ပ္ဍဲတွဵုရးဍုၚ်မန် ပေဲါဗတိုက်ညိၚ်ကၠုၚ်ညိဂှ်ရ သွံရာန်ကၠုၚ်ကၠအ်ထၜိုတ်ကီု၊ ကၠအ်သတ်ဆုနာနာသာ်ကီု ဂၠိုၚ်ကၠုၚ်တုဲ ဒၞာဲဒေသဒှ်မံၚ်မုက်ပၞာန်တံဂှ် ရာန်ကၠအ် ကၠောန်ကၠအ် ဟွံထေက်ရောၚ် တၠကၠအ် ကေၚ်ဒုၚ်စသိုၚ်လဝ် ဘဲပေါဲပၞာန်မွဲတၠ ဟီုကဵုသတိရ။
လၟုဟ်မ္ဂး ပ္ဍဲတွဵုရးဍုၚ်မန်ဂှ် ပေဲါပၞာန်ညိၚ်ကၠုၚ်ညိတုဲ ရဲကၠောန်ကၠအ်၊ ကၠောန်ဂူယာတံ ပလေဝ်ပလေတ်တိုန်ကီု၊ ရဲရာန်ကၠအ် သွက်ဂွံတဵုကၠအ်သတ်ဆု တဵုကၠအ်ထၜိုတ်တံလေဝ် ဗက်ဂၠာဲရာန်တိုန်ကၠအ်အိုတ်ရ။
“ပေဲါပၞာန်ညိၚ်တိုန်ညိရ ရဲကၠောန်ကၠအ် တဵုကၠအ်တံလေဝ် ပလေဝ်ပလေတ်တိုန်၊ ဗက်ရာန်တိုန်ကၠအ်ဂၠိုၚ်တိုန်၊ ရာန်ကၠအ် ကၠောန်ကၠအ်တှ်ေ ဒေသပေါဲပၞာန်ဒှ်မံၚ်၊ ဒၞာဲဒေသ ဒှ်မံၚ်မုက်ပၞာန်တံဂှ် ရာန်ဟွံထေက်၊ ကၠောန်ကၠအ်ဟွံထေက်” သာ်ဝွံ တၠကၠအ်တဵုမံၚ်ကၠအ်ထၜိုတ် ဒေသအကြာပယျဵုရေဝ်ကဵု ဇြပ်ဗု နူပွိုၚ်ဍုၚ်မုဟ်ဍုၚ်မွဲတၠဂှ် ဟီုရ။
ဟိုတ်နူအသိၚ်ပေါဲပၞာန်တုဲ ရဲကၠောန်ကၠအ်ကၠောန်ဂူဂမၠိုၚ်တံ ဒးဒေါံဇူလဝ်ကမၠောန်တုဲ အခိၚ်ပေဲါပၞာန်ညိၚ်တိုန်ညိ လၟုဟ်ဏံဂှ် ရဲကၠောန်ကၠအ် ကၠောန်ဂူတံ ပလေဝ်ပလေတ်တိုန် ပရေၚ်ကၠောန်ကၠအ် ကၠောန်ဂူယာ သေဲသေဲအိုတ်ရ။
နူကဵုပေဲါပၞာန်ညိၚ်တိုန်ညိကီု၊ ၚုဟ်ထၜိုတ်လေဝ် ခိုဟ်တိုန်ကၠုၚ်ဂှ်ကီု၊ ရဲဗက်ဂၠာဲရာန်ကၠအ် သွက်ဂွံတဵုကၠောန်ကၠအ်ထၜိုတ်ဂှ်လေဝ် ဂၠိုၚ်ကၠုၚ်မံၚ်ကွေံကွေံတုဲ တဵုကၠောန်ကၠအ်မ္ဂး ဒးရံၚ်ဒးချိၚ်တုဲ ရာန်တဵုကၠောန်ကၠအ်ဂှ်လေဝ် ညးဒးဒေါံဇူလဝ် ကၠောန်ကၠအ်ထၜိုတ် အကြာပွိုၚ်ဍုၚ်မုဟ်ဍုၚ်ကဵု ပွိုၚ်ဍုၚ်လှာဒကှ်မွဲတၠ ထပ်ဟီုပၠန်ရ။
“ဒၞာဲကၠအ်ပိုဲဂှ် ဒှ်မံၚ်အကြာမန် အကြာကရေၚ် ဒှ်မံၚ်ဗီုပယျဵု၊ သၚ်လ္ပာ်ဏံ (ကွာန်အၜေတ်) တှေ် လုပ်မံၚ်လ္ပာ်မန်၊ သၚ်လ္ပာ်တေံ (ကွာန်ခၠဵုတဂေါန်တိုၚ်) တှေ် ဒှ်မံၚ်ဒေသကရေၚ်၊ အကြာဂၠံၚ်ဂှ်တှ်ေ ဒပ်ပၞာန်ဗၟာ၊ ၜက်နူဂှ်တှေ် ဒပ်ပၞာန်ကရေၚ်၊ ဒပ်မန်နွံမံၚ်၊ ဆဠဒှ်ပေဲါဗတိုက်တှ်ေ ဂၠံၚ်ဂှ် ကၟာတ်အာ၊ အာကၠအ်ဟွံဂွံ၊ အခိၜိုဟ်တှ်ေ ကၠောန်အာ၊ အခိၚ်ရုသံၚ်တှ်ေ ဒးဒေါံဇူ၊ ရာန်ကၠအ်တှ်ေ ဒၞာဲဒှ်မံၚ်ပေဲါပၞာန် ကြပ်မံၚ် ဒပ်ပၞာန်(ဗၟာ)၊ ကြပ်မံၚ်ကဵု ဂကောံပၠန်ဂတး သတိဒးစွံလဝ်တွဵု” သာ်ဝွံ ညးဟီုရ။
အခိၚ်သၞာံ (၂၀၂၄) ဖာမံက်ဂှ်မ္ဂး ပ္ဍဲဒေသတွဵုရးဍုၚ်မန်ဂှ် ပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ်၊ ပွိုၚ်ဍုၚ်သဓီု၊ ပွိုၚ်ဍုၚ်ကျာ်မြဟ်၊ ပွိုၚ်ဍုၚ်ကအ်ကြိက်၊ ပွိုၚ်ဍုၚ်မုဟ်ဍုၚ်၊ ပွိုၚ်ဍုၚ်ဇြပ်ဗု၊ ပွိုၚ်ဍုၚ်ရေဝ် ပေဲါပၞာန်ကတဵုဒှ်ကၠုၚ် ဆက်ဆက်နွံတုဲ ရဲကၠောန်ဂူ ကၠောန်ကၠအ်နာနာတံလေဝ် ဒးထောံလဝ်ကမၠောန်ကၟိတ် ကၠောန်ကၠအ်အိုတ်ရ။
0 Comments