အသိၚ်သ္ကိုပ်အုပ်ဓုပ်ကွာန်နာၚ်လှုၚ် ဒးဒုၚ်ပန်ဂစိုတ်တုဲဂှ် အလံၚ်အမာတ်လ္ၚဵုကီု၊ ညးချဳဒရာၚ်စန်ဒက်မာဲလ္ၚဵုကီု ယံၚ်ဂွိၚ်ကၠုၚ်မံၚ်နွံရောၚ် ညးပူဗိုၚ်အလံၚ်အမာတ်မွဲတၠ ဟီုရ။

အခိၚ်ကြပ်ကၠုၚ်ကဵုပေါဲရုဲမာဲဏံ ပ္ဍဲပါၚ်လုပ်တိတ်ဍုၚ်ကီု၊ မ္ၚးဍုၚ်ဂမၠိုၚ်တအ်ကီု ဂကောံပံၚ်ကောံကမ္မယှေန်ပၞာန်တအ် ပတေၚ်လဝ် ပရေၚ်စၟဳစၟတ်ဂၠိုၚ်တိုန်မံၚ်ရောၚ် ဂကောံကမ္မတဳတ္ၚဲကောန်ဂကူမန်ဗဟဵု ဒၟံၚ်လတူဍုၚ်မတ်မလီုမွဲတၠ ဟီုထ္ၜးရ။

နူအခိၚ်စလိုက်ဝှ် ဒဵုတ္ၚဲဏံ ၚုဟ်ထ္ၜိုတ်စှ်ေမံၚ်အဆက်ဆက်ကီုလေဝ် ရဲရာန်ကၠအ်ထ္ၜိုတ်ဂှ် နွံမံၚ်အတိုၚ်တြေံဖိုဟ်ရောၚ် ညးရေၚ်တၠုၚ်သွံရာန်ကၠအ်ထ္ၜိုတ် နူပွိုၚ်ဍုၚ်ဇြပ်ဗုမွဲတၠ ဟီုရ။

အကာဲအရာၚုဟ်ထ္ၜိုတ်ပရေံတုဲ ဗ္ဂေတ်ဩန်ကမၠောန်ဟွံမာန်ဂှ်ရ ဆေၚ်ရာန်ဍာ်ထ္ၜိုတ်လ္ၚဵု ဒးဒေါံဇူကၟာတ်လဝ်ဆေၚ်နွံရောၚ် တၠကမၠောန်ရုၚ်စက်ထ္ၜိုတ်မွဲတၠ ဟီုလဴထ္ၜးရ။

ဩန်ဂိတုအ္စာဘာကောန်ဂကူမန် ဒှ်မံၚ်ခက်ခုဲဇၞော်ကဵုဒြဟတ်ဂှ် ဟွံချပ်မွဲသာ်တုဲ ညးတာလျိုၚ်မဆေၚ်စပ်တအ် ချပ်သဳကၠဳဒၟံၚ် သွက်ဂွံဗပဵုကဵုဩန်ဂိတု ကုအ္စာဘာဗ္တောန်လိက်မန် ပ္ဍဲဘာတန်အလဵုအသဳဂှ် ဟွံဒးရးက္ဍၚ်ရောၚ် ဂကောံကေၚ်ကာ အ္စာဘာကောန်ဂကူမန် အဆံၚ်ပွိုၚ်ဍုၚ်မွဲတၠ ဟီုပါ်ပါဲရ။

နူတနေံဏံ (ဒဳဇြေမ်ဗာ ရ) မွဲတ္ၚဲဓဝ်ဂှ် သ္ကိုပ်အုပ်ဓုပ်ကွာန်ကွာန်ရုတ္တံၚ် ပွိုၚ်ဍုၚ်ရေဝ်သၟဝ်ကျာမွဲတၠကဵု သ္ကိုပ်အုပ်ဓုပ်ကွာန်နာၚ်လှုၚ် ပွိုၚ်ဍုၚ်မုဟ်ဍုၚ်မွဲတၠ ဒးဒုၚ်ပန်တုဲ သ္ကိုပ်အုပ်ဓုပ်ကွာန်ဗွဲမဂၠိုၚ် ဖေက်လကိုတ်မံၚ်နွံရောၚ် ကောန်ဂကောံ အုပ်ဓုပ်ကွာန်ပွိုၚ်ဍုၚ်ရေဝ်မွဲတၠ ဟီုရ။

ညးမဒှ်သ္ကိုပ်အုပ်ဓုပ်ကွာန် နာင်သၠုင်လေံတက် မၞုံယၟုနာဲဇြေန်မျဵုဥူ (အထောဋ်) ကဵု သ္ကံရဲမွဲတၠ ဒးဒုင်ပန်ကဵုလွဟ်တုဲ ချိုတ်အာရောင် ဂွံတီကေတ်ပရိုင်နူကဵုညးဒေသတအ်ရ။

သၞောတ်ဒဳမဝ်ကရေသဳ ဗြေဝ်တိုန် ပ္ဍဲကၟိန်ဍုင်တုဲ စိုပ်အခိင်ဂကောံရပ်လွဟ်ကောန်ဍုင်အရင်ဂမၠိုင် ဟွံမွဲမှ ဖအောန်ဖျေံ ပရေင်ဒပ်ပၞာန်တအ် မပါလုပ်ဒၟံင် အပ္ဍဲဗွိုင်ကၠတ်ထဝ်အဆံင်င်ဏောင် က္ဍိုပ်သ္ကိုပ်ပၞာန်ဗၟာ မေန်အံင်လှာင် ဟီုဂးကၠုင်ရ။

အကြာဒပ်ပၞာန်ဗၟာတအ် ကဵု ဂကောံပၠန်ဂတးတအ် ကတဵုဒှ်ပေါဲဗတိုက်တုဲ ညးဍုင်ကွာန်အလုံကွာန်ကၠာင်ထဝ် ပ္ဍဲပွိုင်ဍုင်ဇြပ်ဗုတအ် နူတနေံတေံ ဒးဂြိပ်ပါဲဘဲပၞာန် အလုံမွဲကွာန်နွံရောင် ညးပါဲဒဴတိတ်နူကွာန်မွဲတၠ ဟီုလဴထ္ၜးရ။

ပေါဲရုဲမာဲကမ္မယှေန်ပၞာန် မကၠောန်ဗဒှ်ဂှ် ကြပ်ကၠုင် ကြပ်ကၠုင်ရ။ ဗော်ညဳသၟဟ်မန် မဒုင်လဝ်ယၟု သ္ပစၞးကဵုဂကူဂှ် လုပ်ပြိုင်ပေါဲမာဲ နကဵုလၟိဟ်ညးစၞးအလံင်အမာတ် ၃၈ တၠ၊ ဗော်မန်တောတက် ပ္ဍဲတွဵုရးကရေင်ဂှ် ၃ တၠရောင်ဂှ် လလောင်တြးလဝ်ရ။ ညးမလုပ်ပြိုင်ပေါဲရုဲမာဲ ကေုာံ ညးတာလျိုင်ဗော်တအ် ညိညဟေင် ချဳဒၟံင်တုဲ ညးဍုင်ကွာန်ဂကူမန်တအ်လေဝ် သ္ၚိတ်တဴဒၟံင်အိုတ်ရ။ ပေါဲရုဲမာဲ အလန်ဏအ် ညိလေဝ်ဟွံတုပ်ကဵု ပေါဲရုဲမာဲလောန်ကၠုင်တေံ လးလးရ။