မာံသုတ – ပရေၚ်ဆဵုဂဗ ဗော်ဍုၚ်မန်တၟိ ကေုာံ ညးရေၚ်တၠုၚ် ပရေၚ်ၜိုဟ်လလမ်တံဂှ် ဂွံညာတ်ကေတ် တၠုၚ်လအာခိုဟ် သွက်သ္ဂောံထပ်သဳကၠဳကဵု ပရေၚ်ၜိုဟ်လလမ် ကုအလဵုအသဳရောၚ် သာ်ဝွံ ညးမပါလုပ် ပ္ဍဲဂကောံညးရေၚ်တၠုၚ် ပရေၚ်ၜိုဟ်လလမ်မွဲတၠ ဟီုရ။

သွက်သ္ဂောံဒှ် ပရေၚ်သဳကၠဳ ကုဗော်ဍုၚ်မန်တၟိဂှ် သကိုပ်ဝန်ဇၞော်တွဵုရးမန် ဥူအုၚ်မျေတ် ဗလးနၚ် ဌာန်ဂအုပ်ဗဟဵု ဗော်ဍုၚ်မန်တၟိ မၞုံပ္ဍဲကၞောတ်ၜဳရေဝ် ကုညးရေၚ်တၠုၚ် ပရေၚ်ၜိုဟ်လလမ် ၅ တၠတုဲ ဆဵုဂဗသဳကၠဳ ပွိုၚ် ၂ တ္ၚဲရ။

“ဂွံဟီုသောဲသောဲဗြောဲဗြောဲဂှ် အခိၚ်ဟွံစိုပ်ဏီပုဟ်။ ဒးဟီုသရောပ်တှေ် ဒဵုကဵုစိုပ်ကၞောတ်ပရေၚ်ဍုၚ်ကွာန် ပရေၚ်ဆဵုဂဗသဳကၠဳဂှ် ဒးအာဏောၚ်။ ဂွံအာစိုပ်ကဆံၚ်ဂှ်လေဝ် ဇဳဒိုဟ် ဂစာန်မံၚ်ရ” သာ်ဝွံ ညးမရေၚ်တၠုၚ် ပရေၚ်ၜိုဟ်လလမ်မွဲတၠ ဟီုရ။

ညးမရေၚ်တၠုၚ် ပရေၚ်ၜိုဟ်လလမ်တံဂှ် ပ္ဍဲဂိတုနဝ်ဝေမ်ပါ ၁၂ ဂှ် စိုပ်ဌာန်ဂအုပ်ဗဟဵု ဗော်ဍုၚ်မန်တၟိတုဲ ဆဵုဂဗကဵု ကေၚ်ကာဗဟဵု ဗော်ဍုၚ်မန်တၟိ ဥက္ကဌနာဲထဝ်မန် ဍိုက်က္ဍိုပ်တုဲ ပ္ဍဲနဝ်ဝေမ်ပါ ၁၅ ဂှ် ကလေၚ်စဴအာအိုတ်ရ။

ပ္ဍဲဂကောံ ညးစၞး သကိုပ်ဝန်ဇၞော် ဥူအုၚ်မျေတ် မဗလးနၚ်တံဂှ် ညးမဒှ်ကေၚ်ကာဗဟဵုတြေံ ဗော်ဍုၚ်မန်တၟိ နာဲဒေန်အံၚ်၊ ကမ္မတဳဗဟဵုတြေံ နာဲသဵုမျေတ်တံ ပါလုပ်တုဲ နူဗော်ဒဳမဵုကရေသဳ ကောန်ဂကူမန် ကေၚ်ကာဗဟဵု နာဲသိုက်လောန်၊ ဒံက်တာမေန်ဂျဳဝေန် (ကော်) အာစာသဝ်ဟံၚ်ဍုၚ် ကေုာံ ကျာ်ဇၞော်ကအ်ပလိုၚ် ပွိုၚ်ဍုၚ်ကျာ်မြဟ် ဘဒ္ဒန္တကေတုမာလာ (ကော်) ဂုဏ်ဂျုက်တံ ပါလုပ်အိုတ်ရ။

တၚ်ပြၚ်နၚ်အရေဝ် သွက်သ္ဂောံသဳကၠဳ ပရေၚ်ၜိုဟ်လလမ်ဂှ် နကဵုဗော်ဍုၚ်မန်တၟိ သဳကၠဳအာ နကဵုကံၚ်ဇြဳ ဖိတ်ဒရေဝ် ညဳသၟဟ်ကောန်ဍုၚ်အရၚ် UNFC ဟေၚ်ရောၚ်ဂှ် ကေၚ်ဟီုကၠုၚ်လဝ် နွံရ။

ညးစၞးဗော်ဍုၚ်မန်တၟိ နာဲတၠညး ဍိုက်က္ဍိုပ်တံဂှ် ပ္ဍဲဂိတုအံက်တဝ်ဗာ ၆ ဏံ ဗွဲပဏာမ ဆဵုဂဗသဳကၠဳကဵု ညးစၞးအလဵုအသဳ တွဵုရးမန် ဝန်ဇၞော်ပရေၚ်ဂီုကၠီု ကေုာံ ကေၚ်ကာပယျဵု သကိုပ်ဗိုလ်ဇၞော် ဌေမျေတ်အံၚ် ဍိုက်က္ဍိုပ် ပ္ဍဲခလရ ၆၁ ဍုၚ်ရေဝ်တုဲ လလောၚ်တြးကၠုၚ် တၚ်တုပ်စိုတ် ဟွံမွဲကၠုၚ်ရ။

အကြာသၞာံ ၁၉၉၄-၉၅ ဂှ် အလဵုအသဳပၞာန်နဝတ ကေုာံ ဗော်ဍုၚ်မန်တၟိတံဂှ် သွက်သ္ဂောံဒေံါပန်ပှော် သဳကၠဳကၠုၚ် ပွိုၚ်မွဲသၞာံဘာ်တုဲ ပ္ဍဲဂိတုဂျုန် ၂၉၊ သၞာံ ၁၉၉၅ ဂှ် ဒေံါကၠုၚ်ပန်ပှော်ရ။ ပ္ဍဲဂိတုသေပ်တေမ်ပါ ၁၊ သၞာံ ၂၀၁၀ ဂှ် ဒေံါပန်ပှော် လီုကၠုၚ်ရ။ ၜိုန်ဂှ်လေဝ် မွဲလပါ်ကဵု မွဲလပါ် စဵုကဵုတ္ၚဲဏံ ဟွံပန်ပှော် ညးသကအ်ဏီရ။