လိက်ရေင်၊ ယက္ခဂုမ္ဘဏ်

ပ္ဍဲကဵုသၞာံ ၂၀၁၇ တေံ အခိင်တၠအဝဵုပၞာန် မေန်အံင်လှာင် ထဍေင်ပတိတ်ဏာ ဂလာရိုဝ်ဟေန်ဂျာ ဟၟဲကဵုလွဟ် ၇ ကိုဋ်ပြင် လ္ပာ်ဍုင်ၜင်္ဂလာထေတ်ဂှ် ဒပ်ပၞာန် AA မကၠတ်ဒက်ပတန်လဝ် ပ္ဍဲလာင်ဇြာ ဌာနဂအုပ် KIA မၞုံပ္ဍဲတွဵုရးဍုင်ကချေင်တေံ ကၠတ်ဇက်စှ်ေကၠုင် ဒေသရခေင် သီုဟၟဲကဵုပရေင်ဒးဒုင် တာဒၞာမွဲသာ် လုပ်ဖျေံသဇိုင် ပ္ဍဲတိဍာ်ရခေင်ရ။

ပရေင်ဒဒှ်ဏအ် ကလေင်သ္ၚဳဂၠိပ်ရံင်မ္ဂး ပရေင်ချဳဓရာင် AA တအ် ညံင်ပရိုင်ဟွံဂွံမံက်တိတ် ဖန်ဇန်လဝ်တုဲ ဒပ်ပၞာန်မေန်အံင်လှာင်ကီု၊ အလဵုအသဳ NLD ကီု ညိဟွံဂွံပရိုင်ဂှ် ဒှ်အစောန်စရာဲ က္ဍိုပ်သကိုပ်ညးတအ် စိစောန်ဟေင်ရောင်။ အစောန်စရာဲဗီုဗီုတအ်ဏအ်ဂှ် ဂကောံ ERO ဝှ်ကြံင်မံင်တအ်လေဝ် ထမံက်ရုပ်ရဴဟွံမာန်ရ။ မုဟိုတ်ဂွံဂံင်ဟီုပါ်ပါဲ လ္တူဂကောံ ERO ဝှ်ကြံင်တအ်ရောမ္ဂး ကလေင်ကျောဝ်ရံင်ဝင် ERO တြေံတြေံတအ်ဂှ်မ္ဂး ခေတ်အဆက်က် က္ဍိုပ်သကိုပ် EROs တအ် ဗီုလဵုချဳဓရာင်မံင်၊ ဗီုလဵုချပ်မံင်ဂှ် သကိုပ်ပၞာန်အလဵုအသဳတံ တီဒၟံင်ဖအိုတ်ရောင်။

ဟိုတ်ဒၟာနူဂှ်ရ လ္တူဍေံတီအကာဲအရာဂှ် ဍေံဗလးဏာမၞိဟ်ဍေံ တက်ကျာမပတံ ပရေင်ၜိုဟ်လလမ် ပရေင်နာနာရ။ သကိုပ်ပၞာန်အလဵုအသဳတအ်ဂှ် ဍေံလ္ၚတ်လဝ် လ္တူက္ဍိုပ်သကိုပ် EROs တံ ဒ္ဂေတ်စရိုတ်ကီု၊ ကသပ်ဂၞန်ကီု၊ ဗီုဖျေံမူဝါဒကီု ဇိပ်ပ်ဂၠိပ်ပ်တုဲ ဗီုလဵုဂွံပါ်ထ္ကးဆီ၊ ဗီုလဵုဒပ်ဂွံပါ်ထ္ကးအာ ဂၠိုင်ကဵုဒပ်ဂှ် ဖျေံဗျူဟာ ချိုတ်တ်ပၠိုတ်တ်ရ။ ဟိုတ်ဂှ်ရ အတိုင်ဗျူဟာဍေံ ဗွဲမအံင်ဇၞး ဍေံကၠောန်သ္ပမာန်ကၠုင်ဒၟံင်ဂှ် ဂွံဆဵုကေတ်ရ။ ပရေင်ဒဒှ်တအ်ဏအ်ဂှ် ဂကောံ ERO ဝှ်ကြံင်အိုတ် ဗီုကဵု KIA ကဵု KNU ဒးဒုင်ကၠုင် ဗွဲမဂိဓဇောတ်ရ။

