စရၚ်မာဲ တွဵုရးမန်
တော်တၟအ်ကၠံမ္ဂး နွံ ၄၃.၂ တၟအ်ကၠံဓဝ်တုဲ အပ္ဍဲတွဵုရးမန်ဏအ် ပွိုၚ်ဍုၚ်ကျာ်မြဟ်ဏအ် ဒှ်ပွိုၚ်ဍုၚ် မၞိဟ်စုတ်မာဲ အောန်အိုတ်ရ။
ပ္ဍဲပွိုၚ်ဍုၚ်ကျာ်မြဟ်ဂှ် စၞးကၠတ်ထဝ်ညးဍုၚ် ၆ တလ၊ စၞးကၠတ်ထဝ် ကောန်ဂကူ ၁၀ တလ၊ ညးစၞးကၠတ်ထဝ်တွဵုရး (၁) ရတလ၊စၞးကၠတ်ထဝ်တွဵုရး (၂) ၈ တလ တအ် လုပ်ပြိုၚ်ရုဲကၠုၚ်ရ။
“ပ္ဍဲပွိုၚ်ဍုၚ်ကျာ်မြဟ်ပိုဲ မၞိဟ်စုတ်မာဲ ဟိုတ်ဂွံအောန်အာဂှ် မန်ပိုဲ တိတ်ကၠောန်စပ္ဍဲဍုၚ်မ္ၚးလေဝ်ဂၠိုၚ်၊ မၞိဟ်နွံမံၚ်တအ်ဂှ်လေဝ် စရၚ်ယၟုပါကီုလေဝ် တၚ်ဗၠေတ်ဗၠေၚ်ဂှ်ဂၠိုၚ်မံၚ်၊ တုဲပၠန် ပ္ဍဲမၞိဟ်ကဵုမာဲ နွံ ၁၀၀၀ ဂှ် ၜိုတ် ၅၀၀ ရဂွံစုတ်မာဲ ပ္ဍဲ ၅၀၀ ဂှ်ပၠန် ယၟုဟွံပါကၠုၚ် စရၚ်ယၟု ဗၠေတ်လေဝ် နွံၜိုတ် ၂၅၀ ပၠန်တှေ် မၞိဟ်ဂွံစုတ်မာဲဂှ် အောန်အာရ” သာ်ဝွံ မိစန္ဒာနန် မလုပ်ပြိုၚ် နဒဒှ် ညးစၞးကၠတ်ထဝ် ကောန်ဂကူ ဂှ် ဟီုထ်ၜးရ။
ပ္ဍဲတွဵုရးမန်ဏအ် ပွိုၚ်ဍုၚ် မၞိဟ်စုတ်မာဲ ကဝက်ဟွံပေၚ်တအ်ဂှ် ပွိုၚ်ဍုၚ်ဇြပ်ဗု မၞိဟ်ကဵုမာဲ (၄၅.၈) တၟအ်ကၠံ ၊ ပွိုၚ်ဍုၚ်ၜါသွာၚ် တ္ကအ်ခၟိုၚ် မၞိဟ်ကဵုမာဲ (၄၄.၅) တၟအ်ကၠံ ၊ ပွိုၚ်ဍုၚ်မုဟ်ဍုၚ် မၞိဟ်ကဵုမာဲ (၄၆.၅) တၟအ်ကၠံ ၊ ပွိုၚ်ဍုၚ်ရေဝ် မၞိဟ်ကဵုမာဲ (၄၈.၄) ၊ ပွိုၚ်ဍုၚ်ပံၚ် မၞိဟ်ကဵုမာဲ (၄၉.၄) တၟအ်ကၠံ ဟေၚ်ရ။
“တၠမာဲ စိုပ်မံၚ်ဍုၚ်မ္ၚးတေံဂှ်လေဝ်ဂၠိုၚ်၊ မၞိဟ်ဖေက်ဒညဒၟံၚ် ပရေၚ်ကဵုမာဲတအ် ညံၚ်ဂွံနွံကဵု အခေါၚ်စုတ်မာဲ လောဲလောဲ ပြေပြေပြံၚ်ၚ်ဂှ်လေဝ် ဖန်ဇန်လဝ် ဟွံစှေ်ဗီုလေဝ် နွံမံၚ်ကီု” သာ်ဝွံ နာဲယျေဝ်ဇြဝ် ညးလုပ်ဒုၚ်ရုဲ နဒဒှ် အမာတ်ပုဂ္ဂလိက ပွိုၚ်ဍုၚ်ကျာ်မြဟ် ဂးရ။
အတိုၚ်စရၚ်လၟိဟ်မၞိဟ်ကၟိန်ဍုၚ် သၞာံ ၂၀၁၄ ဂှ်မ္ဂး နူတွဵုရးမန်ဏအ် မၞိဟ်တိတ်ကၠောန်ကလောန် ပ္ဍဲဍုၚ်မ္ၚးတအ် အာ နဗဗွဲသၞောဝ်ကဵုဒှ် ဟွံဗဗွဲသၞောဝ်ကဵုဒှ် သီုဖ်အိုတ် လၟိဟ်နွံ ၄ ကိုဋ် ၂ ဠက်ပြၚ်တုဲ အခေါၚ်ကဵုမာဲ(မာဲဒ္စး) လ္ပာ်ဍုၚ်မ္ၚးတေံဂှ်လေဝ် ညးတအ်ဟွံက္လိဂွံရ။
ပ္ဍဲတွဵုရးမန် ပွိုၚ်ဍုၚ်ကျာ်ထောဝ် (ကျာ်ထဝ်) ဂှ် မၞိဟ်ကဵုမာဲ နွံ ၆၇.၂ တၟအ်ကၠံ၊ ပွိုၚ်ဍုၚ်မတ်မလီု မၞိဟ်ကဵုမာဲ နွံ ၅၇.၅ တၟအ်ကၠံ၊ ပွိုၚ်ဍုၚ်သဓီု မၞိဟ်ကဵုမာဲနွံ ၅၅ တၟအ်ကၠံ၊ ပွိုၚ်ဍုၚ်ၜဳလီု (ၜဳက္လေၚ်) မၞိဟ်ကဵုမာဲ နွံ ၅၆.၉ တၟအ်ကၠံ ရ။
ပ္ဍဲတွဵုရးမန် ၁၀ ပွိုၚ်ဍုၚ်ဝွံ မၞိဟ်နွံကဵုအခေါၚ်ကဵုမာဲ သီုဖ်အိုတ်နွံ ၁၅,၃၄,၄၈၆ တလတုဲ မၞိဟ်လုပ်စုတ်မာဲဂှ် သီုဖ်အိုတ်နွံ (၇,၈၆,၈၆၆) တလ၊ (၅၁.၃) တၟအ်ကၠံရ။ ပ္ဍဲပေါဲရုဲမာဲ သၞာံ ၂၀၁၀ တေံ မၞိဟ်နွံကဵု အခေါၚ်ကဵုမာဲ နွံ ၁၀ ကိုဋ်ပြၚ်တုဲ မၞိဟ်လုပ်စုတ်မာဲ နွံ ၆၂ တၟအ်ကၠံပြၚ်ၚ်ဂှ်လေဝ် ဂွံဆဵုကေတ် ပ္ဍဲစၟတ်သမ္တီပရိုၚ်ဂမၠိုၚ်ရ။
0 Comments