ဒပ်ဆီမန် (Mon Blood Army) မဒက်ပ္တန်လဝ် နကဵုဇြဟတ်သၟတ်မန် အခိင်ခြာဟွံလအ်ဏံဂှ်ဝွံ လ္တူနူကိစ္စပရေင်ဍုင်ကွာန်ဂှ် ကဵုအာဖျုန်ပရေင်ပၞာန်ရောင်တုဲ ဇြဟတ်ကောန်သ္ဂံင်ဂမၠိုင်ဂှ်လေဝ် ဗပေင်အာရောင် ဟီုကဵုဌာန်ပရိုင်ဗၠးၜးမန် IMNA ရ။
အကြာဂကောံပၠန်ဂတးမန် မတဝ်စၞေဟ်မံင်ကဵု တၠအဝဵုပၞာန်တံဂှ်မ္ဂး ဒပ်ဆီမန်ဝွံ မဒက်ပ္တန်လဝ် နကဵုဇြဟတ်သၟတ်မန် မၞုံအာယုက် အကြာ (၁၈ – ၃၅) သၞာံ၊ ပ္ဍဲဂိတုဒဳဇြေမ်ဗာ (၂၈)၊ သၞာံ (၂၀၂၅) တုဲကၠုင်ဏံရ။
ၜိုန်ကဵုဖျုန်ကုပရေင်ပၞာန်ဟီုကီုလေဝ် ဟိုတ်နူတေင်နွံပၟိက် ဇြဟတ်မၞိဟ်၊ ဇြဟတ်လွဟ်လနက်နာနာတုဲ အခိင်လၟုဟ်ဏံ ဓမံက်ဒမံင်ပေဲါဗ္တိုက် ပရေင်ပြုပြေင်ပၞာန်ဒမၠုက် ကရောံဂကောံဒပ်မဟာမိတ်တံရဂှ် ညးမၞုံအခေါင်ဟီုဂး ဒပ်ဆီမန် ယဿနန် ဟီုကဵုဌာန်ပရိုင်ဗၠးၜးမန်ရ။
“လ္တူနူကဵုပရေင်ဍုင်ကွာန်ဂှ် ကဵုအာဖျုန်ပရေင်ပၞာန်ဟေင်ရ။ လၟုဟ်လေဝ် ပ္ဍဲကဵုပိုဲတံ ဇြဟတ်မၞိဟ်၊ ဇြဟတ်လွဟ်လနက် ဍိုန်လျမံင်ဏီ။ ဟိုတ်ဂှ်ရ နကဵုသၞောတ်ဒမၠုက် လုပ်အာပေဲါဗ္တိုက် ကရောံဒပ်မဟာမိတ်တံကၠာရ။ လ္ပါ်ရေဝ်ဂှ်လေဝ် ပံက်လဝ်မုက်ပၞာန် ကရောံဒပ်မဟာမိတ်တံနွံရ” သာ်ဝွံ ယဿနန် ဟီုရ။
ပ္ဍဲဂိတုအေဗရဴ စၟတ်တ္ၚဲ (၄) တုဲကၠုင်ဏံ ဒပ်အမၠံက် (၃၁၆) ကမ္မယှေန်ပၞာန် မၞုံဗဒဲါကွာန်ကလအ်၊ ပွိုင်ဍုင်ရေဝ်ဂှ် ဒပ်ဆီမန် သၟတ်မန်က္ဍိုက်က္ဍိုပ်တံ ပန်ဗ္တိုက်ကဵုလွဟ်ဇၞော်ရ။
ဒပ်ပၠန်ဂတးသၟတ်ဂမၠိုင်က္ဍိုက်က္ဍိုပ်တံဝွံ တိုင်ပ္ကဴပရေင်ဍုင်ကွာန် မရန်တၟံလဝ်ဂှ် စိုပ်ဗွဲမပြဟ်ရောင်ပတှ်ေကေတ်ဂှ်ရ သၟဝ်ယၟုဒပ်ဆီမန် (Mon Blood Army) ဂှ် ဒက်ပ္တန်လဝ် ဒပ်သၟတ်မန်ရောင် ဂးရ။ သွက်သ္ဂောံဒက်ပ္တန် ဖေဝ်ဒရေဝ်ဒဳမဝ်ကရေဇြဳ ကေုာံ ပရေင်ဗၠးၜးဂှ် သၟတ်တံ ရေင်တၠုင်မာန်ရောင်ဂှ် ထ္ၜးအာသက်သဳ ဂတမုက်ညးဍုင်ကွာန်ဂမၠိုင်တံရောင် ယဿနန် ဟီုရ။
