“နကဵုပၟိက်ဆန္ဒဥက္ကဌ မူတူသေဖို ထပက်လဝ်စၟတ်တဲဟီုဂှ် ဒှ်မံၚ်ဆန္ဒညးမွဲဓဝ်ဏောၚ်၊ ဟိုတ်နူပၟိက်ဆန္ဒအတိုၚ်ဗော် KNU ဟွံသေၚ်တုဲ ညံၚ်သ္ဂောံကလေၚ်လုပ် UNFC ပၠန်ဂှ် ပိုဲပတိုက်ဖအောဝ်လဝ်ရ” သာ်ဝွံ နဝ်အုၚ်လှဟီုရ။
KNU နုက်တိက်နူကောံဓရီုဇၞော် UNFC ဂှ် ပၟိက်ဆန္ဒညးဂမၠိုၚ်ဟွံပါပုဟ်၊ ပၟိက်ဆန္ဒက္ဍိုပ်သ္ကိုပ်သက်သက်ရဏောၚ် သာ်ဝွံ နဝ်အုၚ်လှ ဆက်ဟီုရ။
ဟိုတ်ဂှ်ရ ဂွိၚ်ဖေက်ဇီုဓဗတ်အာကဵု ပရေၚ်ညဳသာအပ္ဍဲဂကောံ KNU ကဵု ပရေၚ်ပံၚ်တောဲကောန်ဍုၚ်အရၚ်အိုဿီုတံတုဲ ပ္ဍဲစၟတ်တ္ၚဲ ၄ လောန်ကၠုၚ်ဂှ် KWU ပတိတ်လိ်က်လလောၚ်တြးကဵုဏာကသပ် ညံၚ်ဂွံကလေၚ်ပံၚ်တောဲအာကဵုဒပ်ပံၚ်ကောံပၠန် ပတိတ်တြးလဝ်ဂှ် ဂွံဆဵုရ။
စပ်ကဵုကိစ္စဗွဲယာယဳနုက်တိတ်လဝ် နူ UNFC ဂှ် အပ္ဍဲဗော်ပိုဲ အတိုၚ်ကမ္ပတဳဗဟဵုတံ ဖျေံသ္ဂုတ်သွာတ်ဂှ် ပိုဲဒဂေတ်ဗက်အာရောၚ် သာ်ဝွံ ညးအုပ်ကာနာနာ KNU ဗဒဵုသဝ်ကွေဝ်ထူဝေန် ဟီုရ။
ညးတေံဂှ် “ပိုဲနုက်တိတ်လဝ်ဗွဲယာယဳဂှ် ကလေၚ်လုပ်ပၠန်ဟာဂှ်လေဝ် ပိုဲတံရ ဖျေံအာသ္ဂုတ်သွာတ်ဏောၚ်” သာ်ဝွံလေဝ် ဟီုရ။
နကဵုဆန္ဒ နဝ်အုၚ်လှဟီု မိက်ဂွံဗတိုက်ဖအောဝ်ဂှ် မိက်ဂွံကဵုကောန်ဍုၚ်အရၚ်သီုဖအိုတ်ပံၚ်တောဲရ၊ ဒက်ပတန်ပရေၚ်ၜိုဟ်လလမ်ဟီုဂှ် နွံပၟိ်က်ကဵု ပွမကေတ်လျိုၚ်၊ ပွမဒုၚ်လျိုၚ်ကီုတုဲ လ္တူညးဍုၚ်ကွာန်ကောန်ဍုၚ်အရၚ်ဂမၠိုၚ်ဂှ် ညံၚ်ဂွံစ္ဍးနူပွမဒမၠုမတ် အလဵုအသဳတံဂးရ။
ပ္ဍဲဂိတုအဝ်ဂါတ် ၃၁ ဂှ် နူညးစၞးဗော်သွးကောန်ဂကူကရေၚ် KNU ညးတိုန်စိုပ် အဃောသ္ပကောံဓရီုဇၞော် UNFC ဂှ် ဟိုတ်နူလစွံစိုတ်ဟွံကိတ်ညဳ ဆေၚ်စပ်ကဵု ကိစ္စမူဝါဒ UNFC ဂမၠိုၚ်ဂှ်တုဲ ဒေံါဇူကၠေံပ္ဍဲပေဲါကောံဓရီုဇၞော် UNFC ဗွဲယာ ယဳရ။
KNU ၜိုန်ရဗွဲယာယဳၜိုန်ရနုက်တိတ်လဝ် နူ UNFC ကီုလေဝ် အရာဒၞာဲရုဲစှ်လဝ် ကေၚ်ကာဗဟဵု ၁၂ တၠ သွက်သၞာံ ၂၀၁၄-၂၀၁၆ ဂှ် သွက်ဂကောံ KNU တံ UNFC သၠးစွံကဵုလဝ် ၂ ဒၞာဲဖိုအ်ရ။
နကဵုဗော်သွးကောန်ဂကူကရေၚ် KNU ကလေၚ်လုပ်ကၠုၚ် ပ္ဍဲဒပ်ပံၚ်ကောံ UNFC ပၠန်ဏောၚ်ဂှ် စၟဳဒၟံၚ်ရဏောၚ် သာ်ဝွံ ညးအုပ်ကာနာနာ UNFC ခူဥုရေဝ် ဟီုလဝ်ရ။
ကၠာန်သ္ပလဝ်ကောံဓရီုဇၞော် UNFC အလန်ပထမ ဒၞာဲဍုၚ်ဇၚ်မာဲ စနူဂိတုအဝ်ဂါတ် ၂၅ စိုပ် သိတ်တေန်ပါ ၂ -ပွိုၚ် ရ တ္ၚဲဂှ် ညးစၞးဂကောံသီုဖအိုတ် ၜိုတ် ၉၀ တၠပြၚ် တိုန်စိုပ်လဝ်ရ။
