ပ္ဍဲသ္ဘၚ်သဳကၠဳပေန်လုၚ်၂၁ ဗွဝ်ကၠံ (သ္ဘၚ်သဳကၠဳပရေၚ်ၜိုဟ်လလံဍုၚ်) မကၠောန်နကဵုပရေၚ်ပၠတရဴ ဒဝ်အံၚ်သုကျဳဂှ် ဂကောံရပ်လွဟ်ကောန်ဍုၚ်အရၚ် ထ္ပက်စၟတ်တဲလိက်ကသုက်ဒေါံပန်ပှော်အလုံဍုၚ် (NCA) တုဲတုဲ ဟွံတုဲတုဲ သီုဖအိုတ် နူကဵုဂကောံရပ်လွဟ်ကောန်ဍုၚ်အရၚ်တံဂှ် ဂွံအခေါၚ်တိုန် ဗၞတ် ၂၀၀ တၠရောၚ် ဂွံတီကေတ်ရ။

“ သွက်ဂွံဘိက် ရဲဂကောံရပ်လွဟ်ကောန်ဍုၚ်အရၚ် အလုံဖအိုတ် ဗၞတ် ၂၀၀ တၠဂှ် တုပ်စိုတ်ညးသ္ကံ။ သှေ်နူဂှ်တှေ် အတိုၚ်လၟိဟ် ပိုဲကၠောန်ကၠုၚ်ကၠာကၠာတေံဂှ်ရ ဖန်ဇန်အာဏောၚ်” ဥူလှမိုၚ်ယှိုဲ ညးအုပ်ကာလၟိဟ် ၂ နူဆာပ်ကမ္မတဳ ဒ္စးဒုၚ်ပဠေဝ်တ် သ္ဘၚ်သဳကၠဳပေန်လုၚ် ၂၁ ဗွဝ်ကၠံဂှ် ဟီုရ။

သ္ဘၚ်သဳကၠဳပေန်လုၚ် ၂၁ ဗွဝ်ကၠံဂှ် ပ္ဍဲစၟတ်တ္ၚဲအဝ်ဂါတ် ၃၁ တေံ ကၠောန်သ္ပအာ ပ္ဍဲကောန်ဗေန်ယှေန်သေန်တာ မျာန်မာ (၂) မၞုံဍုၚ်နေပျဳတဝ် ပွိုၚ် ၅ တ္ၚဲရောၚ်ဂှ် အလဵုအသဳကဵု ဂကောံရပ်လွဟ် ကောန်ဍုၚ်အရၚ်တံ ပ္ညဳပ္ညပ်တုပ်စိုတ်တုဲရ။

သွက်ဂွံတိုန် သ္ဘၚ်သဳကၠဳ ပေန်လုၚ် ၂၁ ဗွဝ်ကၠံ (သ္ဘၚ်သဳကၠဳပရေၚ်ၜိုဟ်လလံဍုၚ်) ဂှ် ဘိက်အာ ဂကောံရပ်လွဟ် ကောန်ဍုၚ်အရၚ်တံ ဗၞတ် ၂၀၀ တၠရောၚ်ဒှ်တုဲ အခါပံက်အသေအဟာန်မ္ဂး သီုဖအိုတ် ညးတိုန်စိုပ် နွံ (၇၅၀) တၠရောၚ် ဂွံတီကေတ်ရ။

ဆ္ဂး အလဵုအသဳတၟိဝွံ ကဏ္ဍဇၞော် (၅) မတွံဂး ပရေၚ်ဍုၚ်ကွာန်၊ ပရေၚ်ဂီုကၠီု၊ပရေၚ်ပိုန်ဒြပ်၊ပရေၚ်ဝေါဟာမၞိဟ်၊ ပရေၚ်သဘာဝပွဳပွူ ကေုာံ ပရေၚ်သယံဇာတ မကေၚ်သဳကၠဳကၠုၚ်လဝ် ပ္ဍဲသ္ဘၚ်သဳကၠဳပရေၚ်ၜိုဟ်လလံဍုၚ် လက်ထက်အလဵုအသဳတြေံ ဥူတိၚ်သိၚ်တေံဂှ် ဆအယာံမာတ် က္ဍိုပ်လိက်ဍေံဟေၚ်ရ သဳကၠဳ ဗၞတ်ညိည ဇြိုၚ်သာတုဲ ဒဵုဒးဖျေံသ္ဂုတ်သွာတ်ဂှ်ဟွံကၠောန်ဏီရ။ အခါကၠောန်သ္ဘၚ်သဳကၠဳ အဆံၚ်ကောန်ဂကူတေံဟေၚ် သဳကၠဳဖျေံအာသ္ဂုတ်သွာတ်ရောၚ်တုဲ၊ သ္ဘၚ်သဳကၠဳဂှ်လေဝ် ကၠောန်အာ တြဴဂိတုမွဲဝါရောၚ်ဂှ် ဖျေံလဝ်သ္ဂုတ်သွာတ် ပ္ဍဲကောံဓရီုကမ္မတဳပံၚ်တောဲဓမံက်ရုပ်ရဴ ပရေၚ်ၜိုဟ်လလံကၟိန်ဍုၚ် UPDJC ပ္ဍဲစၟတ်တ္ၚဲ အဝ်ဂါတ် ၁၅-၁၆ ဂှ်တုဲရ။

ပ္ဍဲသ္ဘၚ်သဳကၠဳ ပရေၚ်ၜိုဟ်လလံကၟိန်ဍုၚ် မကၠောန်ကၠုၚ်လဝ် နူဇာန်နဝါရဳ ၁၂ ဒဵု ၁၆ ပ္ဍဲသၞာံ ၂၀၁၆ လက်ထက် သမ္မတတြေံ တိၚ်သိၚ်တေံဂှ် ညးစၞးနူဂကောံအလဵုအသဳဂှ် (၇၅)တၠ၊ ညးစၞးကၠတ်ထဝ် (၇၅) တၠ၊ ညးစၞးဒပ်ပၞာန် (၁၅၀) တၠ၊ ညးစၞးဂကောံရပ်လွဟ်ကောန်ဍုၚ်အရၚ် (၁၅၀) တၠ၊ ညးစၞး နူဗော်ပရေၚ်ဍုၚ်ကွာန် မလုပ်ကဵုသၞောဝ် (၁၅၀) တၠ၊ ညးစၞးကောန်ဍုၚ်အရၚ် (၅၀) တၠ ကေုာံ ပူဂဵုတၞဟ်ဟ် မထေက်ကဵုပါလုပ်ဂှ် (၅၀) တၠ သီုဖအိုတ် နွံကဵုညးစၞး (၇၀၀) တၠတုဲ ကၠောန်ကၠုၚ်သ္ဘၚ်သဳကၠဳရ။