တၞဟ်နသ္ဂောံဒှ်ဟေန်ဆာဲကဵု ကၠေင်ဓါတ်၊ ကၠေင်ပ္ဍေန်ဂမၠိင်မာန်တုဲ တၠကွဳစက်ပူဂဵုတအ် ဒးစကာသၞောတ် ဒဳမွဲတ္ရဲ၊ ဇူမွဲတ္ရဲရောင် တ္ရဲဏအ် (ဂိတုမာတ် ၃၊ သၞာံ ၂၀၂၆) ဂှ် ကမ္မယှေန်ပၞာန် လလောင်ပ္တိတ်လိက်ကဵုသတိမွဲတၞးရ။
ကိစ္စဏအ်ဂှ် ဆက်စပ်ဒၟံင်ကဵုအသိင်ပေါဲပၞာန် ဍုင်အဳရာန်တုဲ တင်နင်လလောင်ကဵုလဝ်သတိတအ်ဂှ် စပ္တံနူစၟတ်တ္ရဲ (၇)၊ ဂိတုမာတ်ဏအ် လုပ်အဝေါင်ရောင် ဂးလဝ်ရ။
ပ္ဍဲကဵုစၟတ်တ္ရဲ မဂၞန်စုမ် ဥပမာ မပ္တံကဵု (စၟတ်တ္ရဲ ၂- ၄- ၆- ၈) တအ်မ္ဂး အက္ခရ်မဂၞန်ကွဳစက်စုမ် မပ္တံကဵု (2A/—– 4A—–) တအ် ဒဳဂွံတုဲ တ္ရဲယးမ္ဂး ဒးဒေါံဇူကဵုရောင်။ သာ်ဂှ်ကီု ပ္ဍဲကဵုစၟတ်တ္ရဲစုမ်ဟွံသေင် မပ္တံကဵု (၁- ၃- ၅- ၇) တအ်မ္ဂး ကွဳစက်မၞုံကဵုအက္ခရ် မပ္တံကဵု (1A/—– 3A/—–) တအ် ဒဳဂွံတုဲ တ္ရဲယးမ္ဂး ဒးဇူကဵုပၠန်ရောင် ချူလဝ်ရ။
တုဲပၠန် လဂွံကဵုလိက်လလောင် ကမ္မယှေန်ပၞာန်တအ် ပ္တိတ်လဝ်ဂှ်မ္ဂး သ္အာင်နူကွဳစက်ဂကူ EV တုဲ ကွဳစက်၊ ကွဳလိုန်ဓါတ်ပူဂဵုအိုဿီု ပါလုပ်ရောင်။
ပ္ဍဲကဵုဏအ်ဂှ် ကွဳစက်ဒမြိပ်လာင် သွက်ညးဍုင်ကွာန်ဂမၠိုင်၊ ကွဳစက်လိင်ဒမြိပ်စဂမၠိုင် (Taxi)၊ ကွဳစက်ယိုက်ပလံင်ကၠေင်စက်ဂမၠိုင်၊ ကွဳစက်မစကာသွက်ပရေင်ကမၠောန်သိုင်ခၞံဂမၠိုင်၊ ကွဳစက်ပလံင်ကပေါတ်ဂမၠိုင်၊ ကွဳစက်ဖ္ဍိုက်မၞိဟ်ယဲ/ ကွဳစက်နိဗ္ဗာန်ဂမၠိုင်ကဵု ကွဳစက်ကပှ်သီခၟိက်တအ် ဟွံလုပ်အဝေါင်ရောင် ချူဓမံက်လဝ်ရ။
ပေါဲပၞာန် အကြာဍုင်အဳရာန်ကဵု အမေရိကာန်-အေဿရေဂှ် စဒှ်ကၠုင်မံင်နူဂိတုဖေဖဝ်ဝါရဳ (၂၈) တေံတုဲ စဵုကဵုတ္ရဲဏအ်ဂှ် ဆက်သ္ကာတ်မြဟ်မံင်ဖိုဟ်ရောင် ဂွံတီကေတ်ရ။
