ကိစ္စအမှုဗိုလ်ဇၞော် နူကဵုဒပ်ပၞာန်ဗၟာမွဲတၠ မှာရာဂးတုဲ ပန်ဒးအာကောန်ကွာန်၂ တၠ ပ္ဍဲကွာန်ပါၚ်မၚ်ဂၠန်၊ ပွိုၚ်ဍုၚ်ရေဝ်သၠုၚ်ကျာ တွဵုရးဍုၚ်မန် အပ္ဍဲဂိတုမာတ်တုဲကၠုၚ်တေံဂှ် ဒဵုလၟုဟ် နူကဝ်မယှေန်အခေါၚ်အရာမၞိဟ် ကၟိန်ဍုၚ် လလောၚ်ပ္တိတ်ပရိုၚ်ဟွံမာန်မွဲသာ်ဏီရောၚ် ဂွံတီကေတ်ရ။

နာဲချေတ်သဵု (ညးမချိုတ်အာ ) ကေုာံ ကောန်ဇာတ်သမ္ဘာ(Facebook)

နာဲမဵု (ညးမချိုတ်အာ) ကေုာံ ကောန်ဇာတ် သမ္ဘာ (Facebook)

အပ္ဍဲဂိတုမေ သၞာံ ၂၀၁၆ ဂှ် နကဵုကဝ်မယှေန်အခေါၚ်အရာမၞိဟ်ကၟိန်ဍုၚ် စှေ်လ္ၚတ်သၟာန်သၟုက်လဝ် ကုကောန်ကွာန်ပါၚ်မၚ်ဂၠန် (၁၄) တၠ သီုကဵုကျာ်ဇၞော်အ္စာ ကွာန်တၟိတောတက်တံ တုဲအာကီုလေဝ် ကုညးမဆက်စက် လ္ပာ်ဒပ်ပၞာန်ဂှ် ဟဂွံသၟာန်သၟုက်ဏီဖိုဟ်ရောၚ် ဒံက်တာဉာဏ်ဇြဝ် နူကဵုကဝ်မယှေန် အခေါၚ်အရာမၞိဟ် ကၟိန်ဍုၚ်ဂှ် ဂးရ။

“လ္ပာ်ရဲဒပ်ပၞာန် ပါမံၚ်ကရောံတ္ၚဲဒှ်ပရူဂှ် ဂွိုအ်ဆဵုမွဲတဲဏီ၊ ကဵုသ္ကိုပ်တံဒပ်ဂှ် ဆဵုတုဲ၊ ပ္ဍဲရုၚ်သၞောဝ်ဓဝ်ပၞာန်ဂှ် ဖျေံလဝ်အမိၚ် ဗီုလဵုကီုရော ၜိုန်သၟာန်ကီုလေဝ် ဍေံတံဟွံသှ်ရ၊ ပရေၚ်ဒဒှ်ဂှ် ပိုဲဂွိုအ်တီလဝ် နူတံဒဵုကၞောတ်တှေ် ဂွံပ္တိတ်ပရိုၚ်ဂှ် ပ္တိတ်ဟွံမာန်ဏီ” သာ်ဝွံ ဒံက်တာ ဉာဏ်ဇြဝ် ဆက်ဟီုရ။

ကုဒပ်မပါဒၟံၚ် ပ္ဍဲကရောံဒှ်ပရူဂှ် နူရုၚ်သၞောဝ်ဓဝ်ပၞာန် စၟဳစၟတ်မံၚ် ဂွံတီကေတ်လဝ်ကီုလေဝ် စပ်ကဵုကိစ္စဏံ နကဵုဒပ်ပၞာန် ဗီုလဵုရပ်စပ်ဖန်ဖက်မံၚ်၊ စိုပ်မံၚ်အကာဲအရာလဵုရောဂှ် ဆက်သၟာန်အာဏောၚ်၊ နူရုၚ်သၞောဝ်ဓဝ်ပၞာန် ဖျေံအမိၚ် ဗီုလဵုရောဂှ် မၚ်စၟဳမံၚ်ဖိုဟ်ရောၚ်ဂှ်လေဝ် ဒံက်တာဉာဏ်ဇြဝ် ဟီုပၠန်ရ။

