ပ္ဍဲတ္ၚဲကောန်ဂကူမန် မာ် (၁) စွေက်ဂှ် ၜိုန်ရဘာဟွံကၟာတ်ကၠာလေဝ် နကဵုဓဝ်သမ္တီဇကုကဵုဇကု ကွးဘာတံ ဟွံတိုန်ဘာအိုတ်ရောင် မိမတံကဵု ကွးဘာတံ ဟီုရ။

“စိုပ်ကၠုင်မာ် (၁) စွေက် တ္ၚဲကောန်ဂကူမန်တှ်ေ ဘာဂှ် ၜိုန်ရဟွံကၟာတ်လဝ် ဓဝ်သမ္တီကွးဘာတံကဵု ကွးဘာတံရ ဍေံတံဟီုလဝ်ကဵု အ္စာဍေံတံဒတုဲ၊ တ္ၚဲကောန်ဂကူမန်ဂှ် ဟွံတိုန်ဘာပုဟ် နကဵုအ္စာဘာ တံလေဝ် ဟွံဒၞာပုဟ် ဇှ်ရ ကွးဘာတံ ဟွံတိုန်ဘာပုဟ်” သာ်ဝွံ နာဲဟာန်သိုဝ် မိမကွးဘာ ကဆံင် တန်သၠုင် ဍုင်မတ်မလီုဂှ် ဟီုရ။

ပ္ဍဲဒေသရးဍုင်မန်ဝွံ ဇၟာပ်စိုတ်တ္ၚဲကောန်ဂကူမန် မာ် (၁) စွေက်မ္ဂး နကဵုအလဵုအသဳ အုပ်ဓုပ်ဍုင် အဆက်ဆက်တံ ၜိုန်ရဟွံကၟာတ်ဘာ၊ ဟွံကၟာတ်ကဵုရုင် ဗွဲမလုပ်သၞောဝ်ကၠာလေဝ် ကောန်ဂကူမန် ဗွဲမဂၠိုင်ဂှ် ဟွံအာရုင်၊ ဟွံအာကမၠောန်၊ ဟွံအာဘာအိုတ်ရ။

“တ္ၚဲမာ်(၁)စွေက်(တ္ၚဲကောန်ဂကူမန်)ဂှ် ပိုဲဟွံတိုန်ဘာပုဟ် ဟီုလဝ်ကဵုအ္စာၝောံပိုဲတုဲတုဲမံင်ရ၊ အ္စာၝောံပိုဲဟီုဂှ် ဇရာ(တန်တဴ)ကဵုဗှ်ေတံရ၊ ဗှ်ေမိက်ဂွံတိုန်လေဝ်ဂွံ၊ ဟွံမိက်တိုန်လေဝ်ဂွံ ပၟိက်ဗှ်ေတံ အ္စာပိုဲကဵုပိုဲ တေက်ဟီုလဝ်တုဲတုဲရ၊ ဘာဗွဲမဂၠိုင်ဂှ် ဗီုဏံဖအိုတ်ရ၊ မာ်(၁)စွေက်ဂှ် မၞိဟ်ဂွံတိုန်ဘာ ဟွံမွဲပုဟ် မန်ပိုဲမွဲဓဝ်ဟွံသင် သီုဗၟာ(ကွးဘာဂကူဗၟာ)လေဝ် ဟွံတိုန်ပုဟ်” မိအီကျေဝ် (ဗလေတ်လဝ်ယၟု) ကွးဘာ ၁၁ တန် ဘာလတူဍုင်မုဟ်ဍုင်ဂှ် ဟီုပၠန်ရ။

ဇၟာပ်စိုပ် တ္ၚဲကောန်ဂကူမန်လၟေင်င်သၞာံဂှ် ကွးဘာတံ ဟွံတိုန်ဘာဂၠိုင်တုဲ အ္စာဘာဂမၠိုင်တံလေဝ် ဒိုအ်ဟွံဂွံ ဒးတိုန်ဘာကီုလေဝ် ဟိုတ်နူကွးဘာတံ ဟွံတိုန်ဘာဂှ်တုဲ ဟွံဂွံဗ္တောန်လိက်ရောင်ဂှ်လေဝ် ကွးဘာတံဟီုရ။

တ္ၚဲကောန်ဂကူမန် မရနုက်ကဵု(၇၈)ဝါ သၞာံဏံဂှ် သ္ပဟိုတ်ကဵုအကာဲအရာပရေင်ဍုင်ကွာန် ပရေင်ပၞာန်တုဲ ကဆံင်ဗဟဵုကီု၊ ကဆံင်ပွိုင်ဍုင်ဂမၠိုင်ကီု၊ ကဆံင်ပွိုင်တိုက် ကေုာံ ကွာန်အရာပ်တံ ဗွဲမဂၠိုင်ဂှ် ကၠောန်ခ္ဍန်ဖျေံလဝ် အစဳအဇန်အိုတ်ရ။

တ္ၚဲကောန်ဂကူမန်ဂှ် တုပ်ဗီုကဵုတ္ၚဲကောန်ဂကူတၞဟ်ဟ်ကီု ညံၚ်ဂွံသ္ပစၟတ်သမ္တီကဵု နကဵုတ္ၚဲကၟာတ်ရုင်၊ ကၟာတ်ကမၠောန်ဂှ် ကမ္မတဳကၠောန်ဗဒှ်တ္ၚဲကောန်ဂကူမန်တံကီု ဂကောံမန်ဗွဲမဂၠိုင်တံကီု ပတိုန်ထ္ၜး အာတ်မိက်ကၠုင် ဇရေင်အလဵုအသဳဗၟာတုဲတုဲကၠုၚ်တေံအဆက်ဟွံပိုတ်သ္ကုတ်ကၠာလေဝ် စဵုကဵုတ္ရဲဏံ ဟွံဂွံဒုင်သ္ပစၟတ်သမ္တီ ဗွဲမလုပ်သၞောဝ်ဏီရ။