နူကဵုသၞာံ ၂၀၀၉ တေံ နကဵုအရီုအဗင် KIA က္ဍိုပ်သကိုပ်ဒပ်ပၞာန် AA ထောန်မျာတ်နာင် စဒက်ပတန်ကၠုင် ဒပ်ပၞာန် AA မသ္ၚောဲခြာနူကဵုတိဍာ်ရခေင်ဗွဲမလောန် ပ္ဍဲဒေသကချေင် ဍုင်လာင်ဇြာ ဌာနဂအုပ်ပၞာန် KIA ဂှ် လၟုဟ်ပေင်ကၠုင် ၁၆ သၞာံရ။ ရံင်ကေတ်မ္ဂး က္ဍိုပ်သကိုပ်ဒပ်ပၞာန် AA ထောန်မျာတ်နာင် လ္ၚတ်လဝ်ဝင်ပၠန်ဂတး ပ္ဍဲက္ဍိုပ်သကိုပ် EROs ဝှ်ကြံင်တအ် ဇိပ်ပ်ဂၠိပ်ပ်ရောင်ဂှ် ရံင်ကေတ်ကမၠောန်ညးမ္ဂး ဂွံတီကေတ်မာန်ရ။

အစောန်စရာဲ ထောန်မျာတ်နာင်မွဲပၠန်ဂှ် မေန်အံင်လှာင် ကေုာံ က္ဍိုပ်သကိုပ်ပၞာန်တၠအဝဵုတအ် ဒးဒုင်ဒလုဏာမတ်ကဵု AA တအ်ရ။ ပ္ဍဲကဵုသၞာံ ၂၀၂၃ ဂိတုအံက်တိုဝ်ပါ ၂၇ နူကၠာဟွံစိုပ် “ပရေင်ဝေင်ပၞာန် ၁၀၂၇” ဏီဂှ် AA တံသ္ပပၞပြယာဲ ညံင်ကဵု AA  တအ် မၞုံပၟိက်ဒၟံင်ကဵုပရေင်ၜိုဟ်လလမ် ပ္ဍဲတိဍာ်ဒေသရခေင်တုဲ တက်ကျာဂှ် ဂွံတင်တုပ်စိုတ် ဒေါံပန်ပှ်ောရ။ အခိင်ဂှ် ဒေသတၞဟ်ဟ် ပေါဲဗတိုက်သ္ကာတ်မြဟ်မံင်တုဲ ပ္ဍဲဒေသရခေင် ဝေင်ဒၟံင်သဘင်အတးသင်္ကြာန် ၜိုဟ်ဟ်သြိုဟ်ဟ်ရ။ မေန်အံင်လှာင်လေဝ် ပတိတ်လိက်လလောင်တြး ရုပ်သီကၠေံ ဒပ်ပၞာန် AA ဂှ် နဒဒှ်ဒပ်ပၞာန်ပကီုပရာပ်ရ။ ပေါဲဏံ ဒှ်ပေါဲမေန်အံင်လှာင် ကေုာံ က္ဍိုပ်သကိုပ်ပၞာန်တၠအဝဵုတအ် ဒးအလီပေင်င်ရ။

ပ္ဍဲကဵုအခိင်ကာလ သၞာံ ၂၀၂၁ – ၂၀၂၃ အပ္ဍဲပွိုင် ၂ သၞာံဂှ် ဒှ်အခိင်က္ဍိုပ်သကိုပ်ပၞာန် တၠအဝဵုတအ် ထုဲမံင်ကဵုပရေင်ရပ်စပ် ဗတိုက်သ္အးဒၟံင် ညးဍုင်ကွာန်မဒစဵုဒစးမံင် ပရေင်သီအဝဵု အလုံဍုင်ဂှ် ပ္ဍဲဒေသရခေင်တေံ ဒပ်ပၞာန် AA တအ် ဂစာန်သၠဲ ဇမၞော်ပတိုန် ဒြဟတ်ဒပ်ပၞာန်တုဲ ပလေဝ်ပလေတ်ကၠုင် ပရေင်ပၞာန်ရ။ ဟိုတ်ဂှ်ရ စရာဲဍာ်ဒကေဝ် ထောန်မျာတ်နာင် တတ်ၜက်အာ နူကဵုက္ဍိုပ်သကိုပ် EROs တအ်တုဲ ပ္ဍဲကဵုဝင်ပၞာန်အပ္ဍဲဍုင်ဗၟာဂှ် ဗွဲမတၟေင်တၟဟ် ကေတ်ထ္ၜးကဵုပရေင်အံင်ဇၞးမာန်ကၠုင် စဵုကဵုတွဵုရးဍုင်ရခေင်မွဲ သီကၠေံကြပ်အိုတ်ရ။