“ဒပ်ပိုဲဂှ် ဒှ်ဒပ်သၟတ်ဍိုက်ဍိုက်ပေင်ပေင်ဂှ်ရ သၟတ်တံဟေင် ဍိုက်ဍိုပ်တုဲ ပ္ဍဲဂကောံကမ္မတဳဂှ်လေဝ် အကြာအာယုက် (၁၈) ကဵု (၃၅) ဟေင်နွံရ။ သၟတ်ပိုဲတံဂှ် ဒှ်အဓိကတုဲ ပိုဲတံလေဝ် ကၠောန်မာန်ဏောင်ဟီုဂှ် မိက်ဂွံထ္ၜးသက်သဳကဵု ညးဇၞော်တံ၊ ညးဍုင်ကွာန်တံရ။ သၟတ်တံ ကၠောန်မံင်ပၠန်ဂတးဟီုဂှ် မိက်ဂွံအခေါင်ဗၠးၜးရ။ မိက်ဂွံဒက်ပ္တန် ဖေဝ်ဒရေဝ်ဒဳမဝ်ကရေဇြဳ ၜိုတ်ဏံရ။ သၞပိုဲတံဂှ်တှ်ေ တၠအဝဵုပၞာန်မွဲဟေင်ရ” သာ်ဝွံ ဟီုရ။
နကဵုဒပ်ဆီမန်ဝွံ ဇြဟတ်ပၞာန်သ္ဂောံခိုင်ဗိုန်ဂှ်မ္ဂး သၟတ်မန် မၞုံပ္ဍဲဒေသနာနာတံ သွက်ဂွံပံင်ကောံပါလုပ်ပ္ဍဲဒပ်ဂှ် နကဵုနဲဇဳ ဆဝ်မ္ၚုဟ်စန္ဒက်မံင်နွံရဂှ်လေဝ် ဂွံတီကေတ်ရ။
အခိင်လၟုဟ်ဏံ ပ္ဍဲကဵုဒေသဆက်စပ်မန်ဂှ်ဝွံ သွက်ဂွံဒက်ပ္တန် ဖေဝ်ဒရေဝ်ဒဳမဝ်ကရေဇြဳ ကေုာံ တၠအဝဵုပၞာန်ဂွံအိုတ်အးအာဂှ် ဂကောံဇြဟတ်ပၠန်ဂတးမန် ဗော်ဍုင်မန်တၟိ ဗတိုက်သရိုဟ်တၠအဝဵုပၞာန် NMSP-AD ကဵု ဒပ်ပၞာန်ဗၠးၜးဍုင်မန် MLA တံ ပ္ဍဲဂိတုမေ (၂၅)၊ သၞာံ (၂၀၂၅) တုဲကၠုင်ဏံဂှ် ပံင်ကောံနဒဒှ် ဒပ်မန်ရာမည RMA တုဲ ချဳဓရာင်မံင် ပရေင်ပၞာန်နွံရ။
ဒပ်ပၠန်ဂတးဍုင်မန် (MSRF) ကဵု ဒပ်ပံင်ကောံမဟာမိတ်တံဝွံ အဓိက ချဳဓရာင်မံင် ပရေင်ပၞာန် ပ္ဍဲသ္ကုတ်သၠုင်ကျာ တွဵုရးဍုင်မန်ရ။ ပ္ဍဲသၞာံ (၂၀၂၆) ဏံ သၠုင်ပ္တိုန်အသိင် ဓမံက်ရုပ်ရဴပရေင်ပၞာန်တုဲ ပ္ဍဲပွိုင်ဍုင်ရေဝ်ဂှ် ပေဲါဗ္တိုက်သ္ကာတ်မြဟ်မံင်ရ။
