အာကာ – သွက်သ္ဂောံကၠောန် သဘၚ်သဳကၠဳ ကောန်ဂကူ ကောန်ဍုၚ်အရၚ်ဂှ် ကမ္မတဳ ဓမံက်ပတိုန် ကၟိန်ဍုၚ်ပံၚ်ကောံ ဖေတ်ဒရေဝ် ဖျေံဏာသဂုတ်သွာတ် ပ္ဍဲကောံဓရီု အလန်ဒုတိယရ။
ကောံဓရီုဝွံ နူဂိတုဂျာန္နဝါရဳ ၁၁ စဵု ၁၄ ကၠောန်ဗဒှ်ဏာ ပွိုၚ်ပန်တ္ၚဲ ပ္ဍဲပယျဵုသေံ မွဲဒၞာဲရ။
ပံၚ်ကောံကဵု ဇြဟတ်ကောန်ဍုၚ်အရၚ် မပ္တံကဵု ကံၚ်ဇြဳ ကောန်ဂကူ ကောန်ဍုၚ်အရၚ် ENC, ဒပ်ပံၚ်ကောံ ဒဳမဝ်ကရေဇြဳ ကောန်ဂကူ NDF, ဗော်ဂအုပ် ဒဳမဝ်ကရေဇြဳ ကောန်ဂကူ ကောန်ဍုၚ်အရၚ် ကၟိန်ဍုၚ်ပံၚ်ကောံ (တိဍာ်ဗၠးၜး) ULD-LA တံတုဲ သွက်သ္ဂောံကၠောန် သဘၚ်သဳကၠဳဇၞော်မာန်ဂှ် စဳဇန်အာရောၚ် နာဲဟံသာ မဒှ်ညးအုပ်ကာ ကမ္မတဳ ဓမံက်ပတိုန် ကၟိန်ဍုၚ်ပံၚ်ကောံ ဖေတ်ဒရေဝ် ဟီုရ။
ပ္ဍဲသဘၚ်သဳကၠဳဇၞော်ဂှ် ညံၚ်ဂကောံအာက္ဍိုပ် ပရေၚ်ဍုၚ်ကွာန် မသ္ပစၞးကဵု ကောန်ဍုၚ်အရၚ် မဒးဒုၚ်ဍဵုဍိုက်တံ သ္ဂောံမံက်ကၠုၚ်မာန်ဂှ် ဂစာန်လွဳအာတုဲ မွဲလပါ်ပၠန်ဂှ် ပံၚ်တောဲကဵု ဇြဟတ်မလုပ်မံၚ်ပေဲါဗတိုက် သွက်ဒဳမဝ်ကရေဇြဳတံတုဲ လုပ်အာပေဲါဗတိုက် ကုအလဵုအသဳပၞာန် နကဵုပရေၚ်ဍုၚ်ကွာန်၊ ပရေၚ်ပၞာန်၊ ပရေၚ်ကလုတ်တမာန် နနဲနာနာရောၚ် CEFU လလောၚ်တြးလဝ် ပ္ဍဲဂိတုဂျာန္နဝါရဳ ၁၄ ဂှ်ရ။
ယဝ်ရအလဵုအသဳပၞာန် ထပက်ကၠုၚ်ပၞာန် လတူဂကောံပၠန်ဂတးရပ်လွဟ် ကောန်ဍုၚ်အရၚ်တံမ္ဂး ပံၚ်ကောံစဵုဒၞာအာရောၚ်ဂှ်လေဝ် နာဲဟံသာ ဟီုရ။
“ၜိုန်ရဂကောံရပ်လွဟ် ကောန်ဍုၚ်အရၚ် ဟွံဒှ်ကောန်ဂကောံပိုဲဏီဂှ်လေဝ် ယဝ်ရအလဵုအသဳပၞာန်တံ ထပက်ကၠုၚ်ပၞာန်တှေ် မွဲနဲမွဲဗီု သွက်ဂွံကဵုအာ အရီုအဗၚ်ဂှ် နကဵုမူ ပိုဲချပ်လဝ်နွံ၊ ဆဂး ဗီုလဵုဂွံရီုဗၚ်အာဂှ် ချိုတ်ချိုတ်ပၠိုတ်ပၠိုတ် ပိုဲဟွံဂွံဖျေံသဂုတ်သွာတ်ဏီ” သာ်ဝွံ ညးဟီုရ။
သအာၚ်နူဂှ်ပၠန် က္ဍိုပ်သကိုပ်ဒဳမဝ်ကရေဇြဳ ဒဝ်အံၚ်သာန်သုကျဳ က္ဍိုက်က္ဍိုပ်တုဲ ဂစာန်လွဳမံၚ် သွက်သ္ဂောံကၠောန် သဘၚ်သဳကၠဳ ပေန်လုၚ်ဒုတိယဂှ်လေဝ် ဒုၚ်တၠုၚ်အာရောၚ် နာဲဟံသာ ဟီုရ။
“ရန်တၟံဂှ် တုပ်တုပ်ရ၊ ဒှ်ဟဂှ်တှေ် လတူဒဝ်အံၚ်သာန်သုကျဳ ကၠောန်မံၚ်ဂှ် ပိုဲမိပ်စိုတ်၊ ပိုဲဒုၚ်တၠုၚ်၊ ပိုဲကဵုဇြဟတ်” သာ်ဝွံ ညးဟီုရ။
သွက်ကောန်ဂကူ ကဆံၚ်တုပ်သၟဟ် ကေုာံ သွက်သ္ဂောံကလိဂွံ အခေါၚ်ကံကုသဵုဇကု ဇကုဖန်ဖက်ကေတ်မာန်တုဲ ပ္ဍဲဂိတုနဝ်ဝေမ်ပါ ၄ ၊ သၞာံ ၂၀၁၀ ဂှ် ဒက်ပတန်ကၠုၚ် ကမ္မတဳ ဓမံက်ပတိုန် ကၟိန်ဍုၚ်ပံၚ်ကောံ ဖေတ်ဒရေဝ် နကဵုဂကောံပၠန်ဂတး ရပ်လွဟ် ကောန်ဍုၚ်အရၚ် ၆ ဂကောံရ။
ပ္ဍဲ ၆ ဂကောံဂှ်မ္ဂး ဂကောံဗၠးၜး ဍုၚ်ကချေၚ် K.I.O၊ ဗော်သွး ကောန်ဂကူကရေၚ် K.N.U၊ ဗော်တဴတက် ကောန်ဂကူ ကရေၚ်ဍာဲ K.N.P.P၊ ဗော်ပၠတရဴ ကောန်ဂကူချေၚ် C.N.F၊ ဗော်ဍုၚ်မန်တၟိ N.M.S.P ကေုာံ ဗော်တဴတက် ဍုၚ်သေံ S.S.P.P တံ ပါလုပ်အိုတ်ရ။