ခတ္တာနန် – မိစဴဗု (ဂကောံအစောန်စရာဲညးဗြဴမန်) မဖျေံသ္ဇိုၚ် ပ္ဍဲဍုၚ်မတ်မလီု၊ တွဵုရးဍုၚ်မန်ဂှ်ဝွံ ပ္ဍဲဂိတုဂျူလာၚ် (၂) ဏံ သ္ကိုပ်ဝန်ဇၞော်တွဵုရးဍုၚ်မန် ကဵုဏာအခေါၚ် ဗဗွဲဓဝ်ယျရောၚ်ဂှ် ညးအုပ်ကာနာနာ ဂကောံမိစဴဗု မိမိုဝ်ဝ် ဟီုရ။

“သွက်ဂွံပ္တိုန်အခေါၚ်မာန်ဂှ် ဗီုပြၚ်ဒက်ပ္တန်ဂကောံ၊ ဂကောံကမ္မတဳရေၚ်တၠုၚ်ကမၠောန်ဂှ် အောန်နူ (၉) တၠကီု ဂၠိုၚ်နူ (၁၅) တၠကီု ဟွံဂွံရ။ သၞာဲဒဴအလဵုအသဳတံ ပါလုပ်ဟွံဂွံရ။ တၚ်ပိုၚ်ခြာတၞဟ်တံလေဝ် နွံမံၚ်ကီုရ” သာ်ဝွံ မိမိုဝ်ဝ် ဟီုရ။

မိစဴဗု (ဂကောံအစောန်စရာဲညးဗြဴမန်) ဂှ်ဝွံ ပ္ဍဲဂိတုအံက်တဝ်ဗာ၊ သၞာံ (၂၀၁၂) လောန်ကၠုၚ်ဂှ် ပ္တိုန်လဝ်အခေါၚ် စရၚ်ဂကောံဗဗွဲဓဝ် မဒှ်ရ။

ဂကောံမိစဴဗုဝွံ သွက်ညးဗြဴမန်ဂမၠိုၚ်တံဂှ် အစဳအဇန် ပရေၚ်ပညာ၊ ထံက်ပၚ်ပရေၚ်ထတ်ယုက်၊ ပရေၚ်ကဵုရီုဗၚ်ချိုတ်ဂျိုၚ်ဂမၠိုၚ် သ္ပအဓိကတုဲ ရေၚ်တၠုၚ်ကၠောန်အာမံၚ်ရောၚ် ဂွံတီကေတ်ရ။

“ကၠာအခေါၚ်ဗဗွဲဓဝ် ဟွံစှေ်ဏီဂှ် ပရေၚ်ချဳဓရာၚ်တံ ၜိုဟ်ဟ်ရ။ လၟုဟ် ဂွံဗဗွဲဓဝ်ယျတှေ် ကလေၚ်ကော် ကောံဓရီု EC ရ။ ကလေၚ်ကော် ကောန်ဂကောံပွိုၚ်ဍုၚ်သီုဖအိုတ်တံဂှ်တုဲ ဒးကလေၚ်ဂ္ဇံကောမံဓရီုရ” သာ်ဝွံ မိမိုဝ်ဝ် ဆက်ဟီုရ။

ကောံဓရီုကမ္မတဳဗဟဵု ဂကောံမိစဴဗု (ဂကောံအစောန်စရာဲညးဗြဴမန်) ဂှ် ကၠာဟွံဂွံစိုပ် တ္ၚဲဂိတုဒ္ဂိုန်ပေၚ်ဏံမ္ဂး ကၠောန်ဗဒှ်အာရောၚ် ဂွံတီကေတ်ရ။

သွက်သ္ဂောံဒှ်ကောန်ဂကောံမိစဴဗု (ဂကောံအစောန်စရာဲညးဗြဴမန်) မွဲတၠဂှ် ဒးဒှ်ညးစိုတ်လုပ်စကဵု ကမၠောန်ပရဟိတဂမၠိုၚ်တုဲ ဗပေၚ်တၞးလိက် ပ္တိုန်စရၚ်ကောန်ဂကောံ သီုဗီုရုပ် (၃) ရုပ်မာန်ရ။ ညးပ္တိုန်စရၚ်ဂှ်ဝွံ အယုက် (၁၈) သၞာံ ဒးပေၚ်ရ။ လၟုဟ်ကောန်ဂကောံ အပံၚ်ဖအိုတ် ၜိုတ် (၁၀၀၀) တၠပြၚ်နွံရောၚ် ဂွံတီကေတ်ရ။

နကဵုကောန်ဂကောံမွဲတၠမ္ဂး ဒးစုတ်သြန်ဂအုံထာဝရ (၁၀၀၀၀) ဒကေဝ် မဒှ်တုဲ ယၚ်သြန်ဒါန် (၅၀) တၟံကၠံဂှ် သုၚ်စောဲသွက်ပရေၚ်ချိုတ်ဂျိုၚ် ပ္ဍဲပွိုၚ်ဍုၚ်မဆေၚ်စပ်ဂှ်တုဲ သှေ် (၅၀) တၟံကၠံ ပၠန်ဂှ် ဆက်သုၚ်စောဲအာရောၚ် မဒှ်ရ။

“နကဵုဂကောံမိစဴဗုတှေ် ပွိုၚ်ဍုၚ်တံဂှ် နူကဵုဗဟဵုတိုက်ရိုက် ထိၚ်ဒဝ်လဝ် ဟွံမွဲရ။ ယဝ်ရက္တဵုဒှ်ကၠုၚ် အန္တရာဲသဘာဝတုဲ နွံပၟိက်ကဵုအရီုအဗၚ်တှေ် နူကဵုဗဟဵုတိုက်ရိုက် သွက်ဂွံကဵုရီုဗၚ်ပါလုပ်ဂှ် အစဳအဇန်နွံမံၚ်ရ” သာ်ဝွံ မိမိုဝ်ဝ် ဆက်ဟီုရ။

ပ္ဍဲဂကောံမိစဴဗု (ဂကောံအစောန်စရာဲညးဗြဴမန်) ဂှ် ဥက္ကဌ မိကျေန်တာန်၊ ဒုဥက္ကဌ(၁) မိအေယေန်၊ ဒုဥက္ကဌ(၂) မိခေန်လေဝ်မျေအ်၊ ဒုဥက္ကဌ(၃) မိကောန်ချေတ်တ်၊ ညးအုပ်ကာနာနာ မိမိုဝ်ဝ်၊ ဖက်ဆောညးအုပ်ကာ မိတူဇြာအံၚ် ကေုာံ မွဲပွိုၚ်ဍုၚ်မ္ဂး နကဵုကောန်ဂကောံ (၃) တၠ ဒက်ပ္တန်လဝ်ရ။

မိစဴဗု (ဂကောံအစောန်စရာဲညးဗြဴမန်) ဝွံ ပ္ဍဲဂိတုမာတ် (၄)၊ သၞာံ (၂၀၁၂) လောန်ကၠုၚ်တေံဂှ် စဒက်ပ္တန်လဝ်တုဲ ပရေၚ်ပိုန်ဒြပ်၊ ပရေၚ်ထတ်ယုက်၊ ပရေၚ်ပညာ တွဵုရးဍုၚ်မန်ကီု သီုကမၠောန် ပရေၚ်မၞိဟ်တၞဟ်သၟာၚ်ဂမၠိုၚ် ရေၚ်တၠုၚ်ရီုဗၚ်မံၚ်ရ။