ဒဒန်ဆက်စၠောံၜဳဝၚ်ရော ပ္ဍဲကွာန်သၞေဟ်သြောံ၊ ပွိုၚ်ဍုၚ်လှာဒကှ်၊ မၞုံလ္တူဂၠံၚ်အဓိကအာကၠုၚ်ဒၟံၚ် ကျာ်ပိ-မုဟ်ဍုၚ်ဂှ် ဟိုတ်နူလအ်ကၠုၚ်ကဵုသၞာံအခါတုဲ ဆုဒဒန်ဂမၠိုၚ် အိုဟ်လီုလာ်ကၠုၚ်ဒၟံၚ်ဂှ်ရ နကဵုညးဒေသလှာဒကှ်တအ် စဳဇန်ကၠုၚ်သွက်ဂွံပလေဝ်အာဒဒန်နွံဂှ် ဂွံတီကေတ်ရ။
ပြဟ်ပြဟ်ဏံ သွက်ဂွံပလေဝ်ပလေတ်အာဒဒန်မာန်ဂှ် မ္ဒးရာန်တဴအာဆုဂမၠိုၚ် လျိုၚ်ဗၞတ် ၁၀ တန်ပြၚ်နွံတုဲ နကဵုညးဒေသတအ်သၟး ဖ္ဍိုက်ဗပေၚ်ထံက်ပၚ်ဟွံမာန်ဂှ်ရ ခက်ခုဲဒၟံၚ်ကဵုသြန်ရောၚ် ညးအုပ်ဓုပ်ပွိုၚ်တိုက်တအ် သ္ဂးရ။
ဟိုတ်ဒှ်သာ်ဂှ်ရ နကဵုဂကောံအုပ်ဓုပ်ပွိုၚ်တိုက်ကီု ဂကောံဖောအ်ဗြေဝ်ဒေသလှာဒကှ်တအ်ကီု ချပ်ဇန်ဖျေံကၠုၚ်သ္ဂုတ်သွာတ် သွက်ဂွံဗ္ဒဗ္ဒါဲအာ သြန်ဒါန်အကြာ တၠကွဳစက်ကွာ်တရဴတတ်ကၠောံအာကၠုၚ်မံၚ်တအ်တုဲ ပပ္တံနူဂိတုသေတ်တေမ်ဗာ စၟတ်တ္ရဲ ၈ ဂှ် ကွဳစက်ကာဍောတ်မွဲဖ္ဍိုက်မ္ဂး ပိလ္ရီဒကေဝ်၊ ကွဳစက်ကာဇၞော်မွဲဖ္ဍိုက်မ္ဂး မသုန်လ္ရီဒကေဝ် ကံက်ဗက်ဒုၚ်ကၠုၚ်မံၚ်ဒါန်နွံရောၚ်ဂှ် ဥက္ကဌကွာန်သၞေဟ်သြောံ ဟီုလဴလဝ်ရ။
“ဒဒန်ဂှ် သိုၚ်ဂွံလဝ် ပွိုၚ်(၁၅)ယျတှ်ေ အိုဟ်မံၚ်ယျ။ အိုဟ်မံၚ်ယျတှ်ေ ပကောံလှုဲ ဒုၚ်ဒါန်တုဲပလေဝ်ဏောၚ်ရန်လဝ်။ ကာဇၞော်တှ်ေ မွဲဖ္ဍိုက် မသုန်လ္ရီ၊ ကာဍောတ်တှ်ေ မွဲဖ္ဍိုက် ပိလ္ရီ တတ်မွဲတ္ရဲဂှ်။ ဠဂွံဆုတှ်ေ ပံက်စက်သၠုဲရမျာၚ်တုဲ သွက်ဂွံဆက်ဒုၚ်ဒါန် အကြာကွာန်နွံမံၚ်။ ၜိုတ်ဇြဟတ်သြန်နွံဂှ် ပလေဝ်အာဏောၚ်” သာ်ဝွံ သ္ဂးလဝ်ကဵုဌာန်ပရိုၚ်ဗၠးၜးမန်(IMNA)ရ။
