စပ်ကဵုပရေၚ် NCA ဂှ် ဟိုတ်နူတီကၠိုဟ်လဝ်အောန်ဂှ်ရ ကမၠောန် JMC ဂှ် ဍေံဟွံအံၚ်ဇၞးလောဲလောဲ သာ်ဝွံ သ္ကိုပ်ပၞာန်သဝ်အာၚ်ဇြက်ဖိုဝ် ဒုဥက္ကဌ (၁) JMC-U ဟီုဂးကၠုၚ် ပ္ဍဲကောံဓရီု ကမ္မတဳပံၚ်တောဲ မၚ်ရံၚ်ကမၠောန်ပရေၚ်ဒေံါပန်ပှော်အဆံၚ်ကၟိန်ဍုၚ် Joint Ceasefire Monitoring Committee-JMC-U မရနုက်ကဵု ၁၂ ဝါရ။
တုဲကၠုၚ်ဂိတုသေပ်တေမ်ဗာ ၂၀ ဖါနူဂယး ၜိုတ် ၁၀ နာဍဳဂှ် ကမ္မတဳ JMC-U စကၠောန်ကၠုၚ်ကောံဓရီု လၟေၚ် (၁၂) ဝါ ပ္ဍဲဌာနဗဟဵုပရေၚ်သၟဟ်န်ကောန်ဂကူကေုာံပရေၚ်ၜိုဟ်လလံ (NRCP) ဍုၚ်လ္ဂုၚ်ရ။
JMC-U ဗီုကၠောန်ဒၟံၚ်ကောံဓရီုလၟေၚ် မရနုက်ကဵု ၁၂ ဝါ (MNA)
ဒှ်သာ်ဂှ်ရ သီုၜါလ္ပာ် ဒးသ္ပဇြိုဟ်နက်ယွံသွံ လိက်ကသုက်တုပ်စိုတ်ဒေံါပန်ပှော်အလုံမွဲဍုၚ်-NCA ဏောၚ်၊ လၟေၚ်ကမၠောန် JMC ညံၚ်ဂွံအံၚ်ဇၞး အာစိုပ်ဒတုဲဂှ်လေဝ် အခက်ခုဲဗီုလဵုနွံနွံ ပ္တိတ်ဇဲလွဳ စွံစိုတ်ဂၠိၚ်ၚ်တုဲ ဒးဆက်ဓမံက်ရုပ်ရဴဏောၚ်ဂးရ။
“စပ်ကဵုဓမံက်ရုပ်ရဴ ကမၠောန် JMC တုဲ ပ္ဍဲကောံဓရီုဏံ ကမ္မတဳ JMC ပိုဲ ဒးသဳကၠဳညံၚ်ဂွံပြေပြံၚ်ဏောၚ်” သာ်ဝွံ ဒုသ္ကိုပ်ပၞာန်ဇၞော်ယျာပျေအ် ဥက္ကဌ JMC-U ဟီုဂးဏာ ပ္ဍဲဂလာန်ပံက်ကောံဓရီုရ။
စပ်ကဵု JMC တုဲ အဆံၚ်တွဵုရး/ရးဒေသဇၞော် JMC –S ဂှ် ပံက်ဂွံ (၅) ဒၞါဲ၊ အဆံၚ်ဒေသ JMC-L ဂှ် ပံက်ဂွံ (၂) ဒၞါဲ တုဲဣရ၊ ဒၟါနူဂှ်ရ JMC ဂှ် ရုပ်ရဴထ္ၜောံက္လၚ်ဍေံ မံက်မံၚ်ဣရ သာ်ဝွံ ညးစၞးလ္ပာ်အရာပ် သဝ်မက်တယျူအေ အ္စာတၠခရေတ် ဒုဥက္ကဌ (၂) JMC-U လေဝ် ဟီုဂးဏာ ပ္ဍဲကောံဓရီုဂှ်ကီုရ။
ကောံဓရီု JMC အလန် (၁၂) ဝါ ကၠောန်မံၚ်လၟုဟ်ဏံ ဆက်ကၠောန်ပွိုၚ် ၃ တ္ၚဲ ဒဵုစိုပ်သေပ်တေမ်ဗာ ၂၂ ဏောၚ်တုဲ တ္ၚဲလဵု အခိၚ်လဵု ကၠောန်သ္ပပေါဲသောၚ်က္လးလိက်ပရို်ၚ်ရောဂှ် လလောၚ်ကဵုပၠန်ဏောၚ် ဂွံတီကေတ်ရ။
0 Comments