ဒုတိယသ္ကိုပ်ပၞာန်ဇၞော် ခေန်ဇြဝ်ဥူ (ဇူ) ဟီုဂလာန်ပံက်ပေါဲသဳကၠဳ (MOI)

အလဵုအသဳရန်လဝ်သ္ဘၚ်သဳကၠဳပရေၚ်ၜိုဟ်လလံဍုၚ်-ကောံဓရီုပေန်လုၚ် ၂၁ ဗွဝ်ကၠံ အလန်တတိယ ပ္ဍဲဂိတုဂျူလာၚ် ဒုတိယသတ္တဟဏံဂှ် ပရူဒပ်ပၞာန် ညံၚ်ဂွံဆက်နွံ မွဲဓဝ်ဂှ်ရ ဒးသဳကၠဳဏောၚ်တုဲ ကိစ္စဒပ်ပၞာန် ဖေဝ်ဒရေဝ်ဂှ် ဒှ်ဟွံမာန်ရောၚ် သာ်ဝွံ ဒုတိယသ္ကိုပ်ပၞာန်ဇၞော် ခေန်ဇြဝ်ဥူ (ဇူ) ညးအုပ်ကာ UPDJC ကမ္မတဳပံၚ်ကောံ ဓမံက်ရုပ်ရဴပရေၚ်ၜိုဟ်လလံဍုၚ် ဂးရ။

“ပိုဲဂှ် ဒပ်ပၞာန် ဒးဒှ်မွဲဓဝ်ရ ပိုဲဟီုဏောၚ်၊ ဒၟါနူဂှ်ရ ဗီုပြၚ် ဒပ်ပၞာန်ဖေဝ်ဒရေဝ် ဒးမံက်တိုန်ဏောၚ်ဟီုဂှ် ပ္ဍဲအလန်ဏံ ဒှ်ဟွံမာန်လးလး” ညးတေံ ဂးရ။

ရန်ကဵုသွက်ဂွံကၠောန် ကောံဓရီုပေန်လုၚ် ၂၁ ဗွဝ်ကၠံ အလန်တတိယတုဲ ပ္ဍဲဂိတုဂျောန် (၁၉) ဂှ် သွာၚ်အလဵုအသဳ၊ သွာၚ်ကၠတ်ထဝ်၊ သွာၚ်ဒပ်ပၞာန် ပိသွာၚ်ဏံ ကၠောန်သ္ပပေါဲသဳကၠဳ ဒၞာဲ NRCP ဌာနဗဟဵု ပရေၚ်သၟဟ်သၟန်ကောန်ဂကူကေုာံပရေၚ်ၜိုဟ်လလံ ပ္ဍဲနေပျဳဒဝ်တုဲ ဒုသ္ကိုပ်ပၞာန်ဇၞော် ခေန်ဇြဝ်ဥူ ဟီုပြံက်ဏာ ပ္ဍဲဂလာန်ပံက်ပေါဲသဳကၠဳရ။

“သ္ဘၚ်သဳကၠဳ အလန်တတိယဏံတှေ် ကိစ္စဖေဝ်ဒရေဝ် ဒးသဳကၠဳပ္ဍဲကဏ္ဍပရေၚ်ဍုၚ်ကွာန်ဂှ် အရာဂွံသ္ပပြာကတ်ကဵုဖေဝ်ဒရေဝ်၊ ရှ်သာဖေဝ်ဒရေဝ် သ္ဂောံမံက်ဂှ် အောန်မံၚ်ဏောၚ်” ဒုသ္ကိုပ်ပၞာန်ဇၞော် ခေန်ဇြဝ်ဥူ ဂးရ။

အတိုၚ်အလဵုအသဳ အာတ်လဝ်ကတိပါၚ် “ဟွံပါ်တိတ်နူကၟိန်ဍုၚ်ရောၚ်”ဟီုဂှ် လ္ပာ်ကောန်ဍုၚ်အရၚ်တံ ဗဗွဲဗက်ဟွံမာန်ဏီတုဲ အတိုၚ်ကောန်ဍုၚ်အရၚ်တံ နွံပၟိက် မူဖေဝ်ဒရေဝ် မပ္တံအခေါၚ်ချူခၞံသၞောဝ်တွဵုရး၊ ကိစ္စအခေါၚ်ဖန်ဖက်ကမ်ကုသိုလ်ဇကုဇကုတံဂှ်လေဝ် သဳကၠဳကၠုၚ် ဟွံပြေပြံၚ်ဏီတုဲ ကောံဓရီုပေန်လုၚ် ၂၁ ဗွဝ်ကၠံ အလန်တတိယဏံ ဟွံဒှ်သဳကၠဳဏီ ဆက်စွံလဝ် ကၠာဏောၚ်။

