မိလျးထဝ် – ဒပ်ပၞာန်ကရေၚ် ဒဳကေဗဳအေကဵု ဒပ်ပၞာန်ဗၟာတံ ကတဵုဒှ် ပေဲါဗတိုက် ဇရေၚ်ကွာန်မာကသ ပ္ဍဲဂိတုမေ၂၆ ဏံတုဲ ကောန်ကွာန်တံ ဂြိပ်ဒဴစိုပ်ကၠုၚ် ဍုၚ်ကျာ်ပိဂှ်ရောၚ် ဂွံတီကေတ်ရ။

“မၞိဟ်ဂြိပ်ပၞာန်တံဂှ် ဗွဲမဂၠိုၚ်တှေ် မၞိဟ်ဗျုဗျုတံ ဂၠိုၚ်” သာ်ဝွံ ကောန်ကွာန်မာကသ မွဲတၠ ဟီုတဴရ။

ဟိုတ်နူပေဲါဗတိုက် လတူဍုၚ်ကျာ်ပိ ပ္ဍဲတ္ၚဲပေဲါရုဲမာဲတုဲဂှ်တုဲ ညးဍုၚ်ကွာန်တံ ဂြိပ်ဒဴလုပ် လပါ်တိဍာ် ဗော်ဍုၚ်မန်တၟိ သာ်ဏံရ (ဗီု - ဌာန်ပရိုၚ်ဗၠးၜးမန်)

ဒပ်ပၞာန်ကရေၚ် ဒဳကေဘဳအေ သဝ်အေဝါန် ကေုာံ သဝ်သာန်အံၚ်တံ က္ဍိုက်က္ဍိုပ်ဂှ် ပံၚ်ညးသကအ် တုဲ ဇြဟတ်ပၞာန် ၜိုတ် (၁၀၀) ပြၚ် လၟုဟ်စိုပ်မံၚ် ဇရေၚ်ကွာန်မာကသရောၚ်ဂှ် ကောန်ကွာန်မာကသတံ ဟီုရ။

ညးဂြိပ်ဒဴတံဂှ် လၟုဟ် စိုပ်မံၚ် ပ္ဍဲဘာလကျာ်ကရေၚ် ဓမ္မဟေဝန် ဍုၚ်ကျာ်ပိ ၜိုတ် (၃၀) အိန်ထံၚ်တုဲ လ္ၚဵုတံဂှ် စိုပ်မံၚ် ပ္ဍဲအရာပ် (၄) ဍုၚ်ကျာ်ပိအိုတ်ရောၚ်ဂှ် ကောန်ဍုၚ်ကျာ်ပိတံ ဟီုရ။

ကွာန် (မာကသ) ဝွံ ကွာန်တြေံ ကွာန်တၟိ မၞုံၜါကွာန်တုဲ ခြာမံၚ်ကဵု ကြုၚ်မွဲတၞုၚ်ရ။ သ္ၚောဲခြာနူဍုၚ်ကျာ်ပိ ၜိုတ် ၄ တိုၚ်တုဲ လၟိဟ်သ္ၚိ မၞုံၜိုတ် ၂၀၀ ရ။

အလဵုအသဳဗၟာတံ က္တဵုဒှ်ဓဝိၚ်ကဵု ဒပ်ပၞာန်ဒဳကေဘဳအေတံ ကလေၚ်ဗတိုက်သီကေတ် ဍုၚ်ကျာ်ပိတုဲ သွက်သ္ဂောံထပ်ဗပေၚ်ဇြဟတ်ပၞာန် လတူဍုၚ်ကျာ်ပိကီု သွက်သ္ဂောံထပက်ပၞာန်ကဵု ဒပ်ပၞာန်ကရေၚ် (ကေအေန်ယူ) ကီုဂှ် ထပ်ဗလးလဝ်ပၞာန် သွက်သ္ဂောံဇက်တိုန် ဍုၚ်ကျာ်ပိရ။

“နူတနေံ (ဂိတုမေ ၃၀) ဏံ ကောန်ပၞာန်ဗၟာ နူဒပ် ခမရ (၅၆၆) ၜိုတ်ကၠံ ဇက်ကၠုၚ်ပၞာန် စိုပ်ကၠုၚ်ဍုၚ်ကျာ်ပိ” သာ်ဝွံ နူဗွိုၚ်ဗော်ဍုၚ်မန်တၟိ ဟီုရ။
ပ္ဍဲသၞာံ ၂၀၁၀ ဂိတုနဝ်ဝေမ်ပါ ၈ ပ္ဍဲတ္ၚဲပေဲါရုဲစှ်မာဲ တုဲဒှ်ဂှ်လေဝ် ဒပ်ပၞာန်ကရေၚ် ဒဳကေဘဳအေ ဟွံဒုၚ်တဲ ဒပ်ပၞာန်မၚ်ပယျဵု ကေုာံ ဒပ်ပၞာန်ကရေၚ် ကေအေန်ယူတံ ပံၚ်တုဲ လုပ်ဗတိုက် ဒပ်ပၞာန်အလဵုအသဳ လတူဍုၚ်ကျာ်ပိရ။

အခိၚ်ဂှ်မ္ဂး ညးဍုၚ်ကွာန် လ္တူဍုၚ်ကျာ်ပိတံ ဂြိပ်ဒဴဘဲပၞာန် စိုပ်အာ လ္ပာ်ဍုၚ်ကျာ်ပိ သြၚ်သေံတုဲ လ္ၚဵုဂှ် ဂြိပ်စိုပ်ကၠုၚ် လ္ပာ်တိဍာ်ဗော်ဍုၚ်မန်တၟိ ကွာန်ဂူၜဴအိုတ်ရ။