အသိၚ်သ္ကိုပ်အုပ်ဓုပ်ကွာန်နာၚ်လှုၚ် ဒးဒုၚ်ပန်ဂစိုတ်တုဲဂှ် အလံၚ်အမာတ်လ္ၚဵုကီု၊ ညးချဳဒရာၚ်စန်ဒက်မာဲလ္ၚဵုကီု ယံၚ်ဂွိၚ်ကၠုၚ်မံၚ်နွံရောၚ် ညးပူဗိုၚ်အလံၚ်အမာတ်မွဲတၠ ဟီုရ။
အဃောညးစၞး အလံၚ်အမာတ် နူဗော်နာနာတအ် သၠုၚ်ပ္တိုန်အသိၚ်ချဳဒရာၚ် သွက်ဂွံလုပ်ပြိၚ်ပေါဲရုဲမာဲဂှ် ဟိုတ်နူအသိၚ်သ္ကိုပ်အုပ်ဓုပ်ကွာန် နာၚ်သၠုၚ် ဒးဒုၚ်ပန်ဂစိုတ်ဏာတုဲဂှ် ရဲချဳဒရာၚ်ပေါဲရုဲမာဲလ္ၚဵုတအ်လေဝ် ယံၚ်ဖေက်ကၠုၚ်နွံ သ္ဂးရ။
“နူကၠာဟွံဒှ်ဂှ်လေဝ် ချဳဒရာၚ်မံၚ် ဖေက်က်ဂံၚ်ၚ်ရ၊ မိၚ်ပရိုၚ် သ္ကိုပ်အုပ်ဓုပ်ကွာန်နာၚ်လှုၚ် ဒးဒုၚ်ပန်ဂစိုတ်ဂှ် အလံၚ်အမာတ်လ္ၚဵု၊ ညးဘိုၚ်ပူဗိုၚ်စန်ဒက်မာဲလ္ၚဵုဂှ်တှ်ေ စိုတ်ယံၚ်အိုတ်တး၊ ဒးဒုၚ်ဂစိုတ် ဟွံဆေၚ်ကဵုမာဲတီဖိုဟ်လေဝ် ယံၚ်ဂှ်ရ” သာ်ဝွံ ညးဘိုၚ်ချဳဒရာၚ်စန်ဒက်မာဲ ပွိုၚ်ဍုၚ်မုဟ်ဍုၚ်မွဲတၠ ဟီုရ။
ဂိတုဒဳဇြေမ်ဗာ (၇) အခိၚ်လ္ဒောဝ်တ္ၚဲဒၚ်ဒၚ်ဂှ် သ္ကိုပ်အုပ်ဓုပ်ကွာန်နာၚ်လှုၚ် မၞုံယၟု နာဲထောန်ဋ် ကဵု ကောန်ဂကောံညး မၞုံယၟု နာဲရတ် ညးၜါတၠ ဒးဒုၚ်ပန်ဂစိုတ်ဏာ ဗၟံက်ဂၠံၚ်ကွဳစက် ပ္ဍဲကၠအ်ထ္ၜိုတ်မွဲဒၞာဲရ။
“ရံၚ်ကေတ်ဟဏံတှ်ေ ဟွံဆေၚ်ဆက်ကဵု ရဲချဳဒရာၚ်ပေါဲရုဲမာဲခယျလေဝ်၊ ဆဂး ဟီုကၠးကၠးဟွံဒးဏီ၊ ပိုဲတော်ကေတ်တှ်ေ ဟွံဆေၚ်စပ်ကဵုပေါဲရုဲမာဲဂၠိုၚ် ခယျ၊ ဆဂး ဒှ်မံၚ်အဃောစန်ဒက်မာဲ ဒှ်အာဗီုဏံတှ်ေ ယံၚ်ဂွိၚ်တိုန်ညးသ္ကအိုတ်လေဝ်၊ တုဲ မွဲသာ်ပၠန်ဂှ် သ္ကိုပ်အုပ်ဓုပ်တြေံဂှ်လေဝ် ညးလုပ်သ္ပလဝ်အလံၚ်အမာတ် အဃောညးချဳဒရာၚ်မံၚ်တှ်ေ ဆက်စပ်မံၚ်ဟာ ၊ဟွံဆက်စပ်ဟာ ကေတ်ဟွံဒး ယံၚ်တိုန်အိုတ်ရ” သာ်ဝွံ ညးပူဗိုၚ်ကရောံအလံၚ်အမာတ်တၞဟ်မွဲတၠပၠန်ဂှ် ထပ်ဟီုရ။
ကိစ္စသ္ကိုပ်အုပ်ဓုပ်ကွာန်နာၚ်လှုၚ် ဒးဒုၚ်ပန်ဂစိုတ်ဂှ် ဆက်စပ်ကဵုပေါဲရုဲမာဲ နွံဟာ/ဟွံမွဲဟာဂှ် သွဟ်ဟွံတီကၠးဏီလေဝ် အခိၚ်ဝွံ ဒှ်မံၚ်အခိၚ်ချဳဒရာၚ်စန်ဒက်မာဲတုဲ ရဲလ္ပာ်ဂ ကောံပၠန်ဂတးတအ်ဂှ် လလောၚ်ပ္တိတ်လဝ်ပရိုၚ် ကုရဲချဳဒရာၚ်ပေါဲရုဲမာဲတအ် ယဝ်ကဵုဒးဇြဟတ်ကဵုပေါဲရုဲမာဲမ္ဂး သွက်ဂွံကေတ်အရေဝ်ကဵုဒုဟ်ဒဏ်ပိုတ်ပိုတ်နွံရောၚ် လလောၚ်လဝ်နွံသာ်ဂှ်နွံတုဲ ကိစ္စသ္ကိုပ်အုပ်ဓုပ်ကွာန်နာၚ်လှုၚ် ဒးဒုၚ်ပန်ဂစိုတ်ဏံ ဒှ်ပရူပန်ဂစိုတ်မၞိဟ် အလန်ကိုပ်ကၠာအိုတ်ရ။
