ပ္ဍဲတွဵုရးဍုင်မန်ဝွံ အပ္ဍဲအခိင်ကာလအတးသၚ်္ကြာန်ဏံ မုပေဲါသဘင်မိပ်ဇြိပ်သာ်လဵုမွဲဟွံဟီု နူလ္ပါ်ကမ္မယှေန်ပၞာန်တံ ကဵုလဝ်အခေါင်တုဲ သွက်ဂွံကၠောန်ဗဒှ် မိပ်မိပ်ဇြိပ်ဇြိပ်ဂှ် ကဵုမံင်ဇြဟတ်ရောင် အတိုင်ညးစုက်လုက်ကဵု ဂကောံအုပ်ဓုပ်ကွာန်/အရာပ်တံ ဟီုဂးလဝ်ဂှ် ဂွံတီကေတ်ရ။
သဘင်အတး ကေုာံ ပေဲါမ္ၚဵုသ္ပကုသဵုကဵုဒါန်လၟုဟ်ဏံဂှ် ညးဒေသမန်တံ မိက်ဂွံကၠောန်ဗဒှ် ပေဲါသဘင်မိပ်မိပ်ဇြိပ်ဇြိပ်ဂၠိုင်တုဲ သွက်သ္ဂောံဂွံအခေါင်ဂှ်မ္ဂး နူသ္ကိုပ်အုပ်ဓုပ်ကွာန်/ အရာပ်မွဲတဆင့် အာတ်မိက်ဇရေင် သ္ကိုပ်အုပ်ဓုပ်ပွိုင်ဍုင် (ဝါ) ဌာန်ဂအုပ်ပၞာန် ရးအဂၞဲမတ်မလီုဂှ်ရောင် ဂွံတီကေတ်ရ။
ညးတာလျိုင်ဌာန်ဂအုပ်ပၞာန်ရးအဂၞဲမတ်မလီုတံဝွံ အစဳဇန်လဟိင်စိုတ် ကေုာံ ပေဲါသဘင်ဂမၠိုင် ညံင်ဂွံကၠောန်ဗဒှ် မိပ်မိပ်ဇြိပ်ဇြိပ်ဂှ် ကဵုဇြဟတ်တုဲ နွံပၟိက်မ္ဂး သီုကေတ်ကဵုတာလျိုင်ဂီုကၠီုရောင် ဟီုဂးလဝ်ရဂှ် ညးစုက်လုက်ကဵု ဂကောံအုပ်ဓုပ်မွဲတၠ ဟီုရ။
“သတ္တဟတုဲကၠုင်ဏံရ ကၠောန်ဗဒှ် ပေဲါဂဳတဍောတ်ဍောတ်မွဲဏောင် အာဟီုကဵု ညးတာလျိုင်ဌာန်ဂအုပ်ပၞာန်ရးအဂၞဲရ။ ညးတံဟီု ကၠောန်ဗဒှ်ပေဲါဇၞော်ဇၞော်၊ ကၠောန်ကၠိုဟ်ဗ္တံလေဝ်ဂွံ၊ အတိုင်ပၟိက်စိုတ် ဂးရ” သာ်ဝွံ ဟီုရ။
သဘင်အတးသၚ်္ကြာန်မတ်မလီု သၞာံဏံလေဝ် မွဲဒမြိပ်ဂၠံင်ဇိုင်ၜဳ ကေုာံ ကၠအ်ပ္ကဴမဝ်ရဝတဳ ဏံ သွက်ဂွံကၠောန်ဗဒှ် မိပ်မိပ်ဇြိပ်ဇြိပ် နကဵုကၞာထးဇၞော်ဇၞော်ဂှ် နူဂကောံအလဵုအသဳတၟိ တွဵုရးဍုင်မန်တံ ပလေဝ်ပလေတ်ဒမံင်တုဲ နကဵုအစဳဇန်လဟိင်စိုတ် သၟာဒယှေ်ဒွက်ဒယှ် အလုံဍုင်တံ၊ စၞစအခိုက်ကၞာန်မန်တံဂှ်လေဝ် ကၠောန်ဗဒှ်အာရောင်။
