မိလျးထဝ် – သေဌဳကၠအ်ထၜိုတ် နွံမံၚ်ပ္ဍဲဍုၚ် သူရာတ် မွဲတၠဂှ် ဟိုတ်နူကဵု ဗၜူမံၚ်ဂဥုဲၜူမာဲတုဲ ပန်ထောံ ကောန်က မၠောန်ညး အပ္ဍဲကၠအ်ထၜိုတ် မွဲတၠရ။

ပ္ဍဲကဵုစၟတ်တ္ၚဲ နဝ်ဝေမ်ပါ ၂၇ သဝ်တ္ၚဲ အခိၚ် ၆ နာဍဳ ကဝက်ဂှ် သၟာကမၠောန် မၞုံယၟု နာဲမံၚ်ညဝ် ဇာတိကွာန် လဂေါဝ်အနာၚ် အာယုက် ၃၂ သၞာံဂှ် တၠကမၠောန်ညး ပန်စုတ်နကဵုလွဟ်တုဲ ဒးအာဇိုၚ် ဒးပတိုန်လဝ် ရုၚ်ဂဥုဲရ။

“ကောန်ကမၠောန် ၅ အိန်ထံၚ် မံၚ်ဒၟံၚ် ပွဳပွူသ္ၚိသေဌဳဂှ်ရ၊ အရိုဟ်တ္ၚဲသေဌဳဂှ် ဂၠာဲမံၚ်သၞကဵု ကောန် ကမၠောန်တံရ၊ တုဲပၠန်သီုကဵု ဟီုဘပဠမံၚ် ကောန်ကမၠောန်တံ” သာ်ဝွံ ညးကြပ်ကဵု ညးဒးဒုၚ်ပန်ဂှ်မွဲ တၠ ဟီုလဴထ္ၜးကဵုရ။

သၟာကမၠောန်တံဂှ်ဝွံ မံၚ်ဒၟံၚ်ကဵု ၜါတ် (ဒိုၚ်ဍဴ) တုဲ သွက်ဂွံကၠောန် (ပါတ်သပောတ်) ဂှ်လေဝ် ပတိုန်လဝ်လိက်အိုတ်ရ။

သမ္ဘာနာဲမံၚ်ညဝ် မိမဍေဝ် ဟီုဂှ် “ပိုဲကဵု သေဌဳတံဂှ် မုပြဿနာလေဝ် ဟၟဲမွဲသာ်၊ ဆဂး ညးဟီု မံၚ်ဟဂှ်ရ ဗှေ်တံ လ္ပမံၚ်ရအဏအ် အာထောံနူဏအ်စမ် မွဲနှေအ်အဲပန်ဂစိုတ် ထောံဖအိုတ်၊ တုဲပၠန် ဟိုတ်နူကဵု ညးဗၜူမံၚ်ဂဥုဲချေံ ဂဥုဲၜူမာဲတုဲ ညးပန်ရ”  သာ်ဝွံ ညးဟီုလဴထ္ၜးကဵုရ။

အခိၚ် နာဲမံၚ်ညဝ် ဒးဒုၚ်ပန်ဂှ် စဴကၠုၚ်နူကမၠောန် ကဵုကွဳလိုန်ဓါတ်တုဲ စိုပ်ဂတမုက်သ္ၚိ အဃောစှေ်နူကွဳဂှ် ညးပန်စုတ်ဟဂှ်တုဲ ဒးအာ လ္ပာ်ဒဳပဲါကဵု တဲပဲါ နာဲမံၚ်ညဝ်ရဂှ် ညးဆက်ဟီုရ။

အခိၚ်ဂှ်ဝွံ မိမဍေဝ် တက်ဏာဖုၚ်ကဵု သမ္ဘာသေဌဳဂှ်တုဲ မွဲနှေဂှ် သီုသမ္ဘာညး သီုကွဳစက်ဗၠာဲသၟိၚ် စိုပ်ကၠုၚ်ရ။  ကာလဗၠာဲသၟိၚ်တံ ဂၠိုက်ဂၠာဲစၟဳစၟတ်ဂှ် သေဌဳကၟက်ဂှ် ဂြိပ်ထောံရ။ သေဌဳၝောံဂှ်လေဝ် ကဵုအခေါၚ် ညံၚ်ဂွံရပ်ထောံတၠသ္ၚိညးတုဲ ညံၚ်ဂွံ စုတ်ထောံထံၚ်ရ။

“ပြဟ်ဟ်ဏံဂှ်တှေ် သေဌဳဂှ်ကဵုလဝ်လှုဲ ၅၀၀၀ ၜါတ်ရ၊ တ္ၚဲယးတေံတှေ် ဒၞာဲဇုတ်ကဝ်အာဂှ်တှေ် ကလေၚ်စုတ် ဇုတ်သတေဝ်ဏောၚ်၊ စရိတ်အိုတ်သီုတံဂှ် သေဌဳၝောံဂှ် ကေတ်ကဵု တာလျိုၚ်ဏောၚ် ညးဟီုရ” သာ်ဝွံ မိမဍေဝ် ဆက်ဟီုပၠန်ရ။

ကြဴနူကဵု နာဲမံၚ်ညဝ် ဒးဒုၚ်ပန်တုဲ ကောန်ကမၠောန် နွံဒၟံၚ်ပွဳပွူ သ္ၚိသေဌဳတံဂှ် ဖေက်လကိုတ်မံၚ်အိုတ်ရ။