သ္ကုတ်ဂၠံၚ်ဇၞော်ဗိက်-ထဝဲါ၊ စၟတ် (၈) ဂှ်ဝွံ ကဵုအခေါၚ်အာကၠုၚ် ပွိုၚ် (၃) တ္ၚဲတုဲ စပ္တံနူဂိတုမာတ် စၟတ်တ္ၚဲ (၃၁) တုဲကၠုၚ်ဏံ က္လေၚ်တၟာတ်ထောံ အခေါၚ်အာကၠုၚ်ပၠန်ယျရောၚ် ဂွံတီကေတ် နူတမ်ရိုဟ်ပရိုၚ်အပ္ဍဲဒေသရ။
ပ္ဍဲကဵုမွဲဒမြိပ်သ္ကုတ်ဂၠံၚ်ဗိက်-ထဝဲါဂှ်ဝွံ သၟာၚ်နူကတဵုဒှ်ပေဲါဗ္တိုက်တုဲ လ္ပာ်ဒပ်ကမ္မယှေန်ပၞာန်တံ ပန်ကဵုလွဟ်ဇၞော်၊ ထောံဖျေံဗမ်ကဵုက္ၜၚ်ကျာဂှ်ရ နကဵုအကာဲအရာဂီုကၠီုတုဲ စပ္တံနူဂိတုဖေဖဝ်ဝါရဳ (၁၀) ဂှ် လ္ပာ်ဂကောံဒပ်ပၠန်ဂတးတံ တၟာတ်ထောံ အခေါၚ်တတ်ကၠောံ အာကၠုၚ်ရ။
ဗွဲကြဴနူတၟာတ်ထောံ ပွိုၚ်မွဲဂိတုပြၚ်တုဲဂှ်မ္ဂး ပ္ဍဲဂိတုမာတ် (၂၇) တုဲကၠုၚ်ဏံ ဂကောံဒပ်ပၠန်ဂတးတံ က္လေၚ်ကဵုအခေါၚ်အာကၠုၚ် ပ္ဍဲသ္ကုတ်ဂၠံၚ်ဂှ်ရ။ ဆဂး ပံက်ဂွံပွိုၚ် (၃) တ္ၚဲတုဲ ပ္ဍဲဂိတုမာတ် (၃၁) ဂှ် က္လေၚ်တၟာတ်ထောံ အခေါၚ်အာကၠုၚ်ရ။
“အကာဲအရာလေဝ် ဟွံခိုဟ်ပုဟ်ဟီုတှေ် က္လေၚ်ကၟာတ်ထောံဂှ် ဟွံတၟေၚ်ပုဟ်လေဝ်။ ပိုဲတံ ကုသဵုခိုဟ်တုဲ ပ္ဍဲကဵုတ္ၚဲပံက်ဂှ် စှေ်လ္ပာ်ဗိက်ဂတာပ်အာ။ ဟဂှ်ဟွံသေၚ်တှေ် ထပ်ကၟာတ်ဆိုအ်မံၚ်လ္ပာ်တေံပၠန်” သာ်ဝွံ ညးဗြဴဒေသဂှ်မွဲတၠ ဟီုရ။
သွက်ဂွံတီအကာဲအရာ ပရေၚ်ပၞာန်မွဲဒမြိပ်သ္ကုတ်ဂၠံၚ်ဂှ်ကဵု ကိစ္စက္လေၚ်တၟာတ်ထောံ အခေါၚ်အာကၠုၚ်သ္ကုတ်ဂၠံၚ်ဗိက်-ထဝဲါမာန်ဂှ် နူကဵုဌာန်ပရိုၚ်ဗၠးၜးမန် ကေတ်အဆက်သၟာန်သၟုက်ဏာ ဇရေၚ်ညးတာလျိုၚ်ဂကောံပၠန်ဂတးတံကီုလေဝ် စဵုကဵုအခိၚ်လၟုဟ် ဟွံက္လေၚ်ပရိုၚ်ဏီရ။
ဗွဲကြဴနူဂကောံဒပ်ပံၚ်ကောံပၠန်ဂတးတံ ဗ္တိုက်သီကေတ် ဗဒိုပ်ဒပ်ဝေန်ဝ မၞုံလ္တူဂၠံၚ်ဇၞော် စၟတ် (၈)၊ ဗိက်-ထဝဲါ၊ ပွိုၚ်ဍုၚ်တယျက်ချံၚ်တုဲဂှ် လ္ပာ်ဒပ်ကမ္မယှေန်ပၞာန်တံ ပန်ဗ္တိုက် ထောံဖျေံမံၚ်ဗမ်ကဵု က္ၜၚ်ကျာ ဇၟာပ်တ္ၚဲရ။
