နူကဵုဂကောံရပ်လွဟ်ဒဳကေဗဳအေ ကေုာံ ဗော်ကေအေန်ယူ မထိၚ်ဒဝ်လဝ် ပ္ဍဲဍုၚ်ကျာ်ပိတအ်ဂှ် စနူဂိတုဂျူလာၚ် စၟတ်တ္ၚဲ (၂၅) ဂှ်တုဲ ကၟာတ်ကၠေံလဝ်အခေါင် သွံရာန် ဍာ်တၞးၝာဲကထီု ကော်ဂး ဍာ်တၞးဘိင်ဂမၠိုင်ရောင် ဂွံတီကေတ်ရ။
အတိုင်ညးမစုက်လုက်ဒၟံင်ဂကောံရပ်လွဟ် နွံလ္တူဍုင်ကျာ်ပိမွဲတၠလဴထ္ၜးကၠုင်လဝ်မ္ဂး စနူဂိတုဂျူလာင် စၟတ်တ္ရဲ ၂၅ စဵုကဵု ၂၈ ဂှ် ညံင်ဂွံကၟာတ်ကၠေံကဵု ပရေင်သွံရာန်ဍာ်တၞးၝာဲကထီု ကော်ဂး တၞးဘိင်မာန် ကဵုလဝ်စၞောန် ကုဆေင်ဖျာမသွံရာန်မံင်တအ်ဂှ်တုဲ ယဝ်ဟွံဒ္ဂေတ်ဗက်မ္ဂး ရဲသွံ ထံင် (၆) သၞာံ၊ ရဲရာန်သုင် ထံင် (၃) သၞာံ ကဵုအာဒုဟ်ဒဏ်ရောင် ကဵုလဝ်သတိရ။
ဟိုတ်နူစၞောန်အမိင်မတိတ်ကၠုင်နူဂကောံရပ်လွဟ်တအ်သာ်ဂှ်တုဲ ညးသုင်ဍာ်တၞးဂမၠိုင် ဒေါံဟာ၊ ဟွံဒေါံဟာဂှ် ဟွံတီဏီကၠာလေဝ် ဆေင်ဖျာမသွံရာန်ဒၟံင်ဍာ်တၞး လ္တူဍုင်ကျာ်ပိ ဗွဲမဂၠိုင်တအ်ဂှ် ကၟာတ်ထောံလဝ်ဖ္အိုတ်ရောင် ညးမသုင်ဒၟံင်ဍာ်တၞး နူလ္တူဍုင်ကျာ်ပိမွဲတၠ ဟီုလဴကၠုင်ရ။
မတုဲကၠုင် နူဂိတုဂျူလာၚ် စၟတ်တ္ၚဲ (၂၃) တေံဂှ် ညးဒေသ ပ္ဍဲဍုၚ်ကျာ်ပိ (၃) တၠ သုၚ်လဝ်ဍာ်တၞးၝာဲကထီု (တၞးဘိင်) ဂှ်တုဲ ဝိုတ်ဒၟံၚ်ဂှ်ရ ဓရိပ်ပ္တိုန်ဏာရုၚ်ဂဥုဲ ကွာန်ၜဝ် (ကျွန်းချောၚ်း) ကီုလေဝ် ပရိုက်လမျီုဟွံမာန် မ္ဒးချိုတ်ကၠုင်လဝ် သီု(၃) တၠနွံရောင် ဂွံတီကေတ်ရ။
ပ္ဍဲညးဒေသ မချိုတ်အာ ၃ တၠတံဂှ် နူကဵုအ္စာဂဥုဲတံ က္လေင်စၟဳစၟတ်သတ်ယဲတုဲ ဆဵုဒးယဲဂြိုဟ်ကှ်၊ ကသအ်ဗၠိုက်ဍာ်၊ ယဲဂြိုဟ်ဂုဟ်၊ ယဲကၟက်ဂြိုဟ်ကီု သီုကဵုယဲခန္ဓတၞဟ်ဟ်တံ နွံဒၟံင်ဏီကၠာလေဝ် သ္ဂောံအိုတ်အာလမျီုမြဴသာ်ဝွံဂှ် ဆက်စပ်ဒၟံင်ကဵု သုင်ဒၟံင်ဍာ်တၞးၝာဲကထီု (တၞးဘိင်) တၟာဂလိုင်ရောင် ညးတီလဝ်ပရူဒဒှ်ဂှ်မွဲတၠ ဟီုလဴကၠုင်ရ။
ဒုင်သ္ဇိုင်ကဵုပရေင်ပရူမမံက်တိုန်ကၠုင်သာ်ဂှ်တုဲ ဆေင်ဖျာမသွံရာန် ကေုာံ ညးမသုင်ဒၟံင် ဍာ်တၞးၝာဲကထီု (တၞးဘိင်) တအ်သီုဖ္အိတ် ညံင်ဟဂွံသွံရာန်၊ ညံင်ဟဂွံဆက်သုင်မာန် ဂကောံရပ်လွဟ်ဒဳကေဗဳအေကဵု ဗော်ကေအေန်ယူတအ် ပ္တိတ်ကၠုင်လဝ်စၞောန်ရောင် ဂွံတီကေတ်ရ။
ပ္ဍဲလ္တူဍုင်ကျာ်ပိဂှ် သၟတ်စနူအဝဲအာယုက် ၁၂ သၞာံ စဵုကဵု ၆၀ သၞာံပြင်တအ် မၞိဟ်တြုံ မၞိဟ်ဗြဴဟွံရုဲ သုင်ဒၟံင်ဍာ်တၞးၝာဲကထီု (တၞးဘိင်) ဗၞတ် ၈၀ က္ဍိုပ်ကၠံနွံတုဲ ကြဴနူကဵုဂကောံရပ်လွဟ်တအ် ပ္တိတ်ကၠုင်စၞောန်သာ်ဂှ်တုဲဗက် အပ္ဍဲပွိုင်ၜါပိတ္ရဲဏအ် မၞိဟ်ဂွံခွက်ဏာ ခွက်နင်ဒၟံင် ဍာ်တၞးၝာဲကထီု (တၞးဘိင်) ဗီုရဴကၠာတေံဂှ် ဂွံဆဵုဂဗအောန်စှ်ေကၠုင်ကွေံကွေံရောင် ညးဒေသနူလ္တူဍုင်ကျာ်ပိမွဲတၠ ဟီုထ္ၜးကၠုင်လဝ်ရ။
