ဗညာပိုၚ်၊ သေပ်တေမ်ဗာ ၁၁၊ ၂၀၂၀
ပ္ဍဲအခိၚ်ကာလလၟုဟ်ဝွံ သၟတ်တံ ညံၚ်သ္ဂောံပါလုပ် ပ္ဍဲဗွိုၚ်ပရေၚ်ဍုၚ်ကွာန်တံဂၠိုၚ်ၚ်ဂှ် နကဵုဗော်ပရေၚ်ဍုၚ်ကွာန်တံ ဒးဖျေံအာကဵု အစဳဇန်တန်ဗ္တောန် ချိုတ်ချိုတ်ပၠိုတ်ပၠိုတ်ထေက်ဏောၚ်ဂှ် ပ္ဍဲဝိုၚ်တက်ကျာသဳကၠဳ တ္ၚဲပၠန်ဂတးမန် (၇၃) ဝါဂှ် ညးကဵုကသပ် ဋ္ဌာန်ကောံသၟတ်မန် (MYF) နာဲညာဏ်သိုက်ရာမာဉ် ဟီုလဝ်ရ။
အစဳဇန်ဝိုၚ်တက်ကျာသဳကၠဳ တ္ၚဲပၠန်ဂတးမန် (၇၃) ဝါဝွံ ပ္ဍဲဂိတုအဝ်ဂါတ် (၂) ဂှ် ကၠောန်ဗဒှ်လဝ် ပ္ဍဲဘာရမညရဋ္ဌဗုဒ္ဓတက္ကသိုလ် ဍုၚ်မတ်မလီုတုဲ အခိၚ်လဒေါဝ်တ္ၚဲ (၁) နာဍဳဂှ် စဗလးကၠုၚ် Live ဝိုၚ်သဳကၠဳဂှ်တုဲ ညးအာက္ဍိုပ်သၟတ် နာဲဉာဏ်သိုက်ရာမာဉ် ဟီုဏာလဝ် သာ်ဝွံရ။
“သၟတ်တံ ညံၚ်ဂွံပါလုပ်ဂၠိုၚ်ဂှ် နကဵုဗော်ဗွိုၚ်ဍုၚ်တံဂှ်တှေ် ဒးပံက်အာကဵု တန်ဗ္တောန်သၠုၚ်ပတိုန် လညာတ်သၟတ်တံကီု၊ ဘာပရေၚ်ဍုၚ်ကွာန်ကီု၊ ဘာကောပ်ကာဲနဲကဲတံကီု သၟတ်တံ ညံၚ်ဂွံတိုန်အာ ဘာတဏံဂှ်ကီု၊ ယဝ်ညးတံကၠောန်ဗီုဏံတှေ် သၟတ်တံ ပဵုဍေံလုပ်ကၠုၚ် ပ္ဍဲပရေၚ်ဍုၚ်ကွာန်ရ။ နကဵုဗော်တံဂှ်တှေ် ဒးလွဳပရာ သၟတ်ပိုဲတံ နကဵုဗီုပြၚ် သၞောတ်စှေ်စှေ်ထေက်ရ” သာ်ဏံ နာဲညာဏ်သိုက်ရာမာဉ် ဂးရ။
နူကဵုဗော်ဗွိုၚ်ဍုၚ်တံကီု၊ ဗော်ဍုၚ်မန်တၟိတံကီုဂှ် သၟတ်တံ သ္ဂောံကၠိုဟ်အာ အကာဲအရာပရေၚ်ဍုၚ်ကွာန် ဇြိုဟ်ဇြိုဟ်နက်နက်ဂှ် နကဵုအစဳဇန် ချိုတ်ချိုတ်ပၠိုတ်ပၠိုတ် မိက်ကဵုလွဳၜံၚ်အာရဂှ် ညးဆက်ဖ္တိုက်ဖၟောဝ်ရ။
အခိၚ်ကာလတေံဂှ် ဟိုတ်နူကဵုဗော်ပရေၚ်ဍုၚ်ကွာန်တံ ပါ်ထကးဒၟံၚ်ဂှ်တုဲ သၟတ်တံလေဝ် စိုတ်ယအ်ကၠုၚ်ကီု၊ လၟုဟ်ဝွံ ဗော်ဗွိုၚ်ပ္ဍဲဍုၚ်တံ ဒှ်အာမွဲတုဲ သၟတ်တံလေဝ် ဂွံကၠုၚ်ဇြဟတ်တုဲ ပါလုပ်ကၠုၚ် ပ္ဍဲဗွိုၚ်ပရေၚ်ဍုၚ်ကွာန်တံ ဂၠိုၚ်တိုန်ဂှ် ဂွံဆဵုကေတ်ကီု သ္ဂးရ။
ပ္ဍဲကဵုဗော်ဍုၚ်မန်တၟိဂှ်လေဝ် သွက်သၟတ်တံဂှ် ဘာပရေၚ်ဍုၚ်ကွာန်ကီု၊ ဘာဂဥုဲတံကုီု၊ ဘာကွတ်သ္ဇိုၚ်ပၞာန်တံကီု နွံတုဲ သၟတ်တံ စိုတ်လုပ်ကၠုၚ်တုဲ တိုန်ဒၟံၚ်ဘာပ္ကတ်ပ္ကေၚ်နာနာသာ်ဂှ်လေဝ် ဂွံဆဵုကေတ်ကီုရ။
“သၟတ်တံကဵုဇြဟတ်ဓရိုဟ်တုဲတှေ် လၟုဟ်ဂှ် ဗော်ဗွိုၚ်ဍုၚ်တံလေဝ် ဍေံဒှ်ကၠုၚ်မွဲရ၊ ဗော်တံဂှ်လေဝ် ညံၚ်သၟတ်တံ ဂွံခိုဟ်ကၠုၚ်ဂှ် ဒးထ္ၜလဘာ်ကဵုဏောၚ် ဒးပ္ကတ်ပ္ကေၚ်ကဵုဏောၚ်ရဂှ်” သာ်ဝွံ ဒုဥက္ကဌကၠတ်ထဝ်တွဵုရးဍုၚ်မန် ဒံက်တာအံၚ်နာၚ်ဥူ ဟီုလဝ်ပ္ဍဲကဵုဝိုၚ်သဳကၠဳ တ္ၚဲပၠန်ဂတးမန် (၇၃) ဝါ ဂှ်ရ။
ပ္ဍဲကဵုဝိုၚ်သဳကၠဳ တ္ၚဲပၠန်ဂတးမန် (၇၃) ဝါဂှ်မ္ဂး ညးမသဳကၠဳတံဂှ် ဒုဥက္ကဌကၠတ်ထဝ်တွဵုရးဍုၚ်မန် ဒံက်တာအံၚ်နာၚ်ဥူ၊ ဥက္ကဌဂကောံညးဗြဴမန် မိကောန်ဆာန်နန်၊ ညးကဵုကသပ် ဋ္ဌာန်ကောံသၟတ်မန် နာဲညာဏ်သိုက်ရာမာဉ်တံ တိုန်စိုပ်သဳကၠဳလဝ်ရ။
0 Comments