အခိၚ်လၟုဟ်ဏံမ္ဂး နကဵုညးအုပ်ဓုပ်ကွာန်တအ် ပွမဒုၚ်ဒါန်ဒၟံၚ်သြန်ကီု ပွမပကောံပကေဝ်ဒၟံၚ်ဆုတအ်ကီု ကၠောန်သ္ပဒၟံၚ်တုဲ ကၠာဟွံစိုပ်ဂိတုဝှ်ဏံမ္ဂး စချဳဒရာၚ်ပလေဝ်ပလေတ်အာရောၚ် သ္ဂးရ။
ဒဒန်ဝွံ ဟိုတ်နူကွဳစက်ကာတအ် တတ်ကၠောံအာကၠုၚ်ဂၠိုၚ်ကီု ဟိုတ်နူလအ်ကၠုၚ်ကဵုသၞာံအခါကီုတုဲ ကတဵုကေုာံ ဆုဒယိုၚ်ဒဒန်တအ် အိုဟ်ဂၠိုၚ်ကၠုၚ်မံၚ်ဗွဲမဂၠိုၚ်တုဲ မွဲသၞာံၜါဝါ ဒးပလေဝ်ပလေတ်ကၠုၚ်မံၚ်အရိုဟ်ရိုဟ်သၞာံရ။
ကၠာအခိၚ်ဟွံသီအဝဵုဏီဂှ် သွက်ဂွံပလေဝ်ဒဒန် ဂွံကၠုၚ်ဒၟံၚ်သြန်ဂအုံ နူအလဵုအသဳ ကေုာံ ဗော်ဍုၚ်မန်တၟိတအ်ကီုလေဝ် လက်ကရဴဏံ ဟိုတ်နူပရေၚ်ဍုၚ်ကွာန်ရုသံၚ်ဒၟံၚ်ဂှ်ရ လ္ပာ်လဵုလေဝ် ဟွံကလိဂွံသြန်ဒါန်မွဲသာ်တုဲ နအလဵုညးဒေသတအ်ဟေၚ် ဒးပလေဝ်ဒၟံၚ်ကေတ်ကေတ်ရောၚ်ဂှ် ဆက်ဟီုလဝ်ရ။
“ဂွံပလေဝ်ဒဒန်ဂှ် အ္စာလေဝ်နွံမံၚ်ရ ရဲဘိုၚ်လေဝ် နွံမံၚ်ရ သြန်မွဲဓဝ်ရ ခက်ခုဲမံၚ်။ တုဲပၠန်ဂွံပတှ်ေအလဵုအသဳတ္ရဲဏံလေဝ် ပိုဲဟွံဂံၚ်အာတ်ပုဟ်။ အာတ်လေဝ် ညးကဵုဟွံသေၚ်မံၚ်ရ ဟိုတ်နူအကာဲအရာလၟုဟ်ဏံ၊ ၜိုတ်မာန်ကဵုမာန်ဒး ပလေဝ်အာအတိုၚ်ဏံရ” ဥက္ကဌကွာန်သၞေဟ်သြောံ ဟီုရ။
ဒဒန်ဆက်စၠောံၜဳဝၚ်ရော ကွာန်သၞေဟ်သြောံဝွံ ဒှ်ဒဒန်အဓိကမွဲ သွက်သ္ဂောံတတ်ကၠောံအာကၠုၚ်နူဇရေၚ် ဒေသပယျဵုသေံဗၟာ ကျာ်ပိ စိုပ် မတ်မလီုရောၚ်တုဲ ဇၟာပ်ဇၟာပ်တ္ရဲ ကွဳစက်ကာ ဗၞတ်ကၠံမပြၚ်တအ် တတ်ကၠောံအာကၠုၚ်မံၚ်ရ။
ဒဒန်ကွာန်သၞေဟ်သြောံဂှ် ပပ္တံနူသၞာံ ၂၀၁၀ ဂှ် ဒက်ပ္တိုန်သိုၚ်ခၞံကၠုၚ်လဝ်တုဲ ဒဒန်ဝွံ မၞုံတဴဇမၠိၚ်(၄၃၈)ပေ ကေုာံ သၠဲ(၁၆)ပေရောၚ် ဂွံတီကေတ်ရ။
0 Comments