သွက်ဂွံဒှ်ပရေၚ်စဵုဒၞာဲယဲကပ်ကဝ်ဝေဒ်မာန်ဂှ် ပံက်ကၠုၚ်လဝ်သၞေဟ်ကၚ်စၟဳစၟတ် ပါၚ်လုပ်ပွို်ၚ်ဍုၚ်ရေဝ် ပါၚ်ဂၠံၚ်သၞေဟ်ခြေၚ်ဂှ် ပ္ဍဲကဵုအခိၚ်ပေဲါရုဲမာဲဂှ် နူကဵုဂိတုနဝ်ဝေမ်ဗာ ၆ တေံ ကၟာတ်ထောံလဝ်တုဲ ညံၚ်ဂွံကလေၚ်ပံက်ကဵုမာန် ရေၚ်တၠုၚ်မံၚ်ဖိုဟ်ရောၚ် ဂွံတီကေတ်ရ။

ကွဳစက်ကာ ၚုဟ်(၂၆၅)ကိုဋ် မွဲမမ္ဂး ဒးစပၠောပ်ကဵု(၁၀၀)ကိုဋ်တုဲ သၠုဲသှ်ေဂှ်မ္ဂး နကဵုဗီုပြၚ်ကဵုသၠုဲအဆံၚ်ဆံၚ် ဒးကဵုအာမွဲဂိတု ပန်ကိုဋ်ပြၚ်ရောၚ် ညးရာန်ကဝုတ်လဝ်ကွဳစက်ကာ ပ္ဍဲဍုၚ်မတ်မလီု မိတေန်တေန်ကျာၚ် ဟီုရ။

ဌာနပရေၚ်ထတ်ယုက်ကၟိန်ဍုၚ်ဂှ် ဒုၚ်သ္ဇိုၚ်ကဵု သၞောဝ်ဥပဒေ မၚ်မွဲစဵုဒၞာဲယဲကၠောံထၞာန်တုဲ ကလေၚ်ပတိတ်လဝ်အမိၚ်ဏံတုဲ ယဝ်ရဟွံဒ္ဂေတ်ဗက်မ္ဂး အတိုၚ်သၞောဝ်ဥပဒေ ယဲကၠောံထၞာန်ဂှ် ရပ်စပ်ကေတ်အာ အရေဝ်ရောၚ် ဌာနပရေၚ်ထတ်ယုက် ကဵုကၠုၚ်လဝ်သတိပၠန်ရ။

ပ္ဍဲကဵုပါၚ်ရုၚ်မာဲဂှ် ဒၞာဲစမ်ဂမ္တဴကီု ဒၞာဲကြာတ်တဲ၊ ဂစတ်ဍာ်ဗံၚ်တံကီု မၞိဟ်မွဲကဵုမွဲ ညံၚ်ဂွံဒၟံၚ်တၞဟ်ခြာဂွံဂှ် ကၠောန်လဝ်ကဵုဒၞာဲနွံမံၚ်ရောၚ်။

“အဓိကဂှ် နူကဵုတွဵုရးတေံ စၞောန်နၚ်ကဵုပံက်ထောံဂုက် (သၞေဟ်ကၚ်) ဂှ်ရ။ အခိၚ်ကၠောန်တေံလေဝ် အဆံၚ်တွဵုရးဂှ် ကဵုလဝ်အခေါၚ်ဟွံသေၚ်ပုဟ်။ ဍေံဗဒေံါဟွံဂွံဏောၚ်၊ ကၠောန်ဏာလဝ်လေဝ်။ ရုဲမာဲဏံတုဲ ဆက်ကၠောန်၊ ဟွံကၠောန်ဂှ် ဍေံဟွံချိုတ်ပၠိုတ်ပုဟ်။ လၟုဟ်ဍေံကဵုနၚ်စၞောန်ဂှ် ကဵုလိက်ဟွံသေၚ်ပုဟ်။ နူကဵုတွဵုရးဂှ် ဟီုကဵုပွိုၚ်ဍုၚ်၊ ပွိုၚ်ဍုၚ်ဂှ် ဟီုကဵုပိုဲတှ်ေ ဒးကၟာတ်ထောံ”

“ပရေၚ်သွံရာန် အောန်အာ၊ တုဲတှ်ေ စပ်ကဵုပရေၚ်ပိုန်ဂြပ်လေဝ် ထပက်စှ်ေအာ၊ နူကဵုယဲဂှ် လုပ်ကၠုၚ်တှ်ေ ကမၠောန်ဟွံပြေပြံၚ်ဍာံဍာံရ။ အခိၚ်ကသီုဂှ် သ္ၚဳၜၚ်တုဲ စကၠုၚ်လဝ်ရ။ လၟုဟ်တှ်ေ ကသီုလေဝ် ဟွံသေၚ်၊ မၞိဟ်တံလေဝ် ဂွံစဂွံသုၚ်ဂှ် ဒှ်ကၠုၚ်ခက်ခုဲရ” သာ်ဝွံ မၞိဟ်ဇၞော်က္ဍိုပ်စှ်သ္ၚိ ကွာန်အရာပ်ကပေါဝ် ဥုဌေတာန် ဟီုရ။