“စပ်ကဵုကိစ္စပန်ဂစိုတ်မၞိဟ် ကွာန်ပါၚ်မၚ်ဂၠန်ဏံဂှ် ကဝ်မယှေန်အခေါၚ်အရာမၞိဟ်ဍုၚ်လေဝ် စိုပ်ကၠုၚ်တုဲရ။ ရဲအမှုအရာ နူအလဵုအသဳလေဝ် စိုပ်ကၠုၚ်တုဲရ။ လၟုဟ်မ္ဂး ပရေၚ်အမှုဂစိုတ်မၞိဟ်ဏံ ဒှ်ဂွံပွိုၚ် ၄ ဂိတုကၠာရလေဝ် ကိစ္စအမှုဂှ် မုဟွံတၟေၚ်တိုန်မွဲသာ်ဏီဖိုဟ်” သာ်ဝွံ ညးမရေၚ်တၠုၚ်ဂ္စာန်ဓမံက်ဒၟံၚ်ပရေၚ်ဒဒှ်ဍာံ ဂွံမံက်မွဲတၠ နာဲသဵုတိၚ် ဟီုရ။

ကိစ္စအမှုဗိုလ်ဇၞော်ဒပ်ဗၟာ မွဲတၠ ပန်မှာရာအာဏံဂှ် ရပ်စပ်စၟဳစၟတ်မံၚ် ပ္ဍဲရုၚ်သၞောဝ်ဓဝ်လဵုရောဂှ် တီကေတ် ဟွံမာန်တုဲ မိက်ဂွံကဵုစၟဳစၟတ် ပ္ဍဲရုၚ်သၞောဝ်ဓဝ်အရာပ်ရ၊ ပရေၚ်စဳရေၚ်ဂဗုတ် မိက်ဂွံကဵုတပ်တးဓဝ်ယာရ၊ အဃောဂိတုဂျောန် (၄) မံက်ဂှ် အာစိုပ်သၟာန်သၟုက်လဝ် ပ္ဍဲဌာန်ဂအုပ်ပၞာန်ဒေသပြၚ်ၜဳတေံကီုရလေဝ် ဟွံဂွံအမိၚ်နူလ္တူတေံတုဲ ဟဂွံစၟဳစၟတ်မွဲသာ်ဏီ ဂွံတီလဝ်ၜိုတ်ဂှ်ရောၚ် နာဲသဵုတိၚ်ဂှ် ဆက်ဟီုရ။

ပရေၚ်ဒဒှ်ဏံဝွံ ပ္ဍဲအခိၚ်ပယာံသ္ဂာတ္ၚဲ (သ္ဂာဗ္တံ) ဂိတုမာတ် (၈) တေံ ဒပ်ချဳဒရာၚ် နူခလရ ၂၈၀ လုပ်စိုပ်ကွာန်ပါၚ်မၚ်ဂၠန်တုဲ ဗိုလ်ဇၞော်ဇြဝ်မျဵုထိတ် နူကဵုဒပ်ဂှ် ပန်စုတ် ရဲပ္ၚာ နာဲမဵုကဵု နာဲချေတ်သဵု နကဵုလွဟ် တုဲ ကောန်ကွာန်ပါၚ်မၚ်ဂၠန် ၂ တၠဂှ် မ္ဒးချိုတ်တဴလဝ်ရ။

ဆေၚ်ကဵုကိစ္စဂှ် နူကဵုရုၚ်ဗၠာဲသၟိၚ်ဍုၚ်ခေါဇာ ပံက်လဝ်အမှု နကဵုရာဇာသာတ်ဇၞော် ၝောံပိုဒ် (၃၀၂) အမှုဂစိုတ်မၞိဟ် ကုဗိုလ်ဇၞော်ဇြဝ်မျဵုထိတ်ရောၚ် သာ်ဝွံ ပ္ဍဲဂိတုမာတ် (၁၇) ဂှ် သ္ကိုပ်ဗၠာဲသၟိၚ်ပွိုၚ်ဍုၚ်ရေဝ် ၜိုန်ဟီုသောၚ်က္လးလဝ်ကဵုရဲမဳဒဳယာပရိုၚ်တံ သာ်ဂှ်ကီုလေဝ် ဗွဲကြဴဏံ ပံက်လဝ်အမှု နကဵုအမှုမၞိဟ်ချိုတ်ဏောၚ် ဂွံလ္ၚတ်တီကေတ်လဝ်ရ