မာံသုတ – ညးမသွံမံၚ်ဂဥုဲချေံ (၂) တၠ အပ္ဍဲအရာပ်အံၚ်မၚ်္ဂလာ၊ ဍုၚ်ရေဝ်ဂှ် ပ္ဍဲအခိၚ်ဗ္တံ ဂိတုဂျူလာၚ် (၂) လောန်ကၠုၚ်ဏံ ရပ်ဂွံဂဥုဲချေံကီု သီုသြန်သွံဂွံလဝ်ဂမၠိုၚ် နတဲရောၚ်ဂှ် ဂွံတီကေတ် နူဒပ်ဗၠာဲသၟိၚ် ဍုၚ်ရေဝ်ရ။

ဂဥုဲၜူမာဲ ကေုာံ ကပေါတ်မဆေၚ်စပ် ရပ်ဂွံနူညးလုလောန်ဒုဟ်ဂမၠိုၚ်ဂှ်ဝွံ စၟဳစၟတ်သီကေတ် ဂတမုက် သ္ကိုပ်ပရေၚ်အုပ်ဓုပ် အရာပ်အံၚ်မေတ္တာကဵု အံၚ်မၚ်္ဂလာရောၚ်ဂှ်လေဝ် ညးတာလျိုၚ်ဗၠာဲသၟိၚ်ဂှ် ဟီုရ။

ညးတာလျိုၚ်ဗၠာဲသၟိၚ်ဂှ်ဝွံ “ညးလုလောန်ဒုဟ်ၜါတၠဏံဂှ် ရပ်ဂွံကရောံ ကပေါတ်သက်သဳတံရ။ အဆက်အဆေန်ညးတံဂှ်လေဝ် ဆက်တုဲ ဂၠိုက်ဂၠာဲဓမံက်မံၚ်ဖိုဟ်ရ” သာ်ဝွံ ဟီုရ။

ညးဒးဒုၚ်ထေၚ်လဝ် ညးလုလောန်ဒုဟ်ဝွံ မဒှ်ကောန် ဥူသိုဝ်ဝေန် မၞံယၟု ကိုဝ်မေန်န်သိုဝ် အယုက် (၂၅) သၞာံ ကေုာံ မဒှ်ကောန် ဥူမျချေတ် မၞံယၟု ဝေယာန်ချေတ် (ကော်) ကိုဝ်ကာ အယုက် (၂၂) သၞာံ ဒၟံၚ်အရာပ်အံၚ်မၚ်္ဂလာ၊ ဍုၚ်ရေဝ်တံ ဍိုက်ကၠုၚ်ကွဳလိုန်ဓာတ်ဂှ် တာဒၞာစၟဳစၟတ်ရံၚ်တုဲ အပ္ဍဲဗုၚ်ကွဳလိုန်ဓာတ်ဂှ် ရပ်ဂွံဂဥုဲချေံ (၁၉) မကီု သီုသြန် (၅၁၀၀၀) ဒကေဝ်ရ။

တုပ်သာ်ဂှ်ကီု ပ္ဍဲဂိတုဂျောန် ၂၇ လောန်ကၠုၚ်တေံဂှ် စၟဳစၟတ်ဂၠိုက်ဂၠာဲ ပ္ဍဲသ္ၚိမေန်သိုဝ်အံၚ် ဒၟံၚ်ဂၠံၚ် (၆) အရာပ်အံၚ်ကုသိုလ်၊ ဍုၚ်ဇြပ်ဗုတုဲ အပ္ဍဲဒၞာဲသတိက်ဂှ် ရပ်ဂွံဂဥုဲၜူမာဲ အက္ခရ်မလိက် WY (၈) မကီု၊ သြန်သွံလဝ် (၅၀၀၀၀) ဒကေဝ်ကီု ကေုာံ ကပေါတ်မဆေၚ်စပ် ပ္ဍဲအရာသုၚ်စောဲ ဂဥုဲၜူမာဲဂမၠိုၚ်ကီုဂှ် ဂွံတီကေတ် နူဒပ်ဗၠာဲသၟိၚ်ဂှ်ရ။

အပ္ဍဲသတ္တဟလောန်ကၠုၚ်တေံဂှ်လေဝ် ပ္ဍဲပွိုၚ်ဍုၚ်ပါ်လၟိုၚ်၊ ဍုၚ်ရေဝ်ဂှ် ရပ်ဂွံဂဥုဲချေံ မၞုံၚုဟ်မး ၜိုတ် (၉၄) ကိုဋ်ဒကေဝ် နွံကၠုၚ်ကီုရ။

ပွမသုၚ်စောဲဂဥုဲၜူမာဲ အပ္ဍဲအကြာသၟတ်ညးဍုၚ်ကွာန်မန်ဂမၠိုၚ်တံဂှ် ဟိုတ်နူဒးဒှ်ကၠုၚ် ဓဝ်ဓဝိၚ်တုဲ နကဵုအလဵုအသဳဗၟာ သွက်သ္ဂောံရပ်စပ်ပသောၚ်ကဵု ဗွဲမစိုပ်တရဴမာန်ဂှ် ဂကောံဒက်ပ္တန်အခေါၚ်အရာမၞိဟ် ပ္ဍဲဍုၚ်မန် လလောၚ်ပ္တိတ်လဝ် လိက်ဒုၚ်စဳရေၚ် ပ္ဍဲဂိတုဂျောန်လောန်ကၠုၚ်ဏံရ။

ပ္ဍဲတွဵုရးဍုၚ်မန်ဝွံ နူဂိတုဂျာန္နဝါရဳ စဵုကဵုဂိတုမာတ် အပ္ဍဲသၞာံဏံဂှ် ဂဥုဲချေံ (၁၀၀၁၅) မ၊ တၞးဘၚ် (၂ ဒဿမ ၃ ကဳလိုဝ်ဂရာမ်၊ ဂဗုတ်ဂဥုဲၜူမာဲ (၁၉) ဂဗုတ်၊ ညးလုလောန်ဒုဟ် (၂၉) တၠ မရပ်ဂွံလဝ်တံဂှ် ဒုၚ်စဳရေၚ်ဏာ ပ္ဍဲကောံဓရီုကၠတ်ထဝ် တွဵုရးဍုၚ်မန်ကီု ဂွံတီကေတ်ရ။

အလုံမွဲကၟိန်ဍုၚ်ဗၟာဝွံ အပ္ဍဲသၞာံ (၂၀၁၂) လောန်ကၠုၚ်တေံဂှ် ဆေၚ်စပ်ကဵု ဂဥုဲၜူမာဲတုဲ သြန် ကေုာံ ၚုဟ်မးကပေါတ် မသီဂွံလဝ် နဒဒှ်ဘဏ္ဍာကၟိန်ဍုၚ် သြန် (၁၃၀၀၀) ကိုဋ်ဒကေဝ်ပြၚ် နွံရဂှ် လလောၚ်ပ္တိတ်လဝ် ပ္ဍဲ Facebook ဂကောံဒပ်ဗၠာဲသၟိၚ် ကၟိန်ဍုၚ်ဗၟာရ။