အခိၚ်ကမ္မယှေန်ပၞာန်တအ် ပလေဝ်ပလေတ်ကၠုၚ် သွက်ဂွံကၠောန်ပေါဲရုဲမာဲတ္ၚဲဏံဂှ်ဝွံ မွဲလ္ပာ်ဂှ်လေဝ် စၟဳစၟတ်မံၚ်ညးဍုၚ်ကွာန်အာတရဴကီု၊ စၟဳစၟတ်ရပ်မံၚ်ကွဳစက်ယာန် တေၚ်ဂြတ်မံၚ်ဖိုဟ်ရောၚ် ဂကောံဗော်ညဳသၟဟ်မန်မွဲတၠ ဟီုရ။
“အကြာပေါဲရုဲမာဲဏံဂှ် အဓိက ရဲကောန်ဗော်ပရေၚ်ဍုၚ်ကွာန်တအ်၊ ညးတာလျိုၚ်ဗော်နာနာတအ် ဒးချဳဒရာၚ် နွံဂၠိုၚ်ကၠုၚ်တုဲတှ်ေ ဒးအာကၠုၚ်ဂၠိုၚ်၊ ကြပ်လိုက်ကၠုၚ်ဝှ်ရတှ်ေ ညးဍုၚ်ကွာန်တအ်လေဝ် ဒးအာကၠုၚ်ပရေၚ် ကမၠောန်ဗုၚ်ဂၞဴညးကဵုညး၊ ပရေၚ်ကေၚ်ကာညးကဵုညးဂၠိုၚ်မံၚ်၊ မွဲလ္ပာ်ဂှ်ပၠန် ပရေၚ်စၟဳစၟတ်ညးဍုၚ်ကွာန်တအ် အကြာဂၠံၚ်ဍာန်လေဝ် ဟွံအောန်စှ်ေအာဏီကီု၊ တုဲတှ်ေ ပရေၚ်စၟဳစၟတ် ကွဳစက်ကာ၊ ကွဳလိုန်ဓာတ် တေၚ်ဂြတ်မံၚ်ဏီဖိုဟ်တှ်ေ ညးဒးချဳဒရာၚ် ကိစ္စပေါဲရုဲမာဲကီု ညးဍုၚ်ကွာန်တအ်ကီု အာကၠုၚ်ဒှ်ခက်ခုဲမံၚ်” သာ်ဝွံ ကောန်ဗော်ညဳသၟဟ်မန် နူမုဟ်ဍုၚ်မွဲတၠ ဟီုထ္ၜးရ။
လၟုဟ်မ္ဂး ပေါဲရုဲမာဲ ဒကုတ် (၁) အလန်ပထမဂှ် သွက်ဂွံကၠောန်အာ ပ္ဍဲဂိတုဒဳဇြေမ်ဗာ (၂၈) ရောၚ် ကမ္မယှေန်ပေါဲရုဲမာဲကၟိန်ဍုၚ်တအ် လလောၚ်တြးလဝ်တုဲ ဗော်ပရေၚ်ဍုၚ်ကွာန် လုပ်ပြိုၚ်ရုဲမာဲဂမၠိုၚ် စချဳဒရာၚ်ကၠုၚ် ဗီုပြၚ်ညးကဵုညးနွံတုဲ ကောန်ဗော်ဂမၠိုၚ်တအ်လေဝ် ချဳဒရာၚ်ကၠုၚ် ပရေၚ်ပေါဲရုဲမာဲနွံကၠုၚ်ရ။
ပရေၚ်စၟဳစၟတ်ရပ်ကွဳစက်ယာန် ပ္ဍဲတွဵုရးဍုၚ်မန်ဂှ် လတူဍုၚ်ဇၞော်မ္ဂး ဂၠံၚ်ဇၞော်ပန်သွာၚ် ဂၠံၚ်ဇၞော်ပိသွာၚ်ဂမၠိုၚ်တအ်ဂှ်ကီု၊ ဂၠံၚ်ဇၞော်တိတ်ဆက်စၠောံကဵု လဂုၚ်၊ တိတ်ဆက်စၠောံကဵု တွဵုရးကရေၚ်တအ်ဂှ် သီုဗၠာဲသၟိၚ်၊ သီုဂကောံဒပ်ထိၚ်ဒဝ်စက်ယာန်တအ် စၟဳစၟတ်ရပ်ဒၟံၚ်ကွဳ စက်ယာန် အတိုၚ်တြေံဖိုဟ်ရ။
“ကြပ်ကၠုၚ်ကဵုပေါဲရုဲမာဲရတှ်ေ ပရေၚ်စၟဳစၟတ်အာကၠုၚ်ဂှ် ထေက်ကဵုဒးဖအောန်ဖျေံ ထေက်ရ၊ ပရေၚ်အာကၠုၚ် ဗၠးၜးနွံမှ ဂွံချဳဒရာၚ် လ္ပာ်စန်ဒက်ပေါဲရုဲမာဲသၠဲလးညိ၊ မွဲလ္ပာ်ဂှ် ပံက်ကဵု ပေါဲရုဲမာဲဂးတုဲတှ်ေ မွဲလ္ပာ်ဂှ်လေဝ် ကရပ်ဂရတ်မံၚ်ပရေၚ်အာကၠုၚ်ဖိုဟ်တှ်ေ တုပ်တဴကဵု ကရေပ်ဂရတ်လဝ် ဗော်ပရေၚ်ဍုၚ်ကွာန်တအ် ဂွံချဳဒရာၚ်စန်ဒက်ပေါဲရုဲမာဲကီုရ” သာ်ဝွံ ကောန်ဗော်ဂှ် ဆက်ဟီုရ။
အခိၚ်ကာလချဳဒရာၚ်ပေါဲရုဲမာဲဏံဂှ် ဟွံဖအောန်ဖျေံ ပရေၚ်စၟဳစၟတ်ကွဳစက်၊ ကွဳလိုန်ဓာတ်ဏီဖိုဟ်တုဲ ညးဍုၚ်ကွာန်ကီု၊ ကောန်ဗော်ပရေၚ်ဍုၚ်ကွာန် ဒးချဳဒရာၚ် စပ်ကဵု ပေါဲရုဲမာဲတအ်ကီု ဂွံချဳဒရာၚ်အာကၠုၚ်ဂှ် ဒှ်မံၚ်ခက်ခုဲအိုတ်တုဲ ဟီုကရောတ်မံၚ်ဂှ် ဂွံမိၚ်ကေတ်ရ။
အစဳဇန် စၟဳစၟတ် ရပ်သီ ကွဳစက်၊ ကွဳလိုန်ဓာတ် ပ္ဍဲဍုၚ်မန်ဝွံ စတမ်နူဂိတုမေ (၃၀) ဂှ် စရပ်စၟဳ စၟတ်တုဲ လၟုဟ်မ္ဂး ပေၚ်ကၠုၚ် ပွိုၚ် (၂) ဂိတုပြၚ်ကၠုၚ်ရလေဝ် ဆက်စၟဳစၟတ်ရပ်မံၚ်ဖိုဟ်ရောၚ် ဂွံတီကေတ်ရ။
0 Comments