ကၠတ်ထဝ်တွဵုရးဍုၚ်မန် အလန်ပထမ ကောံဓရီုလၟေၚ်နဝမဂှ် ကၠောန်ဗဒှ်ဏာ ပ္ဍဲစၟတ်တ္ၚဲ (၅ – ၈ – ၉) ဂိတု သေပ်တေမ်ဗာ၊ သၞာံ (၂၀၁၄) ပွိုၚ် (၃) တ္ၚဲ၊ ဒၞာဲၝောံခန်ကၠတ်ထဝ်တွဵုရးဍုၚ်မန် အပ္ဍဲအရှာံရုၚ်အလဵုအသဳ တွဵုရးဍုၚ် မန်ဂှ်တုဲ သ္ပဒတန်ဏာ သၞောဝ်ဥပဒေ (၃) စံၚ် ကေုာံ စၟတ်သမ္တီလဝ် ဂလာန်ပတိုန်အလန်ဏံ (အဆို) မွဲပိုဒ်ရောၚ် ဂွံတီကေတ်ရ။
“ဂလာန်ပတိုန်လဝ် အလန်ကၠာတေံ ဟွံပိုတ်သ္ကုတ်ဏီဂှ် မွဲပိုဒ်၊ ပတိုန်လဝ် အလန်ဏံဂှ် (၁) ပိုဒ်တုဲ ဂလာန်ပတိုန် (အဆို) (၂) ပိုဒ် သ္ပစၟတ်သမ္တီလဝ်ရ။ သၞောဝ်ဥပဒေအပြောံ (၃) စံၚ်ဂှ် သ္ပဒတန်ကၠုၚ်လဝ်ရ။ သကိုပ်ဝန်ဇၞော် ဂွံထပက်ကဵုစၟတ်တဲမာန် ပလံၚ်လဝ်ကဵု သကိုပ်ဝန်ဇၞော်တုဲဒှ်အာယျ” သာ်ဝွံ ဥက္ကဋ္ဌကၠတ်ထဝ်တွဵုရးမန် ဥူကျေန်ဖေ ဟီုရ။
စပ်ကဵုဂၠံၚ်ဍာန်ဒဒန်၊ စပ်ကဵုဂဥုဲဒဗျ ကေုာံ ပရေၚ်လွဳလွတ်တိရစ္ဆာန်တုဲ သၞောဝ်ဥပဒေအပြောံ အပ္ဍဲတွဵုရးဍုၚ်မန် ဂွံမံက်ကၠုၚ်မာန်ဂှ် ညးစၞးကၠတ်ထဝ်တံကီု တၠပညာမဆေၚ်စပ်တံကီု တၠပညာဥပဒေကီု သဳကၠဳညးသ္ကအ်တုဲ ပညဳပညပ် သ္ပဒတန်ဏာလဝ်ရ။
“အပ္ဍဲကဵုအၚ်္ဂလက်သန်ကၠတ်ထဝ်ဟီုဂှ် သၟာန်သၟုက်တုဲ ခၠေဝ်သှ်တံကီု ပတိုန်ဂလာန်တုဲ ကဵုဆန္ဒကေတ်တၚ်တုပ် စိုတ်ကီု အတိုၚ်တၚ်တုပ်စိုတ် ဓမံက်ရုပ်ရဴမာန်ဟွံမာန်ဂှ် ပွမမၚ်ရံၚ်အာကီု ပတိုန်ထ္ၜးကသပ်လညာတ် သ္ၚဳဂၠိပ်ပါ်ပဲါ ကီုတုဲ ဒးသ္ပဒတန်အာရ” သာ်ဝွံ ညးစၞးကၠတ်ထဝ် နူပွိုၚ်ဍုၚ်သဓီု ဥူတုၚ်ဇြဝ် ဟီုရ။
အပ္ဍဲကောံဓရီုကၠတ်ထဝ်ဏံဝွံ ပ္ဍဲတ္ၚဲပထမဂှ် သၟာန်ဏာလဝ် (၁၀) တၚ်၊ တ္ၚဲဒုတိယဂှ် (၁၁) တၚ် ကေုာံ တ္ၚဲတတိယဂှ် (၁၂) တၚ် ညးစၞးကၠတ်ထဝ်တံ သၟာန်သၟုက်ဏာတုဲ ဝန်ဇၞော်မဆေၚ်စပ်တံ ကလေၚ်သှ် သောၚ်ကလးဏာရ။
ကၠတ်ထဝ်တွဵုရးဍုၚ်မန်ဝွံ ဂိတုဂျာန္နဝါရဳ (၃၁)၊ သၞာံ (၂၀၁၁) ဂှ် စဒက်ပတန်ကၠုၚ်လဝ်ရ။ လၟုဟ်အာယုက် ကၠတ်ထဝ် ပေၚ်ကၠုၚ် (၃) သၞာံကဵု (၇) ဂိတုပြၚ်ၚ်တုဲ သက္ကရာဇ် (၂၀၁၆) ဂိတုဂျာန္နဝါရဳ (၃၁) တေံမ္ဂး နကဵုညးစၞး ကၠတ်ထဝ်တၟိ ကလေၚ်ဒက်ပတန်အာပၠန်ရောၚ် ဂွံတီကေတ်ရ။
