မိလျးထဝ် – လိက်ဂျာနေဝ် “သံလွၚ်တိုၚ်းမ်း” ဖျေံလဝ်သဇိုၚ်လ္တူဍုၚ်မတ်မလီုဂှ် အဓာန်ဂတ သွက်ဂွံ တြးပတိတ်အာ ၂ သတ္တဟ မွဲဝါမာန်ဂှ် ပတိုန်လဝ်လိက် ကုရုၚ်စၟဳစၟတ်လိက်ပတ်တံရဂှ် သ္ကိုပ်အယ်ဒဳတာ နာဲဆာန်တိ ဟီုရ။

“ဂိတုဂျူလာၚ် ၄ တုဲကၠုၚ်ဏံဂှ် ပိုဲပတိုန်လဝ်၊ ဆလအ်မှဂွံအခေါၚ်ဂှ်လေဝ် ဟွံတီဏီပုဟ်၊ ဂွံအခေါၚ်ဏောၚ်ဟီုတှေ် ၂ သတ္တဟမွဲဝါညံၚ်ဂွံပတိတ်မာန်ဂှ် စဳဇန်လဝ်ရ” သာ်ဝွံ ညးဆက်ဟီုရ။

အတိုၚ်ပတိတ်ဒၟံၚ် မွဲဂိတုမွဲဝါဂှ် ဟိုတ်နူပရိုၚ်တံ လ္ဇုဲလောန်အာတုဲ ညံၚ်ဂွံပတိတ်ကဵု ၂ သတ္တဟ မွဲဝါဂှ် ပုရိဿာတ် ဗှ်လိက်တံ ကဵုကၠုၚ်ကသပ်နွံရ။

“အ္စာပရိုၚ်ပိုဲဂှ်လေဝ် အောန်၊ ဆဵုဂဗဂှ်လေဝ် အောန်မံၚ်ဏီတုဲ ပရိုၚ်ဒေသစုၚ်စုၚ် ပရိုၚ်ပရောစုၚ်စုၚ်တံ ပိုဲဍဟွံစိုပ်ဏီ” သာ်ဝွံ ဂကောံအယ်ဒဳတာ “သံလွၚ်တိုၚ်းမ်း” နာဲမေန်မေန် ဟီုရ။

လိက်ဂျာနေဝ် “သံလွၚ်တိုၚ်းမ်း” ဂှ် ပြဟ်ဟ်ဏံ လၟိဟ်ကၞပ်ပတိတ်ဒၟံၚ် ၃၀၀၀ ကၞပ်တုဲ၊ မွဲကၞပ်မ္ဂး ၅၀၀ ဒကေဝ် သွံဒၟံၚ်ဂှ် အပ္ဍဲတွဵုရးဍုၚ်မန်ဂှ် သွံခိုဟ်အိုတ် ဂွံတီကေတ်ရ။

“သံလွၚ်တိုၚ်းမ်း” ဂှ် ဒှ်တိုက်ဂျာနေဝ် လ္တူဍုၚ်မတ်မလီု မွဲဟေၚ်ဒှ်တုဲ အဓိကတြးပတိတ်ဒၟံၚ် တွဵုရးဍုၚ်မန်၊ တွဵုရးကရေၚ် ကေုာံ ပရိသာတ်မၞုံဒၟံၚ် လ္ပာ်ဒေသရးတနၚ်သဳတံရတုဲ အပ္ဍဲဂျာနေဝ်ဂှ်ဝွံ စပ်ကဵုကဏ္ဍ ပရေၚ်ဍုၚ်ကွာန်၊ ပရေၚ်မၞိဟ် ကေုာံ ပရေၚ်ပိုန်ဒြပ်တံ ပါလုပ်ရ။

ပ္ဍဲဂိတုမာတ်ချ် ၃၁ လောန်ကၠုၚ်ဏံဂှ် ဂျာနေဝ် “သံလွၚ်တိုၚ်းမ်” တံဂွံကၠုၚ်အခေါၚ်တုဲ ပ္ဍဲဂိတုမေ ရ ဂှ် စတြးပတိတ်ကၠုၚ်တုဲ ဂိတုဏံဂှ် တြးပတိတ်ကၠုၚ်လဝ် ပေၚ်အာ ၃ ကၞပ်ရ။