ပ္ဍဲကာလသမတကၟိန်ဍုၚ် ဥူတိၚ်သိၚ် ကလေၚ်ဂွံအဝဵုတၟိဂှ်မ္ဂး အလဵုအသဳညးတေံဂှ် သွက်ဂွံဒှ်အာ အလဵုအသဳသၟးဇ္ၚး၊ အလဵုအသဳသ္ပဂုဏ် ကုညးဍုၚ်ကွာန်၊ ပတဝ်ဏာက္ဍိုပ်ကဵု ပရေၚ်ၜိုဟ်လလံ ကေုာံ ပရေၚ်ညဳသာသၟဟ်န် ကောန်ဍုၚ်အရၚ်တအ်ရောၚ် ဟီုဂးဏာရ။ အတိုၚ်အရေဝ်ညးတေံ ဟီုကဵုကမၠောန်ညးတေံ ဟီုဂှ် လၟုဟ်ကလေၚ်လ္ၚတ်ရံၚ်မ္ဂး တုပ်တဴညံၚ်ရဴ ဗၟံက်ကဵုပလိုတ်၊ ပိကဵုပန် ကီုရ။
Category: ဂလာန်ညးဒါန်လိက်
ပ္ဍဲကဵုဂိတုတုဲကၠုၚ်တေံ သ္ကိုပ်ဝန်ဇၞော် တွဵုရးဍုၚ်မန် “နာဲအုၚ်မျေတ်” ကဵု ဝန်ဇၞော်မန်တအ် စပ်ကဵုပရေၚ်ဘာသာ ဂဇံက်က္ဍိုၚ်ကျာ် စေတဳကျာ်ဇြာတုဲ လိုက်ကၠုၚ် ကွာန်ကၟာဝက်ရ။ သွက်သ္ကိုပ်ဝန်ဇၞော် ဂွံကၠိုဟ်ကေတ်မာန် ဂးတုဲ ဒးဒဂိုန်သဳ ဗတ်ဘာသာဗၟာရ။ စပ်ကဵုပရေၚ်ဏံတုဲ ညးဍုၚ်ကွာန် ဒကာဘာ ဂကူမန်တအ်လေဝ် ဟွံပေၚ်စိုတ်ကွေံကွေံဂှ် ဂွံတီကေတ်ရ။
ပ္ဍဲကဵုပေဲါရုဲမာဲ ၂၀၁၀ တေံဂှ် ဒှ်ပေဲါရုဲမာဲအလီကီုလေဝ် ဂကူမန် ပ္ဍဲကဵုအလုံဒေသမန်တအ် ထ္ၜးကၠုၚ်အစောန်စရာဲ ကဵုကၠုၚ်မာဲ ကုဗော်မန်၊ ”ဗော်ဒဳမဝ်ကရေဇြဳ အလုံရးမန်” ဂှ် ဂွံဆဵုကေတ်ရ၊ ဂွံဆဵုဂဗကၠုၚ် စိုတ်ဓါတ်ဆာန်ဂကူ ကောန်ဂကူမန်တအ်ရ။
ပ္ဍဲကဵုပေဲါရုဲမာဲ ၂၀၁၀ ဂိတုနဝ်ဝေမ်ပါဝွံ အလုံဂကူမန် ညးမၞံုကဵုအခေါၚ်အရာကဵုမာဲတအ် ထ္ၜးကၠုၚ်လညာတ် “ကျခိုၚ်ရေဝ်” (ပြည်ထောၚ်စုကြံ့ခိုၚ်ရေးနှၚ့် ဖွံ႕ဖြိုးရေပါတီ) တအ် ဟွံလီဠာန်ထောံမ္ဂး မာဲဗွဲမဂၠိုၚ်ဂှ် နွံဒၟံၚ်ပ္ဍဲကဵုဗော်ဒဳမဝ်ကရေဇြဳအလုံရးမန်တုဲ ဗော်ဒဳမဝ်ကရေဇြဳအလုံရးမန်ဂှ် သွက်ဂွံဇၞးအာအမာတ် ဗွဲမဂၠိုၚ် နွံရောၚ်။
ပ္ဍဲကဵုအခိၚ်ပေါဲရုဲမာဲ ဂိတုနဝ်ဝေမ်ပါ စၟတ်တ္ၚဲ (၇) ဝွံကီု၊ နူကဵုက္ဍိုပ်သ္ကိုပ် ဒဳမဝ်ကရေဇြဳ ဗၠးတိတ်ကၠုၚ် နူကဵုသ္ၚိထံၚ်တုဲဝွံကီု ကောန်ဍုၚ်အရၚ်ဂမၠိုၚ်တအ် ထ္ၜးပျးကၠုၚ် ပရေၚ်ညးတံ ဟွံပေၚ်စိုတ်၊ ဆက်တုဲ အာတ်မိက်ကၠုၚ် အခေါၚ်အရာညးတအ် ကၠးကၠးမးမးဂှ် ကတဵုဒှ်ကၠုၚ်ရ။ လ္တူကိစ္စဏံ ကတဵုဒှ်ကၠုၚ်ဂှ် နူကဵုအလဵုအသဳတၟိတံ သာ်လဵုဆက်တုဲ ရပ်စပ်အာပၠန်ရောၚ်ဂှ် ဒးဆက်မၚ်ရံၚ်အာဏီရောၚ်။