ဒဵုကဵုအခိင်လၟုဟ်ဏအ် ပ္ဍဲဂကောံညးက္ဍိုက်ပ် AA ဂှ် သကိုပ်က္ဍိုက်ပ်ပၞာန် ထောန်မျာတ်နာင်၊ ဒု – သကိုပ်က္ဍိုက်ပ်ပၞာန် ညိုဝ်ထောန်အံင် ကေုာံ ညးမၞုံအခေါင်ဟီုဂး ဃာင်တုခတအ် ညးဍုင်ကွာန်ဂမၠိုင် တီညာတ်ဍုက်ကေဝ်ကၠုင် ပ္ဍဲဂၠံသြိုဟ်အိုတ်ရ။ ဗွဲစၟတ် လက်ကရဴ က္ဍိုပ်သကိုပ် ၃ တၠဂှ် ဂကောံက္ဍိုပ်သကိုပ် မဒက်ပတန်လဝ် ဗွဲမကၟောန်ဓရောန်ဗိုန်ဗတ် မပတံအဆံင်ဒုတိယ ကေုာံ အဆံင်တတိယတအ် ဒးနွံဟေင်ရောင်။ ဒပ်ပၞာန် AA ဂှ် ဒှ်ဒပ်ပၞာန်မၞိဟ်မ္ၚး ခါတ်အကာဲဝါတ် မွဲဒပ်ရောင်။ ဣဏအ်ဂှ် ဒှ်စရာဲဍာ်ဒကေဝ် က္ဍိုပ်သကိုပ် AA တအ် မလးလဝ် ဗျူဟာပၞာန် သွက်ဂွံလုပ်ပေါဲဗတိုက်ပၟိက်ဇၞော် ကုတၠအဝဵုပၞာန် ဒြဟတ်မဇၞော်နူဇကု ဂၠိုင်ကဵုဆတအ်ဂှ်ရ။

ဒပ်ပၞာန်သီအဝဵုဂှ် ဒးဒုင်ဗတိုက်ဒၟံင်ကဵုဒြဟတ်ပၠန်ဂတး အလုံဍုင်မွဲတုဲ ဒှ်အခိင်ဒပ်ပၞာန်တၠအဝဵုတအ် ဒှ်ဒၟံင်ပရေင်ဆိုအ်ဗ ခက်ခိုအ် ပရေင်ချူဓဇက်ဗျူဟာ၊ ပရေင်တြးဒပ်ရ။ ဒၞာဲဌာန်ဒတန် ကေုာံ ဒြဟတ် EROs၊ ဒြဟတ် PDFs နွံဒၞာဲလဵု၊ နွံဗီုလဵု တီကၠးချိုတ်ပၠိုတ်မှ သ္ဂောံဖျေံသ္ဂုတ်သွာတ် ဒၞာဲမုက်ပၞာန်လဵု ဂွံတြးဖျေံ ဒြဟတ်ဒပ်ပၞာန် ဍာံဍာံပြပြမာန်ရ။ လက်ကရဴဏအ် ဒပ်ပၞာန်တၠအဝဵုဂှ် ကလေင်ထပက်ပၞာန်တုဲ တိဍာ်ဒေသ ဂကောံပၠန်ဂတးတအ် သီလဝ်ဂွံတုဲတအ်ဂှ် ကလေင်သီဂွံနွံရ။ ဟိုတ်ဍေံဂွံကလေင်သီကေတ်မာန်ဂှ် ဟိုတ်နူဒပ်ပၞာန်တၠအဝဵုတအ် စရာဲဍာ်ဒကေဝ်ထံင်ပရိုင် တောတက်သၠုင်တိုန်ကၠုင်ရောင်ဂှ် ထ္ၜးမံင်သက်သဳရ။

ပ္ဍဲကဵုအရာဏအ် ဒပ်ပၞာန် AA ဂှ် ကာလပတိတ်ပရိုင် ဗစိုပ်ညးဍုင်ကွာန်တအ်မ္ဂး ညးမၞုံအခေါင်ဟီုဂး AA ဃာင်တုခ သုင်စောဲတဴနဲကဲ နကဵုညးမွဲတၠဓဝ်၊ မွဲဒၞာဲဓဝ်၊ ဗွဲမဇိပ်ဂၠိပ် ကၟောန်ဟရောန်ဂှ် ဂွံဆဵုကေတ်ရ။ က္ဍိုပ်သကိုပ် ထောန်မျာတ်နာင်ကီု၊ ညိုဝ်ထောန်အံင်ကီု၊ နူကဵုသကိုပ်တမ်ဒပ် AA ကီု ဗီုဒးစိုတ် ဂွံဟီုပတိတ်ဒၟံင်ပရိုင် လ္တူယှိုဝ်ယှေဝ်မဳဒဳယာဂှ် ဟၟဲရောင်။

