မုက်လိက်ပရေင်မၞိဟ် မဆက်စပ်ဒၟံင်ကဵု ကမ္ပဏဳဒပ်ပၞာန်ဗၟာ Mytel လၟိဟ်ၜိုတ် (၁၀၀၀) အကံက်ပြင်တအ်ဂှ် နူကဵု Facebook ကၟာတ်ပလီုထောံလဝ်နွံရောင် တ္ရဲဏအ် (ဂျာန္နဝါရဳ ၉) ဂကောံ Justice For Myanmar (JFM) လလောင်ပ္တိတ်ပရိုင်ရ။
ပ္ဍဲကဵုအကံက်၊ Group၊ မုက်လိက် ဒးဒုင်ကၟာတ်ကဵု Facebook ဗၞတ် (၁၀၀၀) ပြင်င်တအ်ဂှ် မုက်လိက် ကမ္ပဏဳ Mytel၊ ညးစၞး Mytel ကေုာံ ဆေင်သွံ Mytel တအ် ပါလုပ်တုဲ ဒှ်ဇီုကပိုက်ကဵု ဒပ်ပၞာန်ဗၟာနွံဇၞော်ဇၞော်ရောင် ဂကောံ JFM တအ် ချူဓမံက်လဝ်ရ။
Facebook ဂှ် ကမ္ပဏဳ Meta ဖျေံသ္ဇိုင်အမေရိကာန် ပိုင်ပြဳလဝ်တုဲ ကိစ္စသ္ဂောံကၟာတ်ပလီုကဵုမုက်လိက်သာ်ဏအ်မာန်ဂှ် နူကဵုဂကောံ JFM တအ် တေင်ဗ္စိုပ်လဝ်လိက်ရောင် ဂးရ။
ဆဂး စဵုကဵုအခိင်ချူပရိုင်ဏအ်တုဲ မုက်လိက်မၞုံယၟု (Empower My မြန်မာ) မချူပ္တိုန်ဒၟံင် ဆက်စပ်ကဵုပရူ Mytel တအ် သာ်လဵုရေင်တၠုင်ဒ္တုဲဒၟံင်ဖဵုကဵုသွက်ဗွိုင်မှာဇန်ဂမၠိုင်ဂှ် လုပ်ဗဵုဂွံမံင်ဖိုဟ်လေဝ်နွံတဴရ။
ပရေင်ကမၠောန် ဇာနှိက်ဆက်စၠောံ Mytel ဏအ်ဂှ် ကမ္ပဏဳဒပ်ပၞာန်ဗၟာ Myanmar Economic Corporation (MEC)၊ ကမ္ပဏဳဒပ်ပၞာန်ဍုင်ဗဳယေတ်နာမ် Viettel Global Corporation ကေုာံ ခရိုဝ်နဳအပ္ဍဲဍုင်တအ် ပါလုပ်ပိုင်ပြဳ ဓလိုက်လဝ်တမ်ရိုဟ်တုဲ နကဵုယၟု Telecom International Myanmar ဂှ် ပံင်တောဲဓမံက်ဒၟံင်ရုပ်ရဴရ။
ဒှ်သာ်ဂှ်ရ နကဵုဒပ်ပၞာန်ဗၟာဂှ် နူကဵုဇာနှိက်ပရေင်ဆက်စၠောံ Mytel မွဲအဆံင် ဗက်ထံင်မံင်ပရိုင် ညးရပ်စကာဇာနှိက်ဂမၠိုင်နွံသၟးဟွံက သီုကဵုဂွံဒၟံင်ပရဲသြန်ဗွဲမဂၠိုင်ကီုရောင် JFM ထံက်ထ္ၜးလဝ်ရ။
