ဝဏ္ဏမာန်၊ ဂျောန် ၂၉၊ ၂၀၂၀

စပ်ကဵုအခေါၚ်အရာ သၟာကမၠောန် နွံတန်တဴဍုၚ်သၟာၚ်တံ သ္ဂောံဂွံအခေါၚ်စုတ်မာဲဗွဲပြေပြံၚ်မာန်ဂှ် ညးစၞးဗော်ညဳ သၟဟ်မန် ပတိုန်ထ္ၜးကဵု ကမ္မယှေန်ပေဲါရုဲမာဲကၟိန်ဍုၚ် ကာလပေဲါထ္ပက်စၟတ်တဲ တၚ်ဒုၚ်ကတိကဝတ် ကုဗော်ပရေၚ် ဍုၚ်ကွာန်ဂမၠိုၚ်ဂှ်ရ။
တုဲကၠုၚ်ဂျောန် ၂၆ ဂှ် ကမ္မယှေန်ပေဲါရုဲမာဲကၟိန်ဍုၚ်တံ ကော်ဆဵုဂဗ ကုဗော်ပရေၚ်ဍုၚ်ကွာန်လုပ်ဒုၚ်ပေဲါရုဲမာဲဂမၠိုၚ် ပ္ဍဲ ဟဝ်တေဝ် Melia လ္ဂုၚ်တုဲ တၚ်ဒုၚ်ကတိကဝတ် နူကဵုကမ္မယှေန်တံ ချူဓဇက်လဝ်ဂှ် ဗော်ပရေၚ်ဍုၚ်ကွာန်ဂမၠိုၚ်တံ ဒးဒုၚ်ထ္ပက်စၟတ်တဲရ။
‘စပ်ကဵုသၟာကမၠောန် စိုပ်မံၚ်ဌာန်သ္ၚောဲ အဓိက ဍုၚ်သေံ ညံၚ်ဂွံစွံကဵုရုၚ်မာဲ ဒၞာဲကြပ်ကဵုညးတံ၊ ယဝ်ရ စွံလဝ်ကဵုရုၚ် မာဲ ပ္ဍဲကဵုရုၚ်ကလုတ် (သံရုံး) ပ္ဍဲၜၚ်ကံက်မွဲဓဝ်ရတှေ် သွက်ညးဂွံအခေါၚ်စုတ်မာဲတံ ဟွံပြေပြံၚ်ပုဟ်၊ အဓိက ပိုဲ ပတိုန်ထ္ၜးဂှ် ညံၚ်ဂွံစွံကဵုရုၚ်မာဲ ဒၞာဲဒေသကောန်ဍုၚ်ကွာန်ဍုၚ်ပိုဲ ဂၠိုၚ်တံဂှ်’ သာ်ဏံ ကမ္မတဳကေၚ်ကာ နာဲရာၚ်ဆာဲ (နာဲယျေဝ်ဇြဝ်) ဟီုရ။
လတူကမ္မယှေန်ပေဲါရုဲမာဲတံ ကော်ဆဵုဂဗ ကုဗော်ပရေၚ်ဍုၚ်ကွာန်ဂမၠိုၚ်တုဲ ကဵုထ္ပက်တၚ်ဒုၚ်ကတိကဝတ်တံဂှ် ပ္ဍဲတၚ်လ္ၚဵုလ္ၚဵု ဗော်လ္ၚဵုဟွံစှေ်စိုတ်တုဲ ဟွံထ္ပက်စၟတ်တဲလေဝ်နွံရ။
စပ်ကဵုသၟာကမၠောန် နွံတန်တဴဌာန်သ္ၚောဲတံ ဂွံဂွံအခေါၚ်စုတ်မာဲဂှ် ကိုပ်ကၠာဏံ ဒးဗပေၚ်တၚ်နၚ် (ပုံစံ ၁၅) တုဲ စရၚ်တံဒှ်ဒတန်တုဲမှ သွက်ညးနွံတန်တဴဌာန်သ္ၚောဲတံ ဂွံအခေါၚ်စုတ်မာဲစဵုဒုၚ် ပ္ဍဲကဵုရုၚ်ကလုတ် ဍုၚ်မဆေၚ်စပ်တံရ။
‘ဗီုကဵုကမ္မယှေန်တံ ဖန်ဇန်လဝ်တုဲတုဲကၠုၚ်တေံမ္ဂး ညးတံပံက်လဝ်အခေါၚ် ဒးစုတ်မာဲ ပ္ဍဲရုၚ်ကလုတ် မွဲဒၞာဲဓဝ်တုဲ သွက်ညးအာကဵုမာဲတံ ဟွံပြေပြံၚ်ဂှ်ရ ညံၚ်ဂွံဗက်စွံကဵု ရုၚ်စုတ်မာဲ ပ္ဍဲဒေသကောန်ဍုၚ် (ဗမာ) တံ နွံလၟိဟ်ဂၠိုၚ်ဂၠိုၚ် တံဂှ်ထေက် ပိုဲပတိုန်ထ္ၜးလဝ်နွံ၊ ဆဂး ကမ္မယှေန်တံ ကၠောန်ဟွံကၠောန်ဂှ်တှေ် တန်တဴကဵုညးတံရ’ သာ်ဏံ နာဲရာၚ်ဆာဲ ဆက်ဟီုရ။