မာံတဵုလွဳ – သွက်သ္ဂောံဂွံပၟတ် ပ္ဍဲကွာန်ထုၚ်အိုၚ်၊ ပွိုၚ်ဍုၚ်ဖာအၚ်၊ တွဵုရးကရေၚ်ဂှ် ကမ္မတဳကဵုပၟတ်ကွာန်တံ ဗက်လဝ်သြန် နူကောန်ကွာန်တံတုဲ ကလေၚ်သောၚ်စရၚ် ဟွံမာန်ဂှ်ရ ကောန်ကွာန်တံ တေၚ်လဝ်ကဵုပွိုၚ်ဍုၚ်ရောၚ် ဂွံတီကေတ်ရ။

ဟိုတ်နူထ္ၜးစရၚ် သြန်လုပ် သြန်တိတ် ဟွံမာန်ဂှ်ရ ပ္ဍဲဂိတုနဝ်ဝေမ်ပါ ၁၂ ဂှ် နာဲကောန်ဗၠာဲ အာက္ဍိုပ် သ္ပညးစောဲဂဗုတ်တုဲ တေၚ်လဝ်ပ္ဍဲရုၚ်သၞောဝ်ဓဝ် ပွိုၚ်ဍုၚ်ဖာအၚ် ကုဥက္ကဋ္ဌတြေံ နာဲအံၚ်သိုၚ် ကေုာံ ဥက္ကဋ္ဌတၟိ နာဲဘယှိုဲ နူဂကောံကဵုပၟတ်ကွာန်တံဂှ်ရ။

“ဥက္ကဋ္ဌ ကမ္မတဳကဵုပၟတ်တံဂှ် ဒှ်မံၚ်ဥက္ကဋ္ဌကွာန်ရ၊ ဥက္ကဋ္ဌကွာန် အဆက်ဆက်တံဂှ် ညးတံစၠောံတဲတုဲ ဟွံသောၚ်လဝ်စရၚ်သြန် ၂၇၃ ကိုဋ်၊ ညံၚ်ဂွံသောၚ်ကဵု ညးစၞးကောန်ကွာန်တံ စရၚ်သြန်ဍာံဍာံပြပြ ပ္ဍဲရုၚ်ဂှ် ညးစၞးအရာပ်တံ အာတ်မိက်မံၚ် ဂၠိုၚ်ဂၠိုၚ်ကဵုဝါရ” သာ်ဝွံ ညးဍိုပ်က္ဍိုပ်စောဲဂဗုတ် နာဲကောန်ဗၠာဲ ဟီုရ။

သ္ပပတမ်နူဂိတုမာတ်ချ် သၞာံ ၂၀၀၇ တေံဂှ် ကၠောန်ကၠုၚ် ပရေၚ်တောဲဒလောဲပၟတ်၊ ပရေၚ်ဗ္ဂပ်သ္ၚိမဳ တာတုဲ ၜိုန်ရဂွံမံၚ်ပၟတ်ကီုလေဝ် ပရေၚ်ကိစ္စလှုဲလှာ် ခက်ခုဲဒၟံၚ် ပ္ဍဲကမ္မတဳကဵုပၟတ်ကွာန်ဏီရောၚ်ဂှ် ကောန်ကွာန်တံ ဟီုအိုတ်ရ။

စရၚ်သြန်ကံက်လဝ် နူကွာန်ထုၚ်အိုၚ် အရာပ် ၉ အရာပ်တံဂှ် ထ္ၜးကဵုဟွံမာန်တုဲ လၟုဟ်မသြန်လေဝ် ဟွံသှေ်ရရောၚ်ဂှ် ဂွံတီကေတ်ရ။

သွက်သ္ဂောံဂွံပၟတ် ပ္ဍဲကွာန်ထုၚ်အိုၚ်ဂှ် နူသ္ၚိ ၈၅၁ အိန်ထံၚ် ကံက်ကေတ်လဝ် မွဲသ္ၚိမ္ဂး အလန်ကိုပ်ကၠာ ၁ ကိုဋ်၊ အလန်ဒုတိယ ၅ ဠက်၊ အလန်တတိယ ၁ ကိုဋ် သီုဖအိုတ် ၂ ကိုဋ်ဘာ်ရ။

စပ်ကဵုကိစ္စဝွံတုဲ ပ္ဍဲဂိတုနဝ်ဝေမ်ပါ ၂၉ ဂှ် နူကဵုဂကောံဒပ်ပၞာန်ညးဍုၚ်ကွာန် ကွာန်ထုၚ်အုၚ် စၟဳစၟတ်ကၠုၚ်လဝ် ဥက္ကဋ္ဌ နာဲဘယှိုဲ ကေုာံ ကမ္မတဳကဵုပၟတ်ကွာန် နကဵုသၞောဝ်ပိုဒ်ဇၞော် (၁၀၂) ရောၚ် ဂွံတီကေတ် နူရုၚ်အုပ်ဓုပ်ကွာန်ရ။

နကဵုနာဲဘယှိုဲဂှ် ညးဆက်ကေတ်တာလျိုၚ် သောၚ်ကလးကဵု ကိစ္စလှုဲလှာ်ဂှ်ရောၚ် မဒှ်တုဲ သြန်တံဂှ် သုၚ်စောဲလဝ် သွက်ကမၠောန်ဖောအ်ဗြေဝ်ကွာန်ရောၚ်ဂှ် ညးဟီုလဴကဵု ဌာန်ပရိုၚ်ဗၠးၜးမန်ရ။