ပ္ဍဲစၟတ်တ္ၚဲ (၇) ဂိတုနဝ်ဝေမ်ပါဂှ် အလဵုအသဳပၞာန်ဗၟာတအ် ကၠောန်ပေဲါရုဲမာဲတုဲ ဗော်ဍေံတအ် ခၞံဗဒှ်လဝ် ဗျဳခိုၚ်ဖျဵု (ပြည်ခိုၚ်ဖြိုးပါတီ) ဝါ ဗော်ယူအေက်ဒဳပဳ သွက်ဂွံဇၞးအာမာဲ ဗၞတ် (၈၀) တၟအ်ကၠံ အတိုၚ်အလုံမွဲဍုၚ်ဂှ် ဂစာန်ကၠုၚ်ရ။ ပေဲါရုဲမာဲ တုဲဗက်ဟွံဂတာပ် ပ္ဍဲကဵုစၟတ်တ္ၚဲ (၁၃) ဂိတုနဝ်ဝေမ်ပါဂှ် အလဵုအသဳပၞာန်တအ် ဗလးထောံ က္ဍိုပ်သ္ကိုပ် ဒဳမဝ်ကရေဇြဳဗၟာ ဒဝ်အံၚ်သာန်သုကျဳ (ဒေါ်အောၚ်ဆန်းစုကြည်) ရ။
ကဵုဂိတုနဝ်ဝေန်ပါ စၟတ်တ္ၚဲ (၇) ဏအ် နူကဵုအလဵုအသဳပၞာန်တအ် ကၠောန်သ္ပကဵု ပေဲါရုဲမာဲမွဲတုဲ သွက်ဂွံရုဲစှ်ပ္တိုန် အလဵုအသဳ အုပ်ဓုပ်ဍုၚ်တၟိမွဲ၊ နူအလဵုအသဳအုပ်ဓုပ်ဍုၚ်ဂှ် သွက်ဂွံဖျေံကဵုသၞောတ်ဝ်စေဝ်ပၞောန် ပ္ဍဲကဵုသၞောတ်ဒဳမဝ်ကရေဇြဳတုဲ ဍေံတအ် ကော်ခဴစ ”ဒဳမဝ်ကရေဇြဳ မဍိုက်ပေၚ်ကဵုစေဝ်ပၞောန်” (စည်းကမ်းပြည့်ဝသည့် ဒီမိုကရေစီစနစ်) သာ်ဝွံရ။
ပ္ဍဲဂကောံအာဇြဳယာန် ဍုၚ်မပါလုပ် (၁၁) ဍုၚ်ဂှ် ဍုၚ်ဗၟာလေဝ် ပါလုပ်မွဲဍုၚ်ကီုရ။ ခြာဟွံလအ် ပ္ဍဲကဵုဂိတုနဝ်ဝေမ်ပါဏအ် ဍုၚ်ဗၟာဂှ် ဒုၚ်သဇိုၚ်ကဵု သၞောတ်ဝ်ဥပဒေ (၂၀၀၈) ဒပ်ပၞာန်ဗၟာတအ် ချူဇန်လဝ်တုဲ သွက်ဂွံကၠောန်သ္ပ ပေဲါရုဲမာဲနွံရ။ လ္တူဍုၚ်ဗၟာ ဖန်ဇန်ကၠုၚ် ပရေၚ်ပေဲါရုဲမာဲ သာ်ဏံဂှ် ဍုၚ်လ္ၚဵုတံ ထံက်ဂလာန်၊ ဍုၚ်လ္ၚဵုတအ် သ္ၚိတ်ဇြဒၟံၚ်ရ။
ရန်တၟအ်ကဵု ဂွံသ္ပစၞး အလုံဂကူမန်ကီု၊ ဂကူမန်တံ စုတ်မာဲမ္ဂး ဂွံစုတ်ကဵုဗော်မွဲမွဲကီု၊ ရန်တၟအ်သာ်ဝွံတုဲ ပိုဲ တအ် ဒက်ပတန်လဝ်ဗော်၊ သွက်ဂွံပြိုၚ်ပကာန် ပ္ဍဲရးဒေသမန်နာနာရောၚ် က္ဍိုပ်သ္ကိုပ်ဗော်ပရေၚ်ဍုၚ်ကွာန် တၟိ အပ္ဍဲဍုၚ်တေံ ဟီုဂးသောၚ်ကလး ကဵုခမဳသၚ် ညးဍုၚ်ကွာန် ဂကူမန်တအ်ရ။
တ္ၚဲဏံဂှ် အလဵုအသဳတၠအဝဵုပၞာန်တအ်ဂှ် ကဵုဏာသတိပါၚ် သွက်ဂွံကၠောန်သ္ပကဵု ပေဲါရုဲမာဲသၟးဟွံသေၚ်၊ သီုကဵုအခေါၚ်ကဵု ဗော်ပရေၚ်ဍုၚ်ကွာန်လ္ၚဵုတံ ပါလုပ်ပ္ဍဲကဵုရုၚ်မာဲဏအ်တုဲရ။ အတိုၚ်အလဵုအသဳပၞာန်တအ် ကၠောန်သ္ပမံၚ်ဏံ ရံၚ်အာဗွဲအပြောံမ္ဂး၊ နကဵု ဍေံတအ် ကၠောန်သ္ပပေဲါရုဲမာဲဏအ်တုဲမ္ဂး ဂၠံၚ်တရဴပရေၚ်ဍုၚ်ကွာန်၊ ဂၠံၚ်တရဴ ပရေၚ်ဒဳမဝ်ကရေဇြဳ ခိုဟ်တၟိုဟ်တိုန်ညိဟာဟွံတီ ညးဗွဲမဂၠိုၚ်တံ စၟီဒၟံၚ်အိုတ်ရ။