နူကဵုဂကောံညဳသၟဟ်မန်ယူရောပ် က္ဍိုက်ပ်တုဲ သွက်သၞာံ ၂၀၂၅ ဏအ် ကၠောန်ဗဒှ်လဝ်သဘင်ဥတုကညင် မရနုက်ကဵု ၄ ဝါ ပ္ဍဲကဵုဍုင်နေဝ်တာလာန် တုဲဒှ်အာရ။
သဘင်ဥတုကညင်ဏအ်ဂှ် ရန်တၟအ်ကဵုအလုံကောန်ဂကူမန် မစိုပ်ဒၟံင်ဍုင်ယူရောပ်တအ် သ္ဂောံဆဵုဂဗညးသ္ကအ်တုဲ သ္ဂောံဒက်ပ္တန်ပရေင်ဆာန်ကၟိန်အကြာညးမွဲကေုာံညးမွဲမာန် ကၠောန်ဗဒှ်ကၠုင်ဒၟံင်မွဲသၞာံမ္ဂး မွဲဝါရ။
“ကမၠောန်ဏအ်ဂှ် ပိုဲကၠောန်တွဵု ဂွံဟွံသေင်ပုဟ်၊ ရန်တၟအ်လဝ်ကဵု သၟတ်မန်ကီု မန်နွံမံင် ပ္ဍဲကဵုယူရောပ်တအ် ညံင်ဂွံကောံတုဲ ညံင်ဂွံဒှ် strong community မွဲ မန်ညံင်ဂွံကၟောန် ဓရောန်တိုန် တော်သာ်ဂှ်တုဲတှ်ေ သၞာံဏအ်လေဝ် အစဳအဇန်ဟွံပါမွဲသာ် ကဵုထောံ ကောံဓရီုသၟတ်သက်က်မွဲ ဍေံတအ်ကၠောန်ကေတ်တ်ရ” သာ်ဝွံ ညးတာလျိုင် နူဂကောံညဳသၟဟ်မန်ယူရောပ် နာဲမန်ဝံသ ဟီုရ။
အလဵုအဝဲသၟတ်မန် မစိုပ်ဒၟံင်ယူရောပ်တအ်လေဝ် ပါလုပ်ကၠုင် ပ္ဍဲကဵုသဘင်ဥတုကညင်ဏအ် နဇိုင်နတဲ ဂၠိုင်တိုန်ဂှ် ဒှ်တင်တၟေင်မွဲရောင် ညးဆက်ဟီုရ။
တုဲပၠန် ပ္ဍဲကဵုသၞာံဏအ်ဝွံ လၟိဟ်မၞိဟ် ၈၇ တၠ တိုန်စိုပ်ကၠုင် ဒၞါဲကၠောန်ဗဒှ်သဘင် ဍုင်နေဝ်တာလာန် ပ္ဍဲဂိတုဂျူလာင် စၟတ်တ္ရဲ ၂၃ ဂှ်တုဲ တၟော်ကဵုသၞာံမကၠောန်လဝ်တုဲတုဲတအ်မ္ဂး မၞိဟ်တိုန်စိုပ်သဘင်ဥတုကညင် ဂၠိုင်တိုန်ရောင် သ္ဂးရ။
ဗွဲတၟေင် သွက်ကဏ္ဍဟီုတွံဂှ် ဘိက်ကော်လဝ် တၠဂုဏ်အ္စာအဇ္ဇပါလ (ကွးဘာ PhD တက္ကသဵုမဟာစူဠာလံင်ကန်) ကေုာံ မိအိန်ရဳ (ကွးဘာ Master တက္ကသဵုမဟာစူဠာလံင်ကန်) ညးၜါတၠတုဲ ဂွံဟီုတွံလဝ် ဆေင်စပ်ကဵုပရေင်ပညာ နူအစဳအဇန် ဗလး Live မွဲအဆံင်နွံကီုရ။
သဘင်ဥတုကညင်မန်ယူရောပ်ဝွံ ပ္ဍဲသၞာံ ၂၀၂၂ ဂှ် ဍုင်ဒိန်မခ်၊ သၞာံ၂၀၂၃ ဂှ် ဍုင်ဝှေန်လာန်၊ သၞာံ ၂၀၂၄ ဂှ် ဍုင်ဂျာမဏဳ ကေုာံ သၞာံ ၂၀၂၅ ဏအ် ဍုင်နေဝ်တာလာန် ဒုင်သ္ဇိုင်ကၠောန်ဗဒှ်လဝ်တုဲ သွက်သၞာံ ၂၀၂၆ တေံဂှ် ရန်ဖျေံလဝ်ဗီု ပ္ဍဲဍုင်ဖြာန်သေတ်ရောင် နာဲမန်ဝံသ ဆက်လဴထ္ၜးလဝ်ရ။
ပြဟ်ဟ်ဏအ်ဝွံ မၞိဟ်ဇၞော်ဇၞော်၊ ကွးဘာ၊ ကောန်င္ရာ် သီုဖ္အိုတ် လၟိဟ်ကောန်ဂကူမန် ပွဳပွူ ၂၀၀ တၠပြင် တန်တဴနွံဒၟံင် ပ္ဍဲတိုက်ယူရောပ် မပ္တံကဵုဍုင်ဒိန်မခ်၊ နေဝ်တာလာန်၊ ဝှေန်လာန်၊ ဖြာန်သေတ်၊ ဂျာမဏဳ၊ နဝ်ဝေ၊ သွိဒေန်၊ အဝ်သတြဳတအ်ရောင် ဂွံတီကေတ်ရ။