သဘင်အတးသၚ်္ကြာန် မကၠောန်ဗဒှ် ပ္ဍဲလ္တူဍုင်ဂှ်လေဝ် သၞာဲဒဴဌာနမဆေင်စပ်တံ သ္ဂောံပါ လုပ်ဂှ် ကဵုမံင်ဇြဟတ်ဓရိုဟ်ရောင် ဂွံမိင်ကေတ်ရ။
ပ္ဍဲတွဵုရးဍုင်မန် ဓမံက်ရုပ်ရဴပေဲါဗ္တိုက်အောန်ဏံဂှ်ဝွံ သွက်ဂကောံကမ္မယှေန်ပၞာန်မ္ဂး ဒှ်ဒၞာဲတြးဝါဒခိုဟ်အိုတ်မွဲတုဲ နူကဵုဝိုင်ဝေင်ဇျှင်လံင်သြန်တံလေဝ် ဒှ်ပၞော်သြန်လုပ်ခိုဟ်အိုတ်မွဲဒၞာဲရ။
ဆဂး ဟိုတ်နူပဋိပက္ခရပ်လွဟ်တုဲ ပရေင်မၞိဟ်ချိုတ်ဂျိုင်ကဵု ပရေင်ဒးဘဲဝပ် နွံမံင်ဇၟာပ်တ္ၚဲဂှ်ရ ဒၞာဲမၞိဟ်ကောံကလောံဂမၠိုင်ဂှ် ၜိုတ်သ္ပမာန်ဝေင်ပဲါတုဲ အပ္ဍဲကာလအတးသၚ်္ကြာန်ဏံ အာကၠုင်နကဵုသတိဂီုကၠီုညိဂှ်လေဝ် ကောန်ဂကောံဟံင်ပြာ်မၞိဟ် နူပွိုင်ဍုင်ရေဝ်မွဲတၠ ဟီုဂးဖတိုက်ဖအောဝ်လဝ်ရ။
“ဗီုကဵုအခိင်လၟုဟ်ဏံ ကၠောန်ပေဲါသဘင်တှ်ေ လ္တူနူကဵုမိပ်ဂှ် ဒးဂွိင်ဂၠိုင်မံင်ရ။ ပရေင်ဂီုကၠီုနွံဂးကီုလေဝ် လွဟ်ဇၞော်စှ်ေ ဒှ်ပေဲါဗ္တိုက်ဏောင်ဟီုတှ်ေ ဗီုလဵုဂွံပ။ ဒစးဒုင်စွံသတိတုဲ မံင်စံင်အာကၠုင်ထေက်ရ” သာ်ဝွံ ညးဟီုရ။
ဂကောံကမ္မယှေန်ပၞာန်တံဝွံ စဵုကဵုတ္ၚဲဏံ လ္တူညးဍုင်ကွာန်တံဂှ် ကရောင်ပၞာန်ဗလးတိသၟးဟွံက နူကဵုဍာန်ကျာမွဲတဆင့် စွံပွန်ဗ္တိုက်ဒမံင် ဘာဗ္တောန်လိက်၊ ဘာလကျာ် ကေုာံ သၟိဒမံင်ညးဍုင်ကွာန်တံဖိုဟ်ရ။
အပ္ဍဲတ္ၚဲသဘင်အတးသၚ်္ကြာန် သၞာံ (၂၀၂၅) တုဲကၠုင်ဏံဝွံ ပ္ဍဲကဵုကွာန်ဆက်စပ်မန်-ကရေင်ဂှ် ဒးဒုင်ပန်ကဵုလွဟ်ဇၞော်တုဲ ကောန်ၚာ်ပါလုပ်ကီု သီုဖအိုတ် ညးဗြဴၜါတၠ ဒးအာဘဲဝပ်ချိုတ်ဂျိုင်ဏီရ။