သအာင်နူဂှ် ကောန်သ္ဂံင်ဒပ်ပၞာန် AA တအ်ဂှ်လေဝ် လ္တူယှိုဝ်ယှေဝ်မဳဒဳယာ ဗီုဓာတ် ကေုာံ တင်နင်ဆေင်စပ်ကဵုပၞာန် ညံင်ဟွံဂွံဗလးဝေင်ဂှ် ဓရတ်လဝ် နကဵုစေဝ်ပၞောန် တေင်င်ဂြတ်တ်တုဲ စက်ယန်ထံင်ပရိုင် ပရေင်နဲကဲပညာ ဒပ်ပၞာန်တၠအဝဵုတအ် ဗက်ဒၞာဲဇိုင်ဟွံဒး ကေတ်ပရိုင် ဆေင်စပ်ကဵုဒပ်ပၞာန် AA တအ် ဟွံလောဲရ။ ဣဏအ်ဂှ် သီုထ္ၜးဒၟံင်သက်သဳ ဒဒှ်ရ အပ္ဍဲဒပ်ပၞာန် AA တအ် ဒြဟတ်ကလင်ပၟိင်ခိုဟ် (Chain of Command) သၟးဟွံက သီုဒှ်ဂကောံ ဂၠံင်တရဴပရေင်ဍုင်ကွာန် အောန်ကဵုနဲကဲဗၠေတ်ဗၠေင်ဂှ် ဂွံဆဵုကေတ်ရ။

တင်နင်ဂမၠိုင်တအ်ဂှ် ဒှ်တင်နင်မဟာဗျူဟာ ပရေင်ပၞာန် ဗွဲမဇိပ်ဂၠိပ် AA တအ် မၞုံကဵုစရာဲဍာ်ဒကေဝ်ဗွဲတၟေင်ရ။ ဂွံဆဵုညာတ်ကေတ် စရာဲဍာ်ဒကေဝ် AA တအ်တုဲ ကလေင်ကျောဝ်ရံင် အလဵုအသဳညဳသၟဟ်ဂကူ (NUG) ကီု၊ ဒပ်ပၞာန်စဵုဒၞာညးဍုင်ကွာန် မၞုံသၟဝ် (NUG) ကီု၊ ဒပ် (PDFs) တအ်ကီု၊ ဂကောံ ERO တအ်ကီုမ္ဂး တင်နင်တအ်ဂှ် တၞဟ်ခြာဒၟံင်ကဵု AA ညံင်ရဴဍာ်ကဵုကၠေင် ဂွံဆဵုကေတ် တင်ၜတ်ဗွဲမဂၠိုင်ရ။

ဗွဲတၟေင်ဒးထံက်ထ္ၜးတင်ၜတ်မ္ဂး ဂကောံ NUG၊ ဒပ် PDFs၊ ဂကောံ ERO တအ်ဂှ် ဂၠာဲပကောံဒၟံင်သြန် သွက်ဒပ်၊ သွက်ဂကောံ နကဵုလ္တူလပှ်ကျာတုဲ ဗီုညးကဵုညး ပံက်လဝ်မုက်လိက် Facebook အိုတ်ရ။ ဒပ်ပၞာန်တၠအဝဵုတအ် အခိင်ကာလလၟုဟ်ဏအ် ရပ်စပ်စကာကၠုင် နဲကဲပညာ ထံင်ပရိုင် လ္တူလပှ်ကျာ အဆံင်သၠုင်ကၠုင်တုဲ ဗွဲမလောဲသွာ ဂွံဏာတင်နင်နာနာ နူမုက်လိက်လ္တူလပှ်ကျာ နူဂကောံ၊ ဒပ်ပၠန်ဂတးတအ်ရ။ ဟိုတ်ဂှ်ရ ဒပ်ပၞာန်တၠအဝဵုတအ် ကလေင်ထပက်ပၞာန်ဂှ် ကလိဂွံကၠုင် ပေါဲအံင်ဇၞးတုဲ ဂကောံပၠန်ဂတးတအ် ဒးဂိကၠုင်ရောင်။

ဆက်ပ္တိုန်ထ္ၜးအာသ္ကုတ် (၃) ပၠန်ရောင် 

က္ဍိပ်သ္ကိုပ်ဗီုညးကဵု ဂၠံင်တရဴရက္ခိတ – သကုတ် (၁)