မိလတိုပ်၊ ဂျောန် ၉၊ ၂၀၂၁
သွက်ဂွံသ္ပဒတန်မူဝါဒ သၟတ်မန်ကီု သွက်ဂွံဒက်ပတန်အာ ဂကောံသၟတ်မန် ပစၞးဂကူမန်ကီုဂှ် ကၠောန် ဗဒှ်အာ ကောံဓရီုဇၞော်သၟတ်မန် အလန် ဒုတိယရောၚ် ညးကဵုကသပ်ဌာန်ကောံသၟတ်မန်မွဲတၠ ဟီုရ။
ကောံဓရီဵုဇၞော်သၟတ်မန် အလန်ဒုတိယဝွံ ပ္ဍဲဂိတုဂျူလာၚ် ၂၇/၂၈/၂၉ (၂၀၂၁) ဂှ်မ္ဂး သွက်ဂွံကၠောန်အာ ကောံဓရီုဇၞော် ဂကောံသၟတ်မန် ပ္ဍဲခရိုၚ်သဓီု ပွိုၚ် (၃) တ္ၚဲနွံရ။
“မူဝါဒသၟတ်ဂှ် ပိုဲပဒတန် ညံၚ်ဂွံမာန်ရောၚ်၊ ပရေၚ်ပံၚ်ပကောံသၟတ်ပိုဲ MYF ရောအ်ရေၚ် (ယောၚ်ယာ) မံၚ်တ္ၚဲဏံဂှ် ဗီုလဵုဂွံက္လေၚ်စန်ပကောံ ပံက်အာကမ္မတဳ ဂကောံသၟတ် MYF ဏံဂှ် သဳကၠဳအာရောၚ်” သာ်ဝွံ ညးကဵုကသပ်ဌာန်ကောံသၟတ်မန် နာဲဉာဏ်သိုက်ရာမာဉ် ဟီုရ။
ကောံဓရီုဇၞော်ဂကောံသၟတ်မန်ဝွံ ဗော်ဍုၚ်မန်တၟိ၊ ဂကောံသၚ်၊ ဂကောံသၟတ် ပ္ဍဲကဵုတွဵုရးဍုၚ်မန်၊ ဒေသပယျဵု ညးစၞးတအ် ဗၞတ်ၜိုတ် (၁၅၀) တၠ ကော်ဘိက်အာတုဲ သီုကမ္မတဳကၠောန်ဗဒှ်မ္ဂး မၞိဟ်ဗၞတ် ၜိုတ် (၂၀၀) တၠ သွက်ဂွံတိုန်စိုပ်ဂှ်မာန်ဂှ် ကမ္မတဳကၠောန်ဗဒှ်တံ ဖန်ဇန်လဝ်ရ။
“သၟတ်ကဵုပရေၚ်ဍုၚ်ကွာန်ဂှ် ပိုဲဆဝ်ဗ္ၚုဟ်မံၚ်လၟေၚ်ၚ် သၟတ်အာယုက်ပေၚ်ဂှ် ဒးလေပ်ကွတ်ပၞာန်ဏောၚ်၊ ဣဏံဂှ် ပါတွဵုရ၊ ပ္ဍဲမူဝါဒဂှ် ဂံၚ်ဟီုပေၚ်ၚ် ပိုဲဆဝ်ဗ္ၚုဟ်မံၚ် ဂွံ (၃/၄) သၞာံတုဲရ၊ အခိၚ်တ္ၚဲဏံ သၟတ်တအ် လမျီု လုပ်ကၠုၚ် ၜိုတ်ဒးရးယျ” သာ်ဝွံ နာဲဉာဏ်သိုက်ရာမာဉ် ဆက်ဟီုထ္ၜးပၠန်ရ။
စပ်ကဵုအကာဲအရာ ပရေၚ်ဍုၚ်ကွာန်တ္ၚဲဏံမ္ဂး နကဵုသွာၚ် ဂကောံသၟတ်တအ် ပရေၚ်ဒစဵုဒစးကီု ပရေၚ်ထံက်ဂလာန်ကီုဂှ် လ္ပါ်လဵုလေဝ် ဒတူလာၚ်လဝ်ဟွံမွဲဏီဂှ် ညးဆက်ဟီုရ။
ဂကောံသၟတ်မန်ဝွံ နူကဵုသၞာံ (၂၀၁၄) ဂှ် ကၠောန်ကၠုၚ်လဝ် ကောံဓရီုဇၞော် ဂကောံသၟတ်မန် အလန်ပထမ ပ္ဍဲသာသနာ (၂၅၀၀) လ္တူဍုၚ်မတ်မလီုရ။
0 Comments