ပ္ဍဲကမ္မတဳကမၠောန် သွာၚ်ညးကဵုညးတံလေဝ် အရာတၚ်သဳကၠဳသှေ်ကၠုၚ်ဒၟံၚ်တံကီု၊ တၚ်နၚ် နူပေါဲသဳကၠဳ ပရေၚ်ဍုၚ်ကွာန် ကောန်ဂကူမန် ဗော်ဍုၚ်မန်တၟိဂှ်ကီု၊ နူဂကောံ CSO ဂှ်ကီု ဒးဆက်ပ္တိုန်ထ္ၜး နွံမံၚ်ဏီတှေ် တၚ်နၚ်တၟိတၟိတံ လုပ်ကၠုၚ်မာန်ဏီဏောၚ်၊ တၚ်နၚ်သှေ်သှေ် နူကမ္မတဳကမၠောန်ကဵု တၚ်နၚ်တၟိတၟိတံဏံ ပံၚ်ပကောံထောံမ္ဂး ကောံဓရီုအလန်တတိယဏံ ဖန်ဇန်ဍိုက်ပေၚ်မာန်ဏောၚ် ညးတေံ ဂးရ။

“ဂျောန် ၂၅ ဏံတှေ် ကၠောန်ကောံဓရီု ဂကောံညးအုပ်ကာ UPDJC ဏောၚ်။ ကောံဓရီု ဂကောံညးအုပ်ကာဂှ်တုဲမ္ဂး တ္ၚဲလဵုသ္ပကောံဓရီု UPDJC ရောဂှ် သ္ဂုတ်သွာတ်ဏောၚ်။ ဣဂှ်တုဲမ္ဂး ဆက်သ္ဂုတ်သွာတ် တ္ၚဲကၠောန်သ္ဘၚ်သဳကၠဳပၠန်ဏောၚ်” သာ်ဝွံ ဥူဇြဝ်ဌေ နွံကဵုအခေါၚ်ဟီုဂး လ္ပာ်အလဵုအသဳ ဂးရ။

တ္ၚဲကၠောန်သ္ဘၚ်သဳကၠဳ အလန်တတိယဂှ် လ္ပာ်အလဵုအသဳ ရန်လဝ် နူဂျောန် ၃၀ ကၠောန်အာပွိုၚ် ၅ တ္ၚဲရောၚ် ဂးလဝ်သာ်ဂှ်ကီုလေဝ် လ္ပာ် NCA-S EAOs ဂကောံရပ်လွဟ်ကောန်ဍုၚ်အရၚ် ထ္ပက်စၟတ်တဲ NCA တုဲတံ အာတ်မိက်လဝ် သွက်ဂွံကၠောန် ပ္ဍဲဂိတုဂျူလာၚ် ၁၀ တေံရ။

စပ်ကဵုကဏ္ဍပရေၚ်ဂီုကၠီုတုဲ လ္ပာ်အလဵုအသဳ ကဵု ဒပ်ပၞာန်ဂှ် ဒပ်ပၞာန် ဒးနွံမွဲဟေၚ်ရ ရပ်လဝ်မူဏံတုဲ မူကောန်ဍုၚ်အရၚ်တံဂှ် ဒးဒက်ပ္တန်ဒပ်ပၞာန်ဖေဝ်ဒရေဝ်ဏောၚ် ဟိုတ်နူဝိဝါဒ နွံကၠုၚ်သာ်ဏံဂှ်ရ ကိစ္စဖျေံဗီုပြၚ်ဒၞါဲဝါဲဒပ်ကီု၊ ကိစ္စပလီုဒပ်ကောန်ဍုၚ်အရၚ်တံကီု ပ္ညဳညးသ္ကံဟွံဂွံဏီရောၚ် ဂွံတီလဝ် နူက္ဍိုပ်သ္ကိုပ် ကောန်ဍုၚ်အရၚ်တံကီုရ။