အလုံပွိုၚ်ဍုၚ်ၜါသွာၚ်(တ္ကအ်ခၟိုၚ်) ညံၚ်ဂွံဂတာပ်သၞာံ ၂၀၁၅ ပရေၚ်ပၟတ်ဓါတ်လလဳဂွံတၟးမာန် ရေၚ်တၠုၚ်မံၚ်ဂှ် ပြဟ်ဟ်ဏံ သြန်ဘဏ္ဍာဟွံရုံဂပ်ဏီ သာ်ဝွံဝန်ဇၞော်ကွတ်တဲကွတ်စက်ကေုာံ ပၟတ်လလဳ အလဵုအသဳတွဵုရးဍုၚ်မန် နာဲလွဳအံၚ် ဟီုကဵု ကဵုဌာန်ပရိုၚ်ဗၠးၜးမန် IMNA ရ။

နာဲလွဳအံၚ်ဂှ် “ဘဏ္ဍာလ္ၚဵုဟွံစှေ်ဏီလေဝ်နွံ၊ လၟုဟ်ပြဟ်ဟ်ဏံ ပ္ဍဲကဵုတိုၚ် ၅ တၞုၚ်ဂှ် ဖျေံဂွံလဝ်တိုၚ် ၂ တၞုၚ်ဓဝ်ရ၊ သှေ်မံၚ် ၃ တၞုၚ်ဂှ် ဘဏ္ဍာဟၟဲဏီပုဟ်၊ တန်တဴကဵုသြန်ဘဏ္ဍာ(ဘတ်ဂျက်)တုဲမှ ပိုယ်တံကၠောန်ကမၠောန်ဂွံ၊ အေ အခိၚ်ဂှ်မှ ပၟတ်အခိၚ်လဵုတၟးရောလဴကဵုမာန်” သာ်ဝွံ ဟီုရ။

တုဲပၠန် အလဵုအသဳကၟိန်ဍုၚ်ကေတ်တာလျိုၚ်တိုက်ရိုက်တုဲ သွက်ဂွံဖျေံကဵုဘဏ္ဍာ ဇုက်ပၟတ်လလဳဂွံတတ်ၜဳသြၚ်လောန် နူမတ်မလီုကဵု ၜါသွာၚ်ဂှ် ပ္ဍဲဘဏ္ဍာသၞာံ ၂၀၁၄-၂၀၁၅ ရေၚ်တၠုၚ်ဒၟံၚ်ဖိုဟ် သာ်ဝွံ ဆက်ဟီုရ။

ညးစၞးစၠတ်ထဝ်တွဵုရး နူပွိုၚ်ဍုၚ်ၜါသွာၚ် ဒံက်တာ အံၚ်နာၚ်ဥူဂှ် “ပ္ဍဲသၞာံ ၂၀၁၄ ဏံ ပိုယ်ကၠောန်ပရေၚ်တောဲစၠောံဇုက်ပၟတ်ကၠာဏောၚ်၊ သၞာံ ၂၀၁၅ မ္ဂး တြးအာပၟတ်မာန်ဏောၚ်၊ ချိၚ်လဝ်ဂှ်တှေ် ပ္ဍဲသၞာံဏံတုဲဏောၚ်၊ လၟုဟ်ပြဟ်ပြဟ်ဏံ ဖျေံလဝ်တိုၚ်ပၟတ်တုဲအာ ရ တၞုၚ်တုဲယျဏောၚ်” သာ်ဝွံ ဟီုရ။

နူမတ်မလီု အရာပ်မုဟ်ပန် ဒဵုစိုပ်တ္ကအ်ခၟိုၚ်ဂှ် တောဲဏာဇုက်ပၟတ်(66-KW) ဒှ်တုဲ လတူသြၚ်ဂှ် ပစူတိုၚ်ပၟတ်သၠုၚ် ၆၀ မဳတာ ၂၀ တၞုၚ်၊ ပ္ဍဲၜဳဂှ် ပစူအာတိုၚ်ပၟတ်သၠုၚ် ရ၀ မဳတာ ၂၈ တၞုၚ်၊ တိုၚ်ဇၞော်တာဝါဂှ် ပစူအာ ၃ တၞုၚ်ရောၚ် ဒံက်တာအံၚ်နာၚ်ဥု ဆက်ဟီုရ။

တုဲကၠုၚ်ပ္ဍဲဂိတု မေတေံ ရုဲစှ်လဝ်ဒၞာဲသွက်ဂွံပစူတိုၚ် တတ်ၜဳသြၚ်လောန်ဂှ် ချူဓဇက်လဝ် ဗီုတိလေဝ်တုဲယျရောၚ် ဂွံတီရ။

ပ္ဍဲသၞာံ ၂၀၁၄ ဏံ အတိုၚ်ဌာနဝန်ဇၞော်ပရေၚ်ကောပ်ကာဲမၞိဟ်လုပ်တိတ်ကဵု ဝန်ဇၞော်လၟိဟ်ညးဍုၚ်ကွာန်တံ ကံက်ဂွံလဝ်စရၚ် ပ္ဍဲပွိုၚ်ဍုၚ်ၜါသွာၚ်ဂှ်မ္ဂး ဂကောံကွာန် ၄၅ ၊ လၟိဟ်ကွာန် ရ၈ ကွာန် စရၚ်ကၟိန်သ္ၚိအိန်ထံၚ်ဂှ် ၁.၁ ကိုဋ်၊ လၟိဟ်မၞိဟ် ၁.၂ ကိုဋ် နွံရောၚ် ဂွံတီရ။