နူကဵုဒပ်ပၠန်ဂတးဍုင်မန် MSRF ပံက်ဗ္တောန်လဝ် ဘာကွတ်ပၞာန်သ္ဇိုင် လၟေင် ၂ ပွိုင် (၃၅) တ္ရဲဂှ် တ္ရဲဏအ် (ဂိတုဒဳဇြေမ်ဗါ ၉) ကၠောန်သ္ပအသေအဟာန်ဖျေံဘာ ပ္ဍဲတိဍာ်ဗၠးၜးမွဲဒၞါဲ တုဲဒှ်အာရ။
ဘာကွတ်ဗ္တောန်ပၞာန်သ္ဇိုင် လၟေင် (၂) ဂှ်ဝွံ ဒုင်သ္ဇိုင် ပံင်ဗ္စပ်လဝ်ကွတ်ပၞာန် နူကဵုတန်ဗ္တောန်ပၞာန် Special Operation Force (SOF) ကေုာံ Free Burma Ranger (FBR) ဂမၠိုင်တုဲ ကွးဘာသ္ဂံင်တြုံ၊ သ္ဂံင်ဗြဴ ဖ္အိုတ်ဗၞတ် ၄၀ တၠတအ် ဂွံတိုန်စိုပ်ကတ်လ္ရတ်လဝ်ရောင် ဂွံတီကေတ်ရ။
“ယဝ်ရ သ္ဂံၚ်တံဂှ် ဟွံတိုန်လဝ် ဘာပၞာန်မွဲသာ် ယဝ်ရပိုဲတံ ဗလးပတိတ်ဏာ မုက်ပၞာန်ဏောၚ် ဟီုမ္ဂး တုပ်တဴညံၚ်ရဴ ဂစိုတ်ထောံ ကောန်သဂံၚ်တံရ” သာ်ဝွံ သ္ကိုပ်ဒပ် ဒပ်ပၠန်ဂတးဍုင်မန် MSRF ဒရဂန် သ္ဂးရ။
ပ္ဍဲကဵုအသေအဟာန်ဖျေံဘာတ္ရဲဏအ်ဂှ် ညးတာလျိုၚ် နူကဵုဥက္ကဌ ကမ္မတဳအုပ်ဓုပ် ကံင်ဇြဳဖေဝ် ဒရေဝ်ဍုၚ်မန် MSFC နာဲကသုမန်ကီု ညးတာလျိုၚ်ဌာန ဌာနပရေၚ်စဵုဒၞာ နာဲဍေန်ပၠဟံသာကီု သီုနူလပါ်ဒပ်မဟာမိတ် သ္ကိုပ်ဗျူဟာ (၃၃) နူကဵု NUG ကေုာံ သ္ကိုပ်တံဒပ် ဒဝ်ဏတအ် တိုန်စိုပ်လဝ်ကီုရ။
“ယဝ်ရပိုဲတအ် ဟွံဂံင်ယာတိုန်က္ဍိုပ်၊ ပိုဲတအ်ဟွံဂံင်လုပ်ဗ္တိုက်တှ်ေ ဘဝဍိက်ပိုဲတအ်ဂှ်တှ်ေ ဆက်တုဲ ဂၠိင်အာပၠန်ဏောင်၊ ဟိုတ်ဂှ်ရ တာလျိုင်သ္ဂံင်တအ်ဂှ် ဇၞော်မံင်ဏောင်၊ တ္ရဲဏအ် သ္ဂံင်တြုံ၊ သ္ဂံင်ဗြဴတအ် ဂွံလဝ်ကွတ်ပၞာန်တုဲတှ်ေ ဂတဏအ် မုပိုဲတအ် ဒးသ္ပရော၊ ကာလပိုဲဒးလုပ်ပေါဲဗ္တိုက်တှ်ေ ဆီညံင်ဂွံတိတ်အောန်ရ၊ ကာလပိုဲတအ် မံင်ပ္ဍဲဗ္ဒိုပ်ကီု၊ လုပ်မုက်ပၞာန်ကီုဂှ် ပိုဲညံင်ဂွံက္လင်အမိင်လေပ်ဂှ် ပၟိက်ဇၞော်ရောင်” သာ်ဝွံ ဥက္ကဌ ကမ္မတဳပရေင်အုပ်ဓုပ် နူကံင်ဇြဳဖေဝ်ဒရေဝ်ဍုင်မန် နာဲကသုမန် ဟီုသ္ဂးလဝ်ဂလာန်ဗ္ကန်ကုသ္ဂံင်တအ်ရ။
တုဲပၠန် နူကဵုညးမဒှ်လျိုၚ်ဌာန ဌာနပရေၚ်စဵုဒၞာ MSFC “နာဲဍေန်ပၠဟံသာ” ဂှ်လေဝ် တၚ်ဂုန်ကဵု အ္စာဘာပၞာန်တံကီု ထိုၚ်သး ကုကွးဘာပၞာန်တံ နွံတုဲ သီုကဵုဗကန်ဏာ ကောန်သ္ဂံၚ်တံ (၁) ဇၟာပ်ပ်တ္ရဲ ၜိုတ်ခိုဟ်အိုတ် သွက်ဂွံကၠောန်အာ (၂) ထိၚ်ဒဝ်မၚ်မွဲအာ ပရေၚ်ထတ်ယုက် (၃) ဗီုပြၚ်ပေါဲဗတိုက် တုဲတုဲကၠုၚ်တေံဂှ် လ္ပဗတိုက်တုဲ ညံၚ်ဂွံကၠောန်အာ ဗီုပြၚ်ပေါဲဗတိုက်တၟိတၟိဂှ် ဗကန်ဏာနွံကီုရ။
ဒပ်ပၠန်ဂတးဍုၚ်မန် MSRF မၞုံသၟဝ်ပၠတရဴပရေင်ဍုင်ကွာန် ကံင်ဇြဳဖေဝ်ဒရေဝ်ဍုင်မန် MSFC ဝွံ ဒက်ပတန်လဝ် နူကဵုသက္ကရာဇ် (၂၀၂၂) နကဵုဒြဟတ်သၟတ်မန် ညးမိက်ဂွံပၠန်ဂတးတၠအဝဵုပၞာန်တံတုဲ နူကဵုအခိၚ်တေံ စဵုကဵုအခိၚ်လၟုဟ် လုပ်ဂွံပေါဲဗတိုက် ဗၞတ် (၃၀) ပေါဲပြၚ်ရောၚ် ဂွံတီကေတ်ရ။
