ရုၚ်စက် ပါ်ကရေက်ဆု မၞုံယၟု “ဖဳဠေပ်” နွံပ္ဍဲအရာပ် (၁) ဍုၚ်ကျာ်ပိ (ပယျဵု သေံ ဗၟာ) ဂှ်ဝွံ ပ္ဍဲဂိတုအေဗရဴ (၂၁) ပယဵုယး ၜိုတ် (၄) နာဍဳ စတူပၟတ်တုဲ စိုပ်ၜိုတ်ဒေါဝ်တ္ၚဲ ပၟတ်ပၠိုတ်လလံအာ ဂွံတီကေတ်ရ။
ပ္ဍဲဘဲပၟတ်ဂှ်ဝွံ ဆုဂမၠိုၚ်ကီု၊ စက်ဆုကီု၊ ရုၚ်စက်ကီု၊ ကွဳစက်ကြိန်မွဲမကီု တူအာတုဲ အတိုၚ်လိက်ပရိုၚ် ၜၚ်ကံက်ပဿ် မ္ဂး ဂးလဝ် လေၚ်အာ ၚ္ၚုဟ်မး ဗၞတ်သြန်ၜါတ် (၁၀၀) ပြကောဋိကိုဋ်ကီုလေဝ် ဌာန်ပရိုၚ်လ္ၚဵုလ္ၚဵု ဓမံက်ထ်ၜး သြန်ၜါတ် ၜိုတ် (၁၀) ကိုဋ်ပြၚ်ဓဝ်ဂှ် ဂွံဆဵုကေတ်ရ။
“ ရုၚ်စက်ဆုဏံ နွံကရပ် အုံဗဂေါ အရာပ် (၁)တုဲ နူကဵုဍုန်ပုၚ် နကဵုဖဴဂေဿ်ဂှ် ပၟတ်တူတိုန်၊ မၞိဟ်ဍုန်ပုၚ်ဂှ် ကောန်စက်ဆုမွဲတလ ယၟုဍေံဝေန်နာၚ် အယုက် ၜိုတ် (၃၀) ကောန်ဍုၚ်ဗၟာ ဂးတုဲ လၟုဟ်နူရုၚ်ဗၠာဲသၟိၚ် ပံက်လဝ်အမှု နကဵုအမှုပၟတ်တူ” သာ်ဝွံ ကောန်ဍုၚ်ကျာ်ပိ မွဲတလ ဂးရ။
ပ္ဍဲကာလပၟတ်တူမံၚ်ဂှ် ကွဳစက်ပြာ်ပၟတ် နူဍုၚ်ကျာ်ပိ (၃) မ၊ နူသေံ (၆) မ သီုကဵုကွဳစက်ဇက်ဍာ် ကောန်ဍုၚ်ကျာ်ပိတအ် ဗိုၚ်ပလိုတ်တုဲ ပ္ဍဲပယာံနူဂယး ၜိုတ် (၆) နာဍဳဂှ် အသိၚ်ပၟတ်ဇြစှေ်အာကီုလေဝ် ဟိုတ်နူဆု ကေုာံ အိက်ခတေက် ဂၠိုၚ်မံၚ်တုဲ ပၟတ်ဟွံအိုတ်လောဲလောဲရ။ ဆက်ပလိုတ်ဒၟံၚ် စိုပ်ၜိုတ် ဒေါဝ်တ္ၚဲရောၚ် ပၟတ်ဂွံလလံပၠိုတ်အာအိုတ်။
ရုၚ်စက်ဆုဏအ် ဒှ်ရုၚ်စက်ဆု ကောန်ဂကူသေံ နွံယၟု “ဏာၚ်ဘန်အဏာန်တဝ်ယာဲ” တုဲ သိုၚ်လဝ် ပ္ဍဲတိဂအာၚ်သ္ၚိ ရဲဗော် (KNU) မွဲတလရ။
ပ္ဍဲဍုၚ်ကျာ်ပိ သြၚ်လပါ်ဍုၚ်ဗၟာဂှ် ရဲကၠောန် ကမၠောန်ပရိဘောဂဆု ဂၠိုၚ်ဒၟံၚ်တုဲ ကၠောန်တုဲမ္ဂး ရိုဟ်ဟ်တ္ၚဲ အာတိုန်သွံဒၟံၚ် ပ္ဍဲသြၚ်သေံ (ဍုၚ်ကျာ်ပိ) ဂှ်လေဝ် ဂွံဆဵုကေတ်ရ။
0 Comments