ပ္ဍဲသ္ကုတ်ဂၠံင်ယေန်ဒံင်-ကွာန်လှာ၊ ဂၠံင်ဇၞော် စၟတ် (၈)၊ ပွိုင်ဍုင်မုဟ်ဍုင်၊ တွဵုရးဍုင်မန်ဂှ် တ္ၚဲဏံ ဂိတုအေဗရဴ (၁၀)၊ အခိင်နူဂယးဏံ ကတဵုဒှ်ပေဲါဗ္တိုက်ၜါလ္ပါ်တုဲ လ္ပါ်မ္ၚးကွာန်ဂှ် သီုကဵုလွဟ်ဇၞော်ဒတုံခတိုဟ်မံင်နွံရောင် ဂွံတီကေတ် နူတမ်ရိုဟ်ပရိုင်မုဟ်ဍုင်ရ။
တ္ၚဲဏံ အခိင်နူဂယး ၜိုတ် (၈) နာဍဳကဝက်ဂှ်ရ ပ္ဍဲသ္ကုတ်ဂၠံင်ယေန်ဒံင်-ကွာန်လှာဂှ် ဂကောံဒပ်ကမ္မယှေန်ပၞာန်ကဵု ဂကောံဒပ်ပၠန်ဂတး မချဳဓရာင်မံင်အပ္ဍဲဒေသတံ ကတဵုဒှ်အာပေဲါဗ္တိုက် ၜိုတ် (၂၀) မိနေတ်ရဂှ် ညးဗြဴ နူဒေသဂှ်မွဲတၠ ဟီုရ။
“တ္ၚဲဏံ အခိင်နူဂယး ၜိုတ် (၈) နာဍဳကဝက်ဂှ် ဒှ်ပန်ပှော်ညးသ္ကံရ။ မွဲလ္ပါ်ဓဝ်ဟွံသေင်ပုဟ်။ ရမျိုင်လွဟ်ဂှ် ဗီုကဵုပန်မံင် သီုလ္ပါ်တေံ လ္ပါ်ဏံရ။ ပန်မံင် သီုလွဟ်ဇၞော် လွဟ်ဍောတ်ရ။ လွဟ်ဇၞော်ဂှ် ဒတုံအာမ္ၚးကွာန်ရ။ ညးမွဲဟွံဒးပုဟ် ထေင်ကေတ်ရ။ ပေဲါဗ္တိုက်ဂှ်တှ်ေ ဒှ်အာ ၜိုတ် (၂၀) မိနေတ်” သာ်ဝွံ ညးဟီုရ။
အခိင်ဒှ်မံင်ပေဲါဗ္တိုက်ၜါလ္ပါ်ဂှ်ဝွံ လ္ပါ်ဒပ်ကမ္မယှေန်ပၞာန်တံ ပန်ကဵုလွဟ်ဇၞော် ဟွံအောန်နူ (၃) ဝါတုဲ ဒတုံခတိုဟ်အာ လ္ပါ်မ္ၚးကွာန်ယေန်ဒံင်ရ။
ပ္ဍဲဂိတုအေဗရဴ စၟတ်တ္ၚဲ (၄) တုဲကၠုင်ဏံဂှ်လေဝ် ပ္ဍဲသ္ကုတ်ဂၠံင်ဇၞော် စၟတ် (၈)၊ ပွိုင်ဍုင်မုဟ်ဍုင် အကြာကွာန်ယေန်ဒံင်ကဵု ကွာန်လှာ ဒၞာဲဒပ်ပၞာန်ဗၟာဖျေံလဝ်ဗဒိုပ် ပ္ဍဲဇြပ်မွဲဒၞာဲဂှ် နူဒပ်မန်ရာမည (RMA) လုပ်စိုပ်ပန်ပှော်ဏာတုဲ ကောန်သ္ဂံင်ဒပ်ပၞာန်ဗၟာ ပြဟ်လလုဲ (၁) တၠ၊ ဒးအာဘဲဝပ် (၃) တၠရ။
ဂကောံကမ္မယှေန်ပၞာန် ဒးဂိဒမံင်အကြာပွဳဗွိုင်သ္ကုတ်ဂၠံင်ဏံဂှ်ဝွံ ဍေံတံ သွက်သ္ဂောံက္လေင်ပလန်နွံဂှ်ရ ညးဍုင်ကွာန်တံ အာကၠုင်စွံသတိညိဂှ်လေဝ် ဟီုဂးလဝ်နွံရ။
“ကၠာတေံ ဒှ်အာပေဲါဗ္တိုက်ဂှ်တှ်ေ လ္ပါ်ဒပ်ပၞာန်တံ ဒးဂိဂၠိုင်ရ။ ဟိုတ်ဂှ်ရ ဍေံတံဟီုလဝ်ကဵု ညးဒေသတံ ဍေံတံက္လေင်ပလန်ဏောင်။ မံင်ကဵုသတိညိ။ တုဲတှ်ေ အကြာဏံ ဍေံတံ ထပ်ဗပေင်လဝ်ဇြဟတ်ရ။ ဂေတ်ကၚ်လေဝ် ဆက်မံင်” သာ်ဝွံ ညးဗြဴနူဒေသဂှ် ထပ်ဟီုလဝ်ရ။
ဟိုတ်နူလုပ်စိုပ်ဗ္တိုက်ဒမံင် မွဲနှေံမွဲနှေံဂှ်ရ အပ္ဍဲကွာန်ယေန်ဒံင်၊ ကွာန်လှာဂှ် နူဂကောံကမ္မယှေန်ပၞာန်တံ ထပ်ဗပေင်လဝ်ဇြဟတ်ပၞာန်တုဲ အပ္ဍဲကွာန် ကေုာံ ဗဒဲါပွဳဗွိုင်တံဂှ် ပတေင်လဝ်ဂီုကၠီုဗွဲတၟေင်ရဂှ်လေဝ် ဂွံတီကေတ်ရ။
ဂိတုအေဗရဴ စၟတ်တ္ၚဲ (၇) တုဲကၠုင်ဏံဂှ်လေဝ် ဒပ်မန်ရာမည (RMA) ကေုာံ ဂကောံဒပ်ပၠန်ဂတးတံ လုပ်စိုပ်ဗ္တိုက်လဝ် ဗဒိုပ်ဒပ်ပၞာန်ဗၟာ ပ္ဍဲကွာန်ပြဳ၊ ပွိုင်ဍုင်ဇြပ်ဗုဂှ်တုဲ ကောန်သ္ဂံင်လ္ပါ်ဒပ်ပၞာန်ဗၟာ ပြဟ်လလုဲ (၆) တၠ၊ ဒးအာဘဲဝပ် (၈) တၠဏီရ။
