ဟိုတ်နူအသိင်ပေါဲဗ္တိုက် မက္တဵုဒှ်ဒၟံင် ပ္ဍဲမွဲဒမြိပ်ဂၠံင်ဇၞော်ကၟိန်ဍုင် စၟတ် (၁၈) သ္ကုတ်ဍုင်ကလိင်အံင်-ဒဵုဟလဲ ပွိုင်ဍုင်ဍာ်ဗု ရးဒေသတၞင်သဳဂှ်တုဲ ညးဍုင်ကွာန်ဂမၠိုင် ဗၞတ် ၇၀၀ တၠပြင် ပါဲဒဴဘဲပၞာန် စိုပ်မံင်လ္ပာ်ဒေသအုပ်ဓုပ် ခရိုင်ထဝါဲ ဗော်ဍုင်မန်တၟိရောင် တ္ရဲဏအ် (အဝ်ဂေတ် ၂၆) ဂကောံတိုင်ခဳရီုဗင်ဘဲပၞာန် ပ္တိတ်လလောင်ကၠုင်ရ။

သၞေဟ်ကင် သွက်ဂွံတတ်ပယျဵု တွဵုရးဍုင်မန် ကဵု ကရေင် ပါင်ဒပ်အမၠံက် ၃၀၈ မၞုံဗမံက်ကွာန်အၜေတ် ပွိုင်ဍုင်မုဟ်ဍုင်ဂှ် ကြဴနူပတေင်ဂရတ်ပတိုန်လဝ် ပရေင်အာကၠုင်တုဲ ညးအာတရဴတအ် ဒှ်ခက်ခုဲတၟာဂလိုင်ရောင် ညးဒေသတအ် ဟီုရ။

နူကဵုအခိင်လၟုဟ်ဏံ ၚုဟ်ထၜိုတ်ဂှ် နွံမံင်အတိုင်တြေံဖိုဟ်တုဲ အခိင်လိုက်ဝှ်တိကှ်တေံလေဝ် ၚုဟ်ထၜိုတ် သွက်ဂွံတိုန်ဂှ် အကာဲအရာနွံအောန်ရောင် တၠကမၠောန် သွံရာန်ထၜိုတ်လ္ၚဵုတအ် ဟီုရ။

ပေါဲရုဲမာဲ အလန်ပထမ ဒကုတ် (၁) ဂှ်ဝွံ ပ္ဍဲတွဵုရးဍုၚ်မန် လ္ပာ်လတူ (၅) ပွိုၚ်ဍုၚ်ဂှ် သွက်ဂွံကၠောန်ဗဒှ်အာကၠာတုဲ သှ်ေ (၅) ပွိုၚ်ဍုၚ်ဂှ် ရံၚ်အကာဲအရာပၞာန်တုဲမှ ဆက်ကၠောန်အာပၠန် ဒှ်မာန်ရောၚ် ညးအခါတ်ကာဲပရေၚ်ဍုၚ်ကွာန်မန်မွဲတၠ ဟီုရ။

ပေါဲရုဲမာဲ သၞာံ ၂၀၂၅ ဒကုတ်ပထမ မရန်လဝ် ပ္ဍဲဂိတုဒဳဇြေမ်ဗါ စၟတ်တ္ရဲ ၂၈ တေံဂှ် ကဵုဖျုန် လ္တူဍုင်ဂမၠိုင်တုဲ ကၠောန်ဗဒှ်အာဗွဲကိုပ်ကၠာဏောင် သ္ကိုပ်ပၞာန် မေန်အံင်လှာင် ဟီုရ။

ကမ္မယှေန်ပေါဲရုဲမာဲကၟိန်ဍုင်တအ် လလောင်ပ္တိတ်စၟတ်တ္ၚဲကၠောန်ပေါဲရုဲမာဲတုဲအာကီုလေဝ် နကဵုညးဍုင်ကွာန်တအ် စိုတ် ဟွံလုပ်စကဵုပရေင်ပေါဲရုဲမာဲရောင် ညးမင်ရံင်အခါတ်အကာဲပရေင်ဍုင်ကွာန်မန် မွဲတၠ ဟီုရ။