ဗော်ဍုၚ်မန်တၟိဂှ် ထိၚ်ဒဝ်လဝ် မၞိဟ်စောဲလာံဂဥုဲၜူမာဲ နွံမံၚ်တုဲ သွက်ဂွံဒှ်အထံက်အပၚ် ပရေၚ်စသုၚ်ဂှ် နူကဵုဇာနှိက်ဂကောံအ္စာသဝ်တံ အာကဵုလဝ်ဒါန်သ္ၚု (၂၂၀) ရိုက်ရောၚ် ဂွံတီကေတ်ရ။
စပ်ကဵုပရေၚ်ဗတိုက်သရိုဟ်ဂဥုဲၜူမာဲကီု ပရေၚ်ရပ်စပ်ဂဥုဲၜူမာဲကီု ဗော်ဍုၚ်မန်တၟိ ရေၚ်တၠုၚ်မံၚ်ဂှ်ရ ပ္ဍဲကဵုဂိတုဒဳဇြေမ်ဗာ စၟတ်တ္ၚဲ (၂၈) ဂှ် ခရိုၚ်မတ်မလီု၊ စၟတ်တ္ၚဲ (၂၉) ဂှ် ခရိုၚ်ဓဝဲါ ကေုာံ ပ္ဍဲစၟတ်တ္ၚဲ (၃၀) ဂှ် ခရိုၚ်သဓီု အာစိုပ်ထံက်ပၚ်လဝ်ရောၚ် နူကဵုဂကောံဇာနှိက်အ္စာဂဥုဲ အ္စာသဝ်နာဲစောန်တၟး ဟီုရ။
အ္စာသဝ်နာဲစောန်တၟးဂှ် “ဗော်ဍုၚ်မန်တၟိဂှ် စပ်ကဵုဂဥုဲၜူမာဲတုဲ ဗတိုက်သရိုဟ်၊ ရပ်မံၚ်ဏောၚ်။ ပိုဲတံ ဒးစိုတ်မံၚ်ကွေံကွေံရ။ ပ္ဍဲကဵုဍုၚ်ပိုဲလေဝ် အနာဂတ်တေံ ဒှ်ကၠုၚ်ကၟိန်ဍုၚ်ဖေဝ်ဒရေဝ်ဏောၚ်။ အခိၚ်ဂှ်တှ်ေ သၟတ်ပိုဲတံ စောဲလာံမံၚ်ကဵုဂဥုဲၜူမာဲတှ်ေ အနာဂတ်တေံ ခိုဟ်ဟွံမာန်ပုဟ်။ သွက်ဂွံခိုဟ်စ အဓာန်ဂတဂှ်ရ ပိုဲကၠုၚ်ကဵုဒါန်လၟုဟ်ဏံ” သာ်ဝွံ ညးဟီုရ။
အဓာန်ဂတတေံလေဝ် သွက်အ္စာဂဥုဲ နွံမံၚ်သၟဝ်ဌာနပရေၚ်ထတ်ယုက် ကောန်ဂကူမန်တံ ပါ်ပရအ်ကဵုကွတ်ပညာဂဥုဲကီု ဂဥုဲဆက်စပ်ကဵုထပိုတ်ဂဥုဲၜူမာဲတံ ညံၚ်ဂွံစိုပ်ပ္ဍဲကဵုဌာနပရေၚ်ထတ်ယုက် ကောန်ဂကူမန်ဂှ်လေဝ် သွက်ဂွံဆက်ရေၚ်တၠုၚ်အာဂှ် ဖန်ဇန်မံၚ်ရောၚ် ဂးရ။
ပ္ဍဲကဵုဒၞာဲထိၚ်ဒဝ်မၞိဟ်စောဲလာံဂဥုဲၜူမာဲဂှ် မၞိဟ်ဒးဒုၚ်ရပ်လဝ်တံကီု မၞိဟ်စောဲလာံဂဥုဲ မိမတံကၠုၚ်ပအပ်လဝ် ပ္ဍဲဗဒိုပ်ခရိုၚ်သဓီုဂှ် အခိၚ်ကၠာယဲကဝ်ဝေဒ်ဟွံဂွံလုပ်ဏီဂှ် နွံမံၚ်ၜိုတ် (၇၀) တၠတုဲ လၟုဟ်ဝွံ မၞိဟ်တၟိမိမတံကၠုၚ်ပအပ်ဂှ် သွက်စွံဒၞာဲဟွံရုမ်ဂပ်တုဲ ဟွံဂွံဒုၚ်တဲဏီရောၚ် ဥက္ကဋ္ဌ ခရိုၚ်သဓီု နာဲဨက ဟီုရ။
“ယဲကဝ်ဝေဒ်လုပ်ကၠုၚ်ဍုၚ်ပိုဲတုဲတှ်ေ ပရေၚ်ကမၠောန်ပိုဲကီု အရၚ်ဂွံစွံအာမၞိဟ်တံကီု အတိုၚ်သၞောဝ်ယဲကဝ်ဝေဒ်ဂှ် ဒးကၠောန်အာတှ်ေ လပါ်ရပ်ဂှ် အောန်အာညိ။ ရဲမိမကၠုၚ်ပအပ်ဂှ်လေဝ် ပိုဲဒးပိုၚ်ခြာထောံညိ။ မၞိဟ်တၟိတှ်ေ ပိုဲတံ ဟွံဒုၚ်တဲဏီပုဟ်” သာ်ဝွံ နာဲဨက ဆက်ဟီုရ။
ပ္ဍဲကဵုဗော်ဍုၚ်မန်တၟိဂှ် သွက်ဂွံလွဳလွတ်ထပိုတ်ဂဥုဲကဵု မၞိဟ်စောဲလာံဂဥုဲၜူမာဲဂှ် သိုၚ်ခၞံလဝ် ဗဒိုပ် ဌာနထိၚ်ဒဝ် လွဳလွတ်ကဵုကွတ် သွက်ညးစောဲလာံဂဥုဲၜူမာဲ ပ္ဍဲကဵုခရိုၚ်ဓဝဲါ နွံမံၚ်ကီု ဂွံတီကေတ်ရ။
0 Comments