ကိုန်စဳဇန် ရပ်သီကွဳစက်၊ ကွဳလိုန်ဓာတ်တ္ၚဲဏံဂှ် အစဳဇန် ရပ်သီအပ္ဍဲသ္ၚိ ဟွံမွဲဏီရောၚ် ညးတာလျိုၚ်သကိုပ်ဗၠာဲသၟိၚ်ဍုၚ်မန်မွဲတၠ ဟီုဂးလဝ်ဂှ် ညးတာလျိုၚ် ဗော်ပရေၚ်ဍုၚ်ကွာန်မန်မွဲတၠ ဟီုလဴထ္ၜးရ။

အစဳဇန် စၟဳစၟတ်ရပ်သီကွဳစက်၊ ကွဳလိုန်ဓာတ်ဂှ် လတူဍုၚ်ကီု၊ ဒေသအကြာကွာန်ဂမၠိုၚ်ကီု ရပ်သီဒၟံၚ်သိၚ်သိၚ်ဖိုဟ်တုဲ ဒဵုကဵုရပ်သီ အပ္ဍဲသ္ၚိနွံမာန်ဟာဂှ် ညးဍုၚ်ကွာန်ဗွဲမဂၠိုၚ် ဒှ်မံၚ်ဂဝိၚ်အိုတ်ရ။

“ဗီုသကိုပ်ဗၠာဲသၟိၚ်တအ် ဟီုဂှ်တှေ် အစဳဇန်ညးတအ် ရပ်သီ ဒဵုကဵုအပ္ဍဲသ္ၚိဂှ် ဟွံမွဲဏီပုဟ် လတူဍုၚ်၊ အကြာပါၚ်ကွာန်ဇၞော်ဇၞော်တံဂှ်နွံ၊ အဆံၚ်ဒဵုကဵု လုပ်ရပ်ပ္ဍဲသ္ၚိဂှ် ဟွံမိၚ်ဏီပုဟ်” သာ်ဝွံ ညးတာလျိုၚ်ဗော်ပရေၚ်ဍုၚ်ကွာန်မန်မွဲတၠ ဟီုထ္ၜးရ။

အစဳဇန်ရပ်သီကွဳစက်၊ ကွဳလိုန်ဓာတ်ဂှ် နူလတူဍုၚ်ဂှ် ထပ်သၠဲပ္တိတ်အကြာပါၚ်ဂၠံၚ်လုပ်တိတ် ကွာန်ဇၞော်ဇၞော်လ္ၚဵုတအ်ဂှ်တုဲ ညးဍုၚ်ကွာန်ဗွဲမဂၠိုၚ် ဒှ်ဂဝိၚ်ဖေက်လုပ်ရပ်သီ အပ္ဍဲသ္ၚိတုဲ အာစွံလဝ်ကွဳစက် အကြာကၠအ်လေဝ် နွံရ။

“ဍေံရပ် ကာ၊ ကွဳလိုန်ဓာတ် အလန်ဏံဂှ် တေၚ်အိုတ်ရ၊ သီဏောၚ် တက်ဒန်လေဝ်တေၚ်အိုတ်ဏောၚ်၊ ပရိုၚ်ဂှ်လေဝ် သ္ကာတ်မြဟ်မံၚ်တှေ် ကာလိုၚ်ဇြေန် ဟွံမွဲလ္ၚဵုဂှ်တှေ် ဂွိၚ်ဖေက် ဍေံသီပ္ဍဲသ္ၚိတုဲ အာစွံလဝ်ကာ ပ္ဍဲကၠအ် အဒေါဝ်ဗြဲ လေဝ်နွံမံၚ်ပေၚ်ထာတ်” သာ်ဝွံ ညးဒေသပွိုၚ်ဍုၚ်မုဟ်ဍုၚ်မွဲတၠ ဟီုရ။

တၠကွဳစက်လ္ၚဵုဂှ် ဒှ်ဂဝိၚ်ကဵု ဂကောံစၟဳစၟတ်ရပ်သီကွဳစက်တအ် ကၠုၚ်ရပ်သီပ္ဍဲသ္ၚိတုဲ အာစွံလဝ်ကွဳစက် ပ္ဍဲကၠအ် အဒေါဝ်ဗြဲဂှ်တုဲ အခိၚ်ဗြဲဂူတရိုပ်ဒၟံၚ်လၟုဟ်ဏံဂှ် ကွဳစက်လ္ၚဵု စက်ဟွံၚုဟ်လေဝ်နွံရောၚ်ဂှ်လေဝ် ညးဒေသဂှ် ဆက်ဟီုရ။

ပ္ဍဲကဵုကိုန်စဳဇန် စၟဳစၟတ်ရပ်သီ ကွဳစက်၊ ကွဳလိုန်ဓာတ် လိုၚ်ဇြေန်ဟွံမွဲတအ်ဂှ် မၞိဟ်လ္ၚဵုဂှ် ဗက်ကဵုဩန်ဂတာပ်တုဲ ဗလးကဵုနွံ၊ မၞိဟ်လ္ၚဵုဂှ် နုက်ပတိတ်မၞိဟ်နကဵုဩန်တုဲ ကွဳစက်၊ ကွဳလိုန်ဓာတ်ဂှ် ဒးဒုၚ်သီနွံ၊ မၞိဟ်လ္ၚဵုဂှ် ကွဳစက်၊ ကွဳလိုန်ဓာတ်လေဝ် ဒးဒုၚ်သီ၊ မၞိဟ် ဒးဒုၚ်ရပ်စုတ်ထံၚ်လေဝ်နွံရ။

အစဳဇန် စၟဳစၟတ် ရပ်သီ ကွဳစက်၊ ကွဳလိုန်ဓာတ် ပ္ဍဲဍုၚ်မန်ဝွံ စတမ်နူဂိတုမေ (၃၀) ဂှ် စရပ်စၟဳစၟတ်တုဲ ဒဵုကဵုလၟုဟ်ဏံ စၟဳစၟတ်ရပ်ဒၟံၚ် သိၚ်သိၚ်ဖိုဟ်ရောၚ် ဂွံတီကေတ်ရ။