ညးတိုန်ကောံဓရီုတံတက်စၟတ်သမ္တီ(Facebook)
အတိုၚ်ညးစၞးသီုၜါလပါ်တုပ်လဝ်စိုတ် သွက်ဂွံခၞံအာလိခ်ကသုက်မူအပြောံပါလုပ် ရ တၚ် ညံၚ်သ္ဂောံဒှ် Single Text မွဲမာန် ပံက်အာ ဂကောံရေၚ်တၠုၚ်ကမၠောန် မွဲရောၚ်ဂှ် ပ္ညဳပ္ညပ်သဳကၠဳ ဂွံကၠုၚ် တၚ်တုပ်စိုတ်အိုတ်ရ။
သၞာဲဒဴဇၞော် (MPC) ဥူလှမိုၚ်ယှိုဲဂှ် “သွက်ဂွံဒက်အာဂကောံကမၠောန်ဂှ် မွဲလပါ်တှေ်ညးစၞး (၉) တၠပါလုပ်ဏောၚ်၊ ဒၟာနူမူလ္ၚဵုအခိၚ်ဒးအိုတ်ဒးလဇမံၚ်တံဂှ် ညံၚ်သ္ဂောံတုဲဒှ် ပြဟ်ပြဟ်မာန် ဂွံပ္ညဳပ္ညပ်ညးသ္ကံ ရန်တုဲ သွက်ဂွံဒက်ဂကောံမွဲ တုပ်စိုတ်ရ” ရဴဝွံဟီုရ။
ပေဲါသဳကၠဳ ပ္ဍဲဂိတုမာတ် ၉၊ ၁၀ ဒၞာဲ (MPC) မၞုံ ဂၠံၚ်ယှိုဲလဳ၊ ပွိုၚ်ဍုၚ်ကၟာရတ်၊ ဍုၚ်လ္ဂုၚ်တေံဂှ်၊ ညးက္ဍိုက်ပ်ဂကောံ NCCT နာဲဟံသာ၊ ဒု-ညးဍိုက်ပ်ဂကောံ ပဒဝ်သဝ်ဂွါထူဝေန် ကေုာံ ညးစၞး ဂကောံရပ်လွဟ်ကောန်ဍုၚ်အရေၚ်ဂမၠိုၚ်၊ ဒု- ဥက္ကဌ ဝန်ဇၞော် ဂကောံဓမံက်ရုပ်ရဴပရေၚ်ကမၠောန်ၜိုဟ်လလမ် ဥူအံၚ်မေန် ကေုာံ ညးစၞးဂမၠိုၚ်၊ ကမ္မတဳပရေၚ်ဓမံက်ရုပ်ရဴပရေၚ်ၜိုပ်လလမ်စၠတ်ထဝ်ကောန်ဍုၚ်အရၚ် ဥက္ကဌ ဥူတုၚ်ဇြဝ် ကေုာံ ကမ္မတဳဂမၠိုၚ်၊ ဒု- သ္ကိုပ်ပၞာန်ဇၞော်မျေအ်သဵု ကေုာံသ္ကိုပ်ပၞာန်ဂမၠိုၚ်၊ ညးစၞးစၠတ်ထဝ်ဂမၠိုၚ် ကေုာံ ညးစၞး MPC ကဆံၚ်သၠုၚ်တံ တိုန်စိုပ်လဝ်ဂှ် အပ္ဍဲကဵုလိက်ပရိုၚ်အလဵုအသဳကျူပ္တိတ်လဝ်နွံရ။
ဥူလှမိုၚ်ယှိုဲဂှ် “ ကၠာဂိတုမာတ်ဏအ်ဟွံအိုတ် သွက်ဂွံထပ်ဆဵုဂဗနွံရ၊ ဂကောံရပ်လွဟ် ဟွံပါလုပ် ပ္ဍဲ UNFC တံဂှ်လေဝ် ကော်ဘိက်ကီုဏောၚ်၊ ကာလ ကၠောန်ပေါဲထ္ပက်စၟတ်တဲ ပ္ဍဲဍုၚ်ဖာအၚ်တေံမ္ဂး သီုဖအိုတ် ဂွံဒှ်မွဲကရောံ ဂွံပြေပြံၚ်ကဠိတ်ဠောတ်အာ” သာ်ဝွံ ညးဟီုရ။
ကောန်ဂကောံ NCCT ဒံက်တာသလိုၚ်လျာန်မှုၚ်ဂှ် “ နူကဵုလ္ပါ်ပိုဲဂှ် ချူမူအပြောံတုဲ ကဵုဏာ၊ လ္ပါ်ညးတံဂှ် ကလေၚ်ချူကဵုနၚ်ပၠန်၊ ညးတံချူနၚ်ဂှ် ပိုဲကလေၚ်ပဠေဝ်တုဲ ချူကဵုပြၚ်ဏာပၠန် ကမၠောန်ဂှ်ဍေံဂေတ်မံၚ်တုဲ တုဲဟွံမာန်ဒှ်ကၠုၚ်မံၚ်၊ လၟုဟ်သီုၜါလ္ပါ်ဏံ ပံၚ်ပကောံညးသ္ကံတုဲ ချူခၞံမူအပြောံမွဲမာန်ဂှ် ဒှ်ပရေၚ်တဴတက်မွဲရ၊ အကာဲအရာလၟုဟ်ဟီုတှေ် ၜိုတ် (၅၀)တၟံကၠံ အံၚ်ဇၞးမံၚ်ယျ” ရဴဝွံ ဟီုရ။
သွက်ဂွံထ္ပက်စၟတ်တဲဒေါံပန်ပှော်အလုံဍုၚ် ဒၞာဲဘာအၚ်တေံဂှ် ၜိုန်ရချိၚ်အခိၚ်တ္ၚဲ ဟွံမာန်ဏီဒှ်ကီုလေဝ် အကြာၜါလ္ပါ်ဏံ ညောန်ကြပ်ကၠုၚ်မံၚ် ပရေၚ်တုပ်စိုတ်ရောၚ်ဂှ် ညးဆက်လဴထ္ၜးဏာရ။
0 Comments