နကဵုညးစၞးရဲစုက်လုပ်မွဲကဆံၚ် သွက်ဂွံပတိတ်တၟံကၠောန်ဂၠံၚ်ဂးတုဲ ဂကူကြုက်တံ ကၠုၚ်ရာန်မံၚ်တိဂအာၚ် ဒၞာဲပွိုၚ်ဍုၚ်ရေဝ်ဂှ် ဂွံဆဵုဂွံမိၚ် နူရဲဒေသဆေၚ်စပ်တံရ။

ကၠုၚ်ရာန်လဝ်တိ ဖံက်မံၚ်ဂၠံၚ်ဂှ် ဟွံကဵုအခေါၚ်ပုဟ်၊ ညးတာဒၞာလဝ်ရဂှ် အလဵုအသဳတွဵုရးဍုၚ်မန် ညးလျိုၚ်ပွိုၚ်ဍုၚ်ရေဝ် နာဲလွဳအံၚ် ဟီုရ။

“လ္ပာ်အၚ်ဒၚ်တေံ ဍေံဖံက်မံၚ်ဂၠံၚ်ကဵုစက်ယန္တရာယျ၊ အလဵုအသဳတွဵုရးတံ ဟိုတ်နူကဵုလဝ်အခေါၚ် ဟွံမွဲတုဲ၊ လ္ပဆက်ကၠောန်ရဂှ် တာဒၞာလဝ်ရ” သာ်ဝွံ နာဲလွဳအံၚ် ဟီုရ။

သၟာကမၠောန်ပရေၚ်ပိုန်ဒြပ်ကြုက်တံဂှ် အာတ်အရီုဗၚ်ကဵု ညးဒေသလ္ၚဵုတံတုဲ၊ ပ္ဍဲပွိုၚ်ဍုၚ်ရေဝ် ဗ္ဒာဲ ကွာန်အၚ်ဒၚ်ကဵု ကွာန်ဟာံဂံါ တံဂှ်ကီု၊ လ္ပာ်ပွဳပွူဍုၚ်ခေါဇာတံဂှ်ကီု ရာန်လဝ်တိ ဂၠိုၚ်ကဵုဨကကီုဂှ်လေဝ် ညးဒေသတံ ဟီုရ။

“ဍေံတံ(သၟာကမၠောန်ပရေၚ်ပိုန်ဒြပ်ကြုက်)ကၠုၚ်ရာန်ကေတ်တ် ဟွံသေၚ်ပုဟ်၊ မၞိဟ်ပ္ဍဲကွာန်တံဏံရ ရာန်ကဵုသွက်ဍေံတံ၊ ဍေံကဵုၚုဟ်ဂၠိုၚ်ဂၠိုၚ်တုဲ လ္ၚဵုဂှ် သွံထောံအိုတ်ယျ၊ လ္ၚဵုဂှ် ဟွံဂွံသွံဏီပုဟ်” ဂှ် ရဲကွာန်အၚ်ဒၚ်မွဲတၠ ဟီုရ။

အတိုၚ်ညးတံဟီုဂှ်တှေ် ကုမ္ပဏီပရေၚ်ပိုန်ဒြပ်ကြုက် CONCH ဂှ် ရာန်လဝ်တိ လတူကုန်ဗ္ဒာဲကွာန် အၚ်ဒၚ် ဗၞတ်တိၜိုတ် ၃၇ ဧကဂှ် ကဵုလဝ်ၚုဟ်မးသြန် ၂၂၅၀ ကိုဋ် ပဲါနူဂှ်တုဲ ဒၞာဲကွာန်တၞဟ်ဟ်တံဂှ်လေဝ် ရာန်ကေတ်လဝ်နွံမံၚ်ကီုဂှ် ဂွံတီကေတ်ရ။

အတိုၚ်ဌာန်ပရိုၚ်ဗၠးၜးမန် IMNA အာလ္ၚတ်ဂွံလဝ်မ္ဂး သွက်ဂွံပတိတ်တၟံ ရာန်လဝ်တိဗ္ဒာဲကွာန်အၚ်ဒၚ်ဂှ် သ္ၚောဲခြာမံၚ်ကဵုပြၚ်ၜဳ ဆၜိုတ်ကဝါ်တိုၚ်တုဲ ဖံက်လဝ်ဂၠံၚ်ကြပ်တုဲမံၚ်ရဏောၚ်ဂှ် ဂွံဆဵုကေတ်ရ။

လၟုဟ်ဝွံ ဟိုတ်နူအလဵုအသဳတွဵုရးတံ တာဒၞာလဝ်တုဲ၊ စက်ယန္တရာ သွက်ဂွံကၠောန် ဖံက်ဂၠံၚ်ဂှ် ဒးဒေံါဇူမံၚ် ဗ္ဒာဲပြၚ်ၜဳဂှ်ရ။

ကွာန်အၚ်ဒၚ်(ဒေသဖာလိန်) ဂှ် စုက်ဒၟံၚ်ကဵုၜဳဇၞော်တုဲ သွက်ဂွံပၠောပ်ပတိတ်ဗၞိက် ဆက်စၠောံကဵုဍုၚ်သၟာၚ်ဂှ် ဒှ်ဂၠံၚ်ဍာ် ဒၞာဲခိုဟ်မွဲရ။

လၟုဟ်ကရပ်ကွာန်အၚ်ဒၚ်ဂှ် သွက်ဂွံသိုၚ် ရုၚ်စက်တၟံချးပတိတ်ဓါတ်ပၟတ်လလဳဂးတုဲ ကုမ္ပဏဳ Toyo Thai Group တံ ပလေဝ်ပလေတ်မံၚ် နွံရ။

နူကဵုဍုၚ်သၟာၚ်တံ ကၠုၚ်ရာန်တိဒေသဖာလိန်မ္ဂး ဒးကေတ်အခေါၚ်ကု ညးအုပ်ဓုပ်ကွာန်တံဏောၚ် ဖျေံလဝ်တၚ်သ္ဂုတ်သွာတ် ပ္ဍဲပေဲါကောံဓရီု ဂကောံညဳသာဒေသဖာလိန် ကၠောန်သ္ပလဝ် ပ္ဍဲဂိတုအဝ်ဂါတ် ၂၃ တေံဂှ်ရ။

သၟာပရေၚ်ပိုန်ဒြပ်ကြုက်တံ သွက်ဂွံပတိတ်တၟံတုဲ ရာန်လဝ်တိတအ်ကီု၊ ကမၠောန်ဖံက်ဂၠံၚ်ဂှ်ကီု နူကဵုဗော်ဍုၚ်မန်တၟိ တာဒၞာလဝ်ရောၚ် ဂွံတီကေတ်ရ။