ပ္ဍဲဒေသပယျဵုသေံ-ဗၟာ ဍုၚ်ကျာ်ပိဂှ် ကောန်င္ရာ်သၟဝ်အာယုက် ၁၀ သၞာံဂမၠိုင် ကၠေံဒၟံၚ်ဟွံအောန်နူကဵု ၂၀ တၠ နွံရောင် ဂွံတီကေတ်နူကဵု ညးဒေသကျာ်ပိတံ သ္ဂးရ။
ဂိတုဒဳဇြေမ်ဗါ စၟတ်တ္ရဲ ၆ မတုဲကၠုင်ဏံ ပ္ဍဲလ္တူဍုၚ်ကျာ်ပိ အရာပ်တံင်ဝေင် (တောင်ဝိုင်) ဂှ် အပ္ဍဲပွိုၚ်မွဲတ္ရဲဓဝ် ကောန်င္ရာ်အယုက် ၁၀ သၞာံလ္ပာ်သၟဝ်တအ် ကၠေံအာ (၇) တၠတုဲ ပ္ဍဲကဵုဂှ်ဝွံ ကလေၚ်ဆဵုကောန်င္ရာ်မၞိဟ်တြုံ မွဲတၠရတုဲ သှ်ေ ၆ တၠတအ်ဂှ် ဒဵုကဵုတ္ရဲဏံ ဟွံကလေၚ်ဆဵုဏီရောင် ညးဒေသကျာ်ပိမွဲတၠ လဴထ္ၜးလဝ်ရ။
“ကောန်င္ရာ်စဂှ် ကၠေံကၠုၚ်ဒၟံၚ် ညိညိဂှ် လောန်ကၠုၚ်မွဲၜါဂိတုတေံရ၊ တုဲတှ်ေ ကလေၚ်ဆဵု ဟွံကလေၚ်ဆဵုလေဝ်နွံ၊ ပ္ဍဲကဵုဂိတုဏံရ စၟတ်တ္ၚဲ ၆ ဂှ် ကၠေံအာ (၇) မွဲတဲဓဝ်၊ ကၠေံအာ (၇) ဂှ် ကလေၚ်ဆဵုကောန်င္ရာ်မွဲ၊ သှ်ေ ၆ ဂှ် လၟုဟ်ဟွံဆဵုဏီ၊ ပရိုၚ်ကလေၚ်ဆဵုဂှ် ဟွံမိၚ်ဏီပုဟ်၊ လၟုဟ်ဂှ်တှ်ေ နကဵုမိမကောန်င္ရာ်တအ်လေဝ် ဒှ်ဓဝိၚ်ဂၠိုၚ်တိုန်လေဝ် ပ္ဍဲလ္တူဍုၚ်ဏံ” သာ်ဝွံ ညးဂးရ။
ကောန်င္ရာ်တြုံ မကလေၚ်ဆဵုမွဲတၠဂှ်ဝွံ စဵုကဵုလၟုဟ် ဂွံကလေၚ်လဴထ္ၜးကဵု ပရူဒဒှ်ဂှ် မုဟွံကၠိုဟ်ဏီတုဲ စနူကဵုမိမဇကုလေဝ် သမ္တီဟွံဒးဏီဂှ် ဒှ်မံင်ကဆံင်ဂှ်ရောင် ညးဆက်ဟီုရ။
နူကဵုဂိတုအံက်တဝ်ဗာတုဲကၠုၚ်တေံဂှ်ရ ကောန်င္ရာ်ဍောတ်တ်တအ် ကၠေံကၠုၚ်ဒၟံၚ် မွဲတုဲမွဲတုဲ စဵုကဵုလၟုဟ် ကောန်င္ရာ်ကၠေံမံၚ်တအ်ဂှ် ဟွံကလေၚ်ဆဵုဏီဖိုဟ်ရ။
စပ်ကဵုကိစ္စကောန်င္ရာ်မကၠေံဒၟံင်လ္တူဍုင်ကျာ်ပိဏံတုဲ နူကဵုမိမကောန်င္ရာ်တအ် အာတေၚ်လဝ်ကဵု ဂကောံရပ်လွဟ် နွံဒၟံၚ်ပ္ဍဲဍုၚ်ကျာ်ပိကီုလေဝ် မုဟွံတၟေၚ်ကၠုၚ်မွဲသာ်ဏီရ။
ကောန်င္ရာ်ကၠေံဒၟံၚ်ဗီုဏံဝွံ နကဵုမိမကောန်င္ရာ်တအ်လေဝ် ဒှ်ဒၟံၚ်ဓဝိၚ်တုဲ မိမလ္ရဵုဂှ်ပၠန် ကောန်င္ရာ်ဇကု ဟွံဂံင်ကဵုတိတ်ဘာဗ္တောန်လိက်လေဝ်နွံကၠုင်ရ။
“လၟုဟ်ဂှ်မှ ဖေက်ဒၟံၚ် ကောန်င္ရာ်ဟွံဂံၚ်ကဵုတိုန်ဘာပုဟ်၊ ဘာဂှ်ဟွံသ္ရောဲ ဆ္ဂး အကြာဍာန် ဂွိၚ်ဖေက်ဍေံကေတ်ဏာ ကောန်င္ရာ်ဇကု ဍေံကေတ်ဏာဗီုဂှ်တှ်ေ ချိုတ်ရ” သာ်ဝွံ မိမကောန်င္ရာ်မွဲတၠ ဂးရ။
လောန်ကၠုၚ်ဂိတုအံက်တဝ်ဗာတေံရ ကောန်င္ရာ်စကၠေံဒၟံၚ်တုဲ နကဵုညးဒေသတအ်လေဝ် ဟွံပၠောပ်အာရီုကဵု ပရူပရောဏံဂှ်ရ ကာလဂွံတီဂှ် ကောန်င္ရာ် အယုက် ၁၀ သၞာံ လ္ပာ်သၟဝ်တအ် ကၠေံကၠုၚ်ဒၟံၚ် ဗဒါဲ ၂၀ တၠ နွံကၠုၚ်ရ။
တုဲကၠုၚ်ဂိတုနဝ်ဝေမ်ဗာ သတ္တဟတတိယဂှ်လေဝ် ကောန်င္ရာ်သၟတ်ဗြဴ အယုက် ၄ သၞာံပြၚ် နူကဵုအရာပ် ၁ ဍုင်ကျာ်ပိ ကၠေံအာမွဲတၠဂှ်လေဝ် စဵုကဵုလၟုဟ် မုဟွံမိၚ်ပရိုၚ်ဏီရ။
လ္တူဍုင်ကျာ်ပိဂှ် ဂကောံရပ်လွဟ်ဂမၠိုင် မပ္တံကဵု ဗော်ဍုင်မန်တၟိ၊ ဒဳကေဗဳအေ၊ ကေအေန်ယူ၊ ပဳဇြဳ၊ ဗဳဂျဳအေဖ်၊ ပဳဒဳအေဖ် ကေုာံ ဒပ်ပၞာန်ဗၟာတအ် နွံတန်တဴချဳဒရာင်တုဲ ပြဟ်ဟ်ဏအ် နကဵုဂကောံ ဒဳကေဗဳအေမွဲဟေင် ဗ္ဂေတ်ဒၟံင်စက်ယန်နာနာ ပ္ဍဲဒေသပယျဵု ကျာ်ပိဂှ်ရောင် ဂွံတီကေတ်ရ။
