ပ္ဍဲကွာန်နှေဟ်ကရေၚ်၊ ပွိုၚ်ဍုၚ်ရေဝ်၊ တွဵုရးဍုၚ်မန်ဂှ်ဝွံ ဂိတုဖေဖဝ်ဝါရဳ စၟတ်တ္ၚဲ (၂၃) တုဲကၠုၚ်တေံ ဥက္ကဌဂကောံဟံၚ်ပြာ်မၞိဟ်ကွာန်နှေဟ်ကရေၚ် ဥူဝေန်မျေအ်ဥူ ဒးဒုၚ်ရပ်လဝ်တုဲ စဵုကဵုလလအ်ပွိုၚ် (၇) တ္ၚဲ ဟွံဂွံအဆက်ဏီရောၚ် ညးစုက်လုက်ကဵု ဂကောံဟံၚ်ပြာ်မၞိဟ်တံ ဟီုကဵု IMNA ရ။

ကောန်သ္ဂံၚ်ဒပ်ကမ္မယှေန်ပၞာန် ထပက်လုပ်ကၠုၚ်ကရောၚ်ပၞာန် နကဵုဇြဟတ်ဗွဲမဂၠိုၚ် အပ္ဍဲကွာန်နှေဟ်ကရေၚ်ဂှ်ဝွံ ဂိတုဖေဖဝ်ဝါရဳ စၟတ်တ္ၚဲ (၂၂) တုဲကၠုၚ်တေံ ဒပ်ပံၚ်ကောံပၠန်ဂတးတံ ဗတိုက်ကဵု စက်ဗရုသာဲတုဲ တ္ၚဲယးဂတဂှ်ဝွံ နူဂကောံကရောၚ်ပၞာန်ကမ္မယှေန်ပၞာန် ကၠောန်သ္ပပသောၚ်ဒၟံၚ်တိဍာ်တံ လုပ်စိုပ်ရပ်ဏာ ဥူဝေန်မျေအ် စဵုကဵုပ္ဍဲသ္ၚိရ။

နကဵုဟိုတ်ဖဵုသာ်လဵု ရပ်စိုပ်ဏာဂှ် ဟွံဂွံတီကေတ်တုဲ ကဵုသ္ၚိကၟိန်ဂှ်လေဝ် ပရေၚ်ဆက်ဆောံ ပိုတ်သ္ကုတ်မံၚ်ရောၚ် ညးစုက်လုက်ကဵု ဂကောံဟံၚ်ပြာ်မၞိဟ်နှေဟ်ကရေၚ်မွဲတၠ ဟီုရ။

“နူတနေံဏံ ဂၠိုက်ဂၠာဲ သၟာန်သၟုက်ဏာဂှ်တှေ် ကောဝေန်မျေအ်ဥူဂှ် စိုပ်မံၚ်ဍုၚ်ရေဝ် ဂးရ။ ဆဂး အလဵုမံၚ်ဒၟံၚ် အလဵု၊ အကာဲအရာဗီုလဵုနွံဂှ် ဟွံဂွံတီကေတ်ဏီရ။ လ္ပာ်ဒပ်ပၞာန်လေဝ် မုအဆက်လေဝ် ဟွံကဵုပုဟ်” သာ်ဝွံ ညးစုက်လုက်ကဵု ဂကောံဟံၚ်ပြာ်မၞိဟ်ဂှ် ဟီုရ။

ဗွဲကြဴဒးဒုၚ်ရပ်ဏာတုဲဂှ်မ္ဂး ဥူဝေန်မျေအ်ဥူဂှ် ပလံၚ်ဗ္စိုပ်ဏာ ဍုၚ်ရေဝ်ရောၚ် ဂွံလဝ်ပရိုၚ်ဗွဲကိုပ်ကၠာကီုလေဝ် စဵုကဵုအခိၚ်တ္ၚဲဏံ ဒၞာဲထိၚ်ဒဝ်လဝ် ချိုတ်ချိုတ်ပၠိုတ်ပၠိုတ်ဂှ်ကဵု အကာဲအရာ ပရေၚ်ထုက်ယုက်ဂှ် ဟွံဂွံတီကေတ်ဏီရ။

ပ္ဍဲကဵုပေဲါမ္ၚဵုထပ်တဲ ဥူဝေန်မျေအ်ဥူ ဂိတုနဝ်ဝေမ်ဗာတုဲကၠုၚ်တေံဂှ်ဝွံ ဟိုတ်နူဂကောံပၠန်ဂတးတံ ကၠုၚ်စိုပ်ဘိုၚ်ကဵုလဝ်ရီုဗၚ်တုဲ နကဵုတၚ်စောတ်စောဲ ဆေၚ်စပ်ကဵု ဒပ်ပၠန်ဂတးတံဂှ်လေဝ် ဒးဒုၚ်ရပ်ဒှ်မာန်ရောၚ် ဂးရ။

“အကြာဒပ်ပၠန်ဂတးတံကဵု ဒပ်ကမ္မယှေန်ပၞာန်တံ ဒှ်ပေဲါဗ္တိုက်ပ္ဍဲသၞေဟ်ကရေၚ်တုဲ တ္ၚဲယးဂတဂှ်ရ လ္ပာ်ဒပ်ပၞာန်တံ ကၠုၚ်ရပ် ဥူဝေန်မျေအ်ဥူ ပ္ဍဲသ္ၚိညးရ။ မုပဂွံရပ်ရောဟီုတှေ် ညးဆက်ဆောံမံၚ်ကဵု ဒပ်ပၠန်ဂတးတံဏောၚ် စောတ်စောဲလဝ်ရ” သာ်ဝွံ ညးစုက်လုက်ကဵု ဂကောံဟံၚ်ပြာ်မၞိဟ်ဂှ် ဟီုရ။

ဂကောံဟံၚ်ပြာ်မၞိဟ်နှေဟ်ကရေၚ်တံဝွံ သွက်ညးဒေသ နွံပၟိက်ရီုဗၚ်ကာတၟေၚ် အပ္ဍဲပွိုၚ်ဍုၚ်ဇြပ်ဗုကဵု ရေဝ်ဂှ် ရေၚ်တၠုၚ်ကဵုမံၚ်ရီုဗၚ်တုဲ အခိၚ်လၟုဟ်ဏံ ဥက္ကဌဂကောံ ဒးဒုၚ်ရပ်လဝ်ကီုလေဝ် လၟေၚ်ကမၠောန်ပရေၚ်ဟံၚ်ပြာ်ဂမၠိုၚ်ဂှ် ဆက်ကၠောန်သ္ပ ရေၚ်တၠုၚ်ဒၟံၚ်ဖိုဟ်ရောၚ် ဂွံတီကေတ်ရ။

ပ္ဍဲဂိတုဖေဖဝ်ဝါရဳ စၟတ်တ္ၚဲ (၂၂) တုဲကၠုၚ်တေံ ကရောၚ်ပၞာန်ကမ္မယှေန်ပၞာန် ဇြဟတ်ၜိုတ် (၁၅၀) လုပ်စိုပ်ကၠုၚ် အပ္ဍဲကွာန်နှေဟ်ကရေၚ်ဂှ် ဒပ်ပၠန်ဂတးဍုၚ်မန် MSRF ကဵု ဒပ်ကောဒေံစက်ဗရုသာဲတံ ဗ္တိုက်ထောံဖျေံမခတိုဟ်ကဵု စက်ဗရုသာဲရောၚ် ဒပ်ပၠန်ဂတးဍုၚ်မန် MSRF လလောၚ်ပ္တိတ်လဝ်ရ။

ကောန်သ္ဂံၚ်ဒပ်ကမ္မယှေန်ပၞာန် ထ္ပက်လုပ်စိုပ်ကၠုၚ်ကရောၚ်ပၞာန် အပ္ဍဲကွာန်ပွိုၚ်ဍုၚ်ရေဝ်ကဵု ဂၠံၚ်ဇၞော် စၟတ် (၈) ဂှ်ဝွံ ကပေါတ်မၞုံၚုဟ်မး ညးဒေသတံဂှ် ကေတ်ဏာဗွဲအဓမ္မကီု၊ ညးဒေသ ပ္ဍဲကွာန်ဒပ်ကမ္မယှေန်ပၞာန်တံ ဒးဒုၚ်ဗ္တိုက်ဂှ်လေဝ် ပွမဘပဠကီု ရပ်စပ်ကီု ကၠောန်သ္ပမံၚ် အဆက်ဆက်နွံဂှ် ဂွံတီကေတ်ရ။