရိုဟ်တ္ၚဲဖိုဟ်ရ၊ ဆဠဂွံ ဆဠဟွံဂွံ ဒှ်မံင်ဗီုဂှ်၊ ဇကုအာဒးလဇုဲအာညိတှ်ေ ဒးဍုတ်လက္ကရဴတေံတှ်ေ ဂွံစိုပ်အလန်ဇကုဂှ် ကၠေင်ဍေံအိုတ်အာယျ ဍေံဟီုတှ်ေ ဒးကလေင်ပၠန်၊ ၜေတ်ဂွံမွဲအလန်မှ ဆဠ ဂွံ (၁၀၀၀၀)၊ ဆဠ ဂွံ (၅၀၀၀) ရတှ်ေ ဂြိပ်ဂွံ ၜါပိလတုန် ကၠေင်အိုတ်အာပၠန်” သာ်ဝွံ နာဲထောန် ညးလိင်ဒမြိပ်ကွဳလိုန်ဓာတ်သၠာပိ (အိုဝေ) နူဍုင်ဇြပ်ဗုဂှ် ဟီုရ။
ပ္ဍဲတွဵုရးဍုင်မန်ဝွံ ကြဴနူကဵုရာန်ကၠေင်ဝါတ်တုဲ ကမ္မယှေန်ပၞာန်တအ် ပတိတ်ကၠုင်လိက်စၞောန် သၞောတ်ရာန်ကၠေင် စုံ-မ တုဲ ညးအာဖျာတအ်ကီု၊ ညးအာရုင်ဂဥုဲ ဗဒမ်ဂဥုဲတအ်ကီု၊ ညးအာကေင်ကာပရေင်မၞိဟ် ကေင်ကာမ္ၚဵုထပိုဲခမဳတအ်ကီု လိင်ဍိုက်ကၠုင် ကွဳလိုန်ဓာတ်သၠာပိ (အိုဝေ) ဂၠိုင်ကၠုင်ရ။
အတိုင်သၞောတ်ရာန်ကၠေင် စုံ-မ ဂှ် နူစတမ်တေံ ရာန်ကၠေင်ပြေပြံင်ဗၞတ်ဓမ္မတာကီုလေဝ် တ္ၚဲလအ်ကၠုင်ညိတုဲ မၞိဟ်ပြေင်ရေင်ၜေတ်ကၠေင်ဂၠိုင်တိုန်ကၠုင်၊ ကၠေင်ပ္ဍဲဆေင်ကၠေင်တအ် လေဝ် သှေ်အောန်စှေ် ဒးသွံကၠုင်နကဵုဗၞတ်ဗ္ၜတ်ကီုတုဲ ကွဳစက်ယာန်တအ် ဂွံဂွံကၠေင်ဂှ် ဝါတ်တိုန်ကၠုင်ရ။
“တဲကၠာၜါပိတ္ၚဲဂှ် ရာန်ကၠေင်ဟွံဝါတ်ကွေံကွေံ ဂြိပ်အာမံင်လၟေင်တ္ၚဲရ၊ တ္ၚဲလအ်တိုန်ညိ ရာန်ကၠေင်ဝါတ်တိုန်ညိ၊ လၟုဟ် မွဲၜါတ္ၚဲဏံတှ်ေ မၞိဟ်ၜေတ်ပြေင်ရေင်ရာန်ကၠေင်ဂၠိုင် ကွေံကွေံ၊ ဒးလက္ကရဴညိတှ်ေ ကၠေင်ဍေံအိုတ် ဍေံကၟာတ်ထောံရ၊ ဆေင်ဗွဲမဂၠိုင်ဂှ် မၞိဟ်ဂၠိုင်မံင်၊ မၞိဟ်လ္ၚဵုဂှ်တှ်ေ အာတိက်မင်မံင်အဂှ်၊ နူကဵုရာန်ကၠေင်ကေတ်ဝါတ်တိုန်တုဲဂှ် ကၠေင်ကၠတ်သွံမ္ၚးနွံ၊ ဆဂး မွဲဂါလာန်ဍေံ (၂၀) လဳတာဓဝ်ဂှ် (၃) ကိုဋ်ပြင်မံင်၊ ဇကုရာန်တုဲ ဒမြိပ်လာင်ဟွံကိတ်ရ၊ ဇှ်ရ ၜိုတ်ဍေံဒှ်ရ အကြာဏံ ဒးဒေါံဇူလဝ်ကၠာ ဗီုလဵုဂွံသ္ပ” သာ်ဝွံ နာဲတာတာ တၠကွဳလိုန်ဓာတ်သၠာပိ (အိုဝေ) မွဲတၠပၠန်ဂှ် ထပ်ဟီုရ။
အသိင်အလိုန်ပေါဲပၞာန် အမေရိကာန်၊ အေဿရေကဵု အဳရာန် ဒေသလဒေါဝ်ဗၟံက်တေံဂှ်ရ ဍုင်အာယှဗွဲမဂၠိုင် ကေတ်ကၠေင်ဝါတ်တိုန်တုဲ ကၟိန်ဍုင်ဗၟာလေဝ် ကမ္မယှေန်ပၞာန်တအ် ပ္တိတ်ကၠုင်စေဝ်ပၞောန်ရပ်စပ်သုင်စောဲကၠေင် နကဵုသၞောတ် စုံ-မ တုဲဂှ် ပ္ဍဲဆေင်ကၠေင်တအ် သွံကၠေင်အိုတ် ဂၠိုင်နူကဵုအခိုင်ဓမ္မတာတေံဏီရောင် တၠဆေင်သွံကၠေင်တအ် ဟီုဂးမံင်ဂှ် ဂွံမိင်ကေတ်